هااي قاايز ..هلوو قايزات
كيفكم..اخباركم؟؟
ادري ان وحشتكم موت بس وش اسوي..تعرفون الناس اشغال وانا انسانه عندي مشاريع ومناقصات وزحمه
8
8
8
اختصارن للوقت..فهم يقولون بأن الوقت كالساطور ان لم تذبحه ذبحك
كنت مندهشه ومنسجمه امام برنامجي المفضل و ما ان يمديني اتابع القليل منه
الا ويقطعون علي حبل اندماجي بفاصلن اعلانيّ...كم هم غثيثون هم ودعاياتهم
وتختلف انواع الدعايات..باختلاف المنتج <<<< قولي والله
فبعضها التافه..ويبون ريال
لدرجه تشعرك بأن المخرج مريض نفسيا ولديه داء التهيؤات..
واضرب مثالا تلك الدعايه اللي الرجال يعصر مخه ما يدري وش يكتب لزوجته بعيد زواجهم
وبعدين تدخل هي و تدووور بشعرها وهو يتنح ويبتسم وبعدين تقوله
كلما من قلباك احلى من ميت كلما مدري وشو
انه برت بلس الجديد!!
وهناك الدعايات المحرجه
مثل هذيك الجداويه اللي ما تقدر تروح لاهل زوجها..وهيناكا يتحملو كلمتين ع الماشي
هييييييييييه
وين قاعدين..توهم يكتشفون الاختراع ولا يستهبلون..والله ان وجهي يغدي تسنه ترنجايه ولا طماطمايه خصوصن لا صرت مع اخواني الزلاليب
يا الهي.. ويحهنّ كم هن فاصخاتن للحيائي
8
8
8
وش ابشركم يا اخواني وخواتي قضت المقدمه
=======================
تررررن تررررررن ترررن(جرس الطليفووون)
شنووو هذا شكووو ماااكو اكوو!!! يعني مارح اكمل تمثليتي مثلن يعني ..
ردي منيره
لأ
ردي يا نويّر
ماااابي
ردو يا زفتات..وحده ترد الحيييين ولا ترا والله بذا على روسكم يا قرود
وانتي ليش ما تردين
انا قلت انتي تردين يعني انتي تردين
ليه طيب؟؟ بس تتحكمين فينا محنا عبيد ابوتس تصدقين
وتجي الثانيه تدافع عنها..خوات اخر زمن..ناس تخاف ما تختشيش
وش دخلتس فينا...كل شي على كيفتس..شمعنى؟؟
وتنقلب الجلسه الدافئه الى معركه حاميه الوطيس
وهكذا... ينتهي المسلسل..وينقطع رنين الهاتف ونحن نتبدال المديح والكلام العذب( والعكس صحيح)
و تمر الايام
حياة مافيها اي نوع من الاكشن والمغامرات
من البيت للجامعه والجامعه للبيت ومن البيت للسوق ومن السوق للمطعم ومن المطعم للبيت ومن البيت للجامعه
كنت جالسه في احدى المحاضرات..ارسل نكت لخلق الله عل وعسى احد يردلي بنكته توسع صدري
حيث انني لا تحلالي النكت الا اثناء المحاضرات...
وقد تدمع عيناي من شده الضحك حتى لو كانت نكته بايخه..ومهما كانت سخيفه فهي بالنسبه لي امتع من التركيز على كلام مصريه مدري وش هي تقول
خويتي اللي بجنبي كتبتلي على الدفتر..
سوسو طفشانه؟؟
بقوووه
وش تبين نسوي؟
انا وبكل بثاره..مممممممم ودي نركب صاروخ ونفحط بالفضاء
يعني بالله بوسط المحاضره والحرمه قاعده تتكلم وش بنسوي يعني
خوذي هذي وبتنسين شي اسمه زهق
انصرعت..وشو ذا!!
جربي ما رح تخسرين
وجع مخدرات يا لميا الله ياخذ نص وجهتس
يا خبله وش مخدراته الله يرحم حالتس
هذي الحبه يسمونها( حبه الحريه)
مير اجي اخفف دمي واقولها حبه ولا قبله..قبله ولا بعده هق هق هق
قبصتني قبصه بنت كلب...
المشكله مقدر اصرخ عشان ما ننطرد من المحاضره ولا اقدر اقبصها لانها بترجع تقبصني وقبصتها توجع ..
7
7
7
7
7
رجعت البيت..عينت من الله خير..وعقبها تهاوشت مع امي لان الغدا شين وعيّت علي اطلب من هارديز..
