حاورت الاشعار والطاروق حاورني
والفكر جاب القصايد ماتثاقلها
من هاجس الشوق والاشواق تجبرني
على القصيدة وأسويها وأسجلها
والوقت لو غار يبطي مايغيرني
لو كان جفني دموع العين نايلها
الشعر ياما تعافرته وعافرني
والسد والسالفة مانيب قايلها
ولاحدٍ على لقمة المنتوج خاشرني
أساير البيد ماشكي من قوايلها
ياشعر قدرك بقلبي وانت خابرني
مافيه داعي نولع في فتايلها
قلبي من الحب عمرني ودمرني
لين الضماير تصدع باب منزلها
الله يجيرك وأنا ربي يصبرني
وظروف الأيام جعل الله يعدلها
بعطيك وصف الغزال اللي محيرني
بالعين والخد لافلت قذايلها
عين الوحش كل ماطارت تناظرني
شهانةٍ من طويل العمر ناقلها
والخد مثل القمر ساهر ومسهرني
نص الشهر مال في خده وميلها
أميرة الحسن مبسمها يدهورني
ولو تجمع الزين كله مايعادلها
أشوفها في خيالي حين يظهرني
على نجوم الثريا يوم أقابلها
وياكثر ناسٍ تناديني وتنطرني
وصد عنهم وأجي معها وأدللها
ولوّني أزعل وهي تضحك وتنظرني
أضحك معاها ولاودي أفشلها
واليوم فاتت سنه والهم حاصرني
ماكلمتني ولاجتني رسايلها
وعدوي اللي من الحيلات يقهرني
والله ياناس مايعمل عمايلها
الموت لاشفت زوله ثم تنكرني
بيضيق قلبٍ تزعزع من فعايلها
أنشهد ان البشر دايم تحذرني
من سكة الحب والشوق وخلايلها
وقلبي يكب النصيحه مايشاورني
لاشاف زوله دلال الحب هيلها
واقلبي اللي على الغالين ذكرني
مامر يومٍ وفكري ماتخيلها
هاجوس الأشعار سامرته وسامرني
وحصانة الشعر أرفعها وأنزلها
وأعرف مداهيل وقتٍ ماتحاقرني
وقتٍ مقابيس نار الحسد يشعلها
وأنا ليا شفت وقت الضيم كدرني
أزبن على اللي ليا ضاقت يسهلها
الواحد اللي جعل حبك يصخرني
للشعر وعلوم وسط القلب شايلها
ياهيه لاصرت تنهاني وتامرني
ارفق على الروح ياخي لاتعللها
تعال شف حالتي وأكيد تعذرني
وعذالي القشر جنبها وشملها
وان كنت ضايق تنخاني وناظرني
لد النظر والشجاع ان قال يفعلها
والله لو اطلبك للموت يقبرني
اني لسويه مير ارتاح وزهلها
ون مت مابيك غير انك تذكرني
سجل وصاتي معك لاهنت سجلها
العرض الشجري
