نبدأ حديثنا
وش يعني لك الليل؟؟
بأكتب المعاني اللي قرقعت في صدري ورددوا ياليل ماطولك.
الليل يعني بعد الساعه الخامسة مع مطيح الشمس هالايام وبعد ايام بيصير غير.
الليل يعني المسلسله اليوميه واحداثها التي تتكرر في كل مسلسله حتى صرنا نعرف النهايه.
الليل يعني ولدي الصغير يبدء يلجنا يعني مايصيح الا واحنا نامين/// طيب ليش مايصيح في النهار ويفكنا
الليل يعني صوت الشخير والمزامير الهاتكة للطبلات الشفافه.
الليل يعني مصروف زياده في فاتورة الكهرباء // طيب والشموع أش فيها رومانسيه.
الليل يعني العلاقه الحميمه مع المخده وبثها الاشجان والاحزان // ماسمعنا احد يحكي لها الافراح.
الليل يعني ندبها خبز وفول وتنام خفيف // يقولون الفول يعدل الحبه رطل لحم// وين خريجي التربيه الفنيه يعلمونا.
الليل يعني نصف البث التليفزيوني مباريات كرة قدم صاكين الصوت فيها من لجة المعلق اللي يسبق اللاعبين على الكوره ومسوي دربكه دايم.
الليل يعني انتظار اخبار تسعة ونص وأسكتوا وأص يابزر تقل فيه زيادة رواتب كل أثنين
الليل يعني خروج أهل الكروش في الدلقس( العتمه) لتعويض حشي النهار تقل بينهم وبين الصحون عداوه ( وينك ياصريع الرز).
الليل ابو الاسرار يعني اننا عاقلين في النهار والله من الحكي خل عنك بس.
الليل يجي بعد النهار
الليل يطول في الشتاء ويسمونه ابو ليلين ويكون فيه عشاء ابتدائي وعشاء ثانوي
الليل يقصر في الصيف حتى يبان سره...
والليل بعد فيه العروس قد شفتوا عرس في النهار الا عرس سودانيه كان العصر
الليل فيه المغازلات الهاتفيه والنصب على الدلوخ من البنات اسمي غسان وعندي كوبيه والكوبه وجاي اجازتي من امريكا فري نايس والسبب المغازل في الليل لأن الامهات مشغلات الخطوط في النهار .
.. والليل تلجلج البلديه فيه وتسمعنا اصوات الفرامل السمفوكيه على الاسفلت الحار عقب نهار قيضه يقرش الصنفره
في الليل نذكر الواجبات عقب مانسمي بننام..
. وفي الليل يبدء صبغ الشعر للي اقفى ليل شعرهم..
. وفي الليل يردنا لا نأكل عسكريم..
. وفي الليل يهضل الدشير من العواير وتنتهي نوبة الخفارة عليها
وفي الليل يكون ظلام هذي بعد بحوث ثلاثة اشهر بلياليها.
وفي الليل الكلام همس ومافيه تمط حلقك لاخره لأنهم يقولون الليل يوصل الكلام( صار ماسنجر)
الليل صكات البلوت لانه في النهار لو تقطع او تعطي اشارات تنكشف
*r
العرض العادي