قالتلي من اليوم فصاعدا"(مهيب عاقله امي تحتك بانسه منشن)
اللي نبي نطبخوووووه تاكلينوووووووه سمعتين
وياليتها قالت كذا وبس.. جرحتني و قالتها بالصريح الواضح
خلاص سويت الي علي وزياده..تحملتس كل هالسنين..من الحين لا بغيتي شي انتي انفعي روحتس وتعلمي تطبخين انا ما علي منتس لو تصيرين هيكل عظمي
رقيت لغرفتي يقالي بضرب عن الطعام عشان يأنبها ضميرها
بس شرهتكم على اللي لقتني وجه..
وانا اتحلطم وضايق صدري مير تذكرت الحبه حقت لميا
وابلعها واغط في سبات عمييق
7
7
7
7
طاع طاااع طااااااااع( اختي الرقيقه تدق الباب)
امي تقووووووووووووول
يلا قووومي بنرووح لعمتي حصيصه بتجين معنا ولا لأ؟؟؟
حقترتها واخذت تعسيله والظاهر انها استنتجت اني مالي خلقهم وطست
صحيت الساعه خمس وثلاث دقايق(بتوقيت جوالي)
حسيت بثقل غريب..قلت يمكنه مفعول الحبه..رحت الحمام وانا مغمضه واسحب روحي سحب
7
7
7
7
يااااااا لهوووووي يا مصييييتشي يا خراااااااابي
وشوو ذاااااا
رحت اناظر المرايه
لاااااااااااااااااااااااء
ويغمى علي خمس دقايق... وبعدين صحصحت
شعري وينووووه
و يغمى علي ثانيه...وبعد دقيقه ونص صحصحت
وش هالحواااااجب
هنا حاولت يغمى على بس مخي قالي وش تبين حلا هو كل شوي يغمى عليتس
وش هالشنب!!!
حسيت بطعنه ..حسيت بسكين قاعده تقطعني..يا ويلي ويلاه صادقه جدتي من عاب ابتلى
انوااااع البشاعه وانهبلت وجاني صياح اكثر واكثر يوم سمعت شهقتي
صوتي تقل مزنوطه ولا مزكمه خشششن و يجيب الألم
وادق على الخبله لميا
وش انتي معطيتني وضربه
ليه وش صار معك
كوووووولي هوااااااااا صرت كائن غريب اروع وكلي شعررر
لا يا بعدي ما غريب الا الشيطان...صرتي رجال بس مؤقتا لا تخافين..هماي اقولتس حبه الحريه يلا انطلقي وسعي صدرك..بس تبين الصدق صوتك رايق
يا مال الماااحي اللي يمحيييتس..
بزاعلتس للأبدددد
اشوى ان اهلي كانو مسيرين..وابوي يشخر بالصاله وحاط الجزيره على اعلى صوت
ولاكان لعنو خامس خامسي وخلوالشرطه يكلبشوني
ولو احلفهم بالمصحف اني بنتهم مستحيل يصدقون..
طبعن لانه شي ما يخشش الدماغ هوا اييه اصلوو ده؟؟ ده راقل ويبئا بنتنا..ازااي!!
رحت لغرفه اخوي واخذلي سراويل سنه (طوال)..ابغض ما على قلبي الي تجي شورت ستغفرالله شكلهم يضحك وهم يمشون وسيقانهم تهفهف تحت الثوب
يا حزني على شبابتس اللي راح يا ست الهوانم..اجل انتي صرتي تلبسين هالاشياء <<<<مو مستوعبه
وثيابه الله يهديه كلها على الشماعه..مدري وش هو الوسخ من النظيف..مير اتجرء ولو اني عارفه انه بينهبل بس اخذتلي ثوبين شكلهم جدد وكشخه..الله يرجه شكله مخليهم للمناسبات هههههه
وتلطمت بشماغ واخذت معي غتره احتياط<<< تحسون فجأه جازلها الوضع
بس المشكله كانت بالنعال..مقاسه الله يحفظه كبير ولا جزم العساكر..مطابل يا كافي ميب رجول
اضطريت البس شي من عندي..بس شحاطه مع ثوب ما ينفع
ولا صندل مثلن
لبست النايكي حقت الجامعه..لونها رصاصي يعني تمشي الحال
(ثوب وجزمه رياضه...عادي انسان ناوي يمشي..وده يخفف..فيها شي؟!!)
واطلع امشي بحارتنا.. اول مره من سكنا بيتنا ذا اتمشى كذا لحالي...
شعور غريب..كل شوي انز
كأنك تتروش بمويه دافيه ومسترخي وفجأه تطلعلك مويه بااارده ومثلجه
هذا هو شعوري لما استوعب اني مو لابسه عبايه
قعدت افكر بالمصيبه اللي ابتلشت فيها...يا ربييه...وش ازين بعمري
طيب وامي يحول.. بتحسبني هجيت ولا انخطفت..وبلحالتين الله يستر وش بيصير لها مسيكينه
وبينما انا اهوجس واهوجس وتوقف سياره
لو سمحت وين بيت مزعل بن فرحان المصروعي<<<تسمع بالتمويه
انا توحشت وقمت اهرول واهرول مابي اتكلم لاني كل ما سمعت صوتي غصبن علي ابتسي
وينزل الرجال..انا هنا تشنجت بمكاني
( بنت وشافت رجال نازل من السياره..يعني رررعب ما يبيله وصف)
وش مشكلته!! مافي الا انا يعني ليه ما يسأل احد ثاني
اقول يالاخ وش بك ..اسالك وين بيت المصروعي؟؟ وراك منتب ترد
قلت مافي الا اسوي نفسي معتوه(ستغفرالله ستغفرالله ستغفرالله)
باه تاي باء بيوه ااه
نعم
فجأه جتني ثقه بالنفس يوم شفته ارتاع...قلت خل اكملها وانقز على رجل وحده
وهو اللي ينفجع وقالي الله يستر عليك ويركب سيارته ويشخط هههههه
بدت السنفونيه الجميله تعزف..قد تتسائلون وشي السنفونيه ..
انه بطني يا حبنيله ...اثري جوعانه..يؤ اقصد جوعان... وعصافير بطني بدال ميب تصوصو قامت تنابح..عااوزين ناكول عاااوزين ناااكول
دقيت على لميا راس البلا الله لا يحللها
الو لميا
ههههههههه يختي وطي صوتس ترا اللي يشوفني اكلمتس بيشك باخلاقي..جبتيلي الشبهه ههههههه
كولي تبن كبر راستس...ميته من الجوع ما تغديت...ولا معي فلوس..ومقدر ارجع البيت الحين...دبريني بسرعه
يا عمري يا سوسو..خلاص امسكي ورقه ودوري..ولا تبين اعطيتس مناديل تبيعينهن عند الاشاره ههههههههه
تتطنزين يالسخيفه..هين وربي لا اردها لتس واخليتس تصيحين دم ونشوف مين اللي بيضحك على الثاني
تعاااالي امزح معتس...وه وه يا ساتر وش جاااتس يا سوسو صرتي رجال صدق ههههه
والله انتس كاسره خاطري بس شر البليه ما يضحك...يلا تعالي بيتنا بس يا ويلتس لو دقيتي الجرس اوكي
ويوم وصلت حول بيتهم وعطيتها مسد كول..
طلت من الشباك واشرتلي اصبري....يعني على بالها بتسويلي درب
فتحت الباب وتقوولي بسرررررعه بسرررررعه
وانا استهبل واقول احححم احححححم يا ولد احححم يا ولد( اتنحنح)
طول عمري اروح لبيتهم رافعه راسي بكل شموخ..وكل بزارينهم وامها وخواتها يستقبلوني بالاحضان...الله يالدنيا صرت ادخل ركض تقل حرامي
ويوم دخلت غرفتها وقفلت الباب ضاق صدري من جد..قلتلها لميا ترا ما ندري وش الحكم فيها..
بس خلي الشباك مفتوح والبسي شيله...ما نبي الشيطان يصير ثالثنا
وهي اللي تنفجر من الضحك..
الله يرررجتس حلووووة
قلتلها مافي شي يضحك بسرعه تغطي ولا انا اللي بطلع
طيب طيب ولا يصير خاطرك الا طيب يا سعود
حسبي الله عليتس منهو سعود
هماتس كنتي تستهبلين ايام التشات وتقولين انتس سعود..يلا عيشي الدور الحين
جابتلي خبز وجبنه بيضا ولبنه وزيتون وزعتر و وشاهي..
هممممم (كل شي بلقمه وحده ) مممممممم انه لزييييز لاخر قطره
انفجعت لميا
طووول عمري احلف عليتس ولا تكملين ربع اكلتس..وش صاير بالدنيا
قلتلها تصدقين حتى انا مدري وش فيني..شهيتي مفتوحه لو اشوف قدامي دينصور اكلته..توني ادري ليش مساعد ياكل ثلاث صحون رز وحنا كنا ننفجع ونحسبه وحش ههههههه
مديت رجولي وانهااارت لميا
يا لهووووتي ما هازا الشعر..انه يتجدل من غزارته
قلتلها اسكتي جيت ابشيله بالواكس مير ينشب وعيا لا ينشال...جذور حشى مهوب شعر اوادم
ههههههههههههههههههههه اصبري اجيب حلاوه
وش فرقت يا عبقريه
طيب استني خل نجرب براون
وتنحرق المكينه ...وانا اللي طول عمري كنت اتسائل ما هو الشبه بين الرجاجيل والخرفان
اكرمتس الله يالشينه..يلا انا استاذن
طيب وين بتروحين بهالليل
مدري..علمي علمتس والله
اصبري عندي حل
وشو
اطلعي ودقي الجرس كنتس اخو وحده من البنات وبتعطيني اوراق..وبقول لاخوي يستقبلتس بالملحق
طيب وبعدين
ابد..قولي ان بيتكم بعيد بالجبيل وان عندك الصبح شغل هنا والمشوره ما تسوى رايح جاي
ما بقى الا هي..ارز وجهي عند اخوتس اقول تقلعي ولا يكثر
اصصصصبري..يا حبتس للعجله..انا بوصيه يلزم عليتس تنامين عندنا بدون ما تقولييين
بس انتي اعطيه القرين لايت
نطيت مع الشباك..( حرااامي من جددد) وبغيت ادق الجرس مير افطن انها ما عطتني الاوراق
وازهم عليها واقووولها الورق..الورق..الورق يا دبشه
وجدعتهم علي وانا القطهم ورقه ورقه..ربي سلّم ولا لو احد شاف المنظر كان انا وياها بمستشفى شهار للامراض العقليه
قريت المعوذات ودقيت الجرس...فتحلي اخوها فراس.. توه بخامس..
هلا..امر
قلت السلام عليكم ابي اعطيكم الورق هذا..من اختي لاختك( تحسون اسلوب واحد رقيق بزياده )
قالي شكرن.. تفضل.. حياك الله( وانا اشهد ان هالبزر لسانه اطلق مني بالف مره)
دخلت الملحق وانا اتلفت يمين ويسار...جتني ام الركب.. ترا والله مدري وشي ام الركب بس من كثر ما تقولونها يالعيال احسها شي يضحك مدري ليه
ويدخل اخوها فهد..شي عملاق بو خمسه وعشرين ويقطر ملح وثقل وعقل و رزه وشياكه واللي تبووون مشالله تبارك الله
وانا قلبي طاح على الارض وقام يغني اتقلب على جمر الغضىىىى اتقلب.. اتقلب.. اتقلب
هلا هلا يالله حيه..ومد يده يصافحني وبعدين قرب يبي يسلم مير يكوش جلدي واسحب يدي بسرعه
استنكر بس مشاها وقالي اخبارك علوومك؟؟
قلت تمام الله يسلمك
قالي وراك واقف استريح
قلت لا ميخالف بس وراي مشوار لازم ارجع قبل لا يتاخر الوقت..يالله فرصه سعيده ومع السلامه
قالي وييين يا بوالشباب...ما هنا طلعه قبل لا تتعشى..مير يزل لساني وقلت تعشيت تو اكرمكم الله
هو استغرب..
وارقعها واقول اقصد اكلت هنا بالمطعم اللي جنبكم<<<<الله يرجني وش هالماااصل اللي خرّب القصه
قالي والله ان عشاك الليله هنيّا وفطورك وغداك الدزابله عندنا
وتراني حلفت..يرضيك ترد حلفي ذيّا<<<< فجأه صار مسلسل بدوي
قلت ما تقصر والله خيركم سابق الله يطول عمرك ويسامحك ويدخلك الجنه وبوناصر يطلبك الحل وكل عام وانت بخير.. ومن الروعه رصيت كل الكلام اللي اعرفه واللي ما اعرفه مع بعض
قام يضحك وقالي يا حبيلك دمك خفيف..ما تعرفنا على الاخ الكريم
توهقت توهقت قلت انا عثمان بن غسان بن سلطان بن سينان العتريسي..
قالي والنعم
قلت ما عليك زود..
بدينا ندردش...استهبال..تعليقات..والله انه حبيب مثل اخته اللهم هي اخف طينه شوي... بس عاد الله حق..هو املح منها ولو يعدل ضروسه اللي طالعه متر ونص قدام ويركب تقويم يطلع احلى واحلى
فجأه شغل فلم ..وانا ادعي ان الفلم يصير كوميدي
ولا خيالي ولا عن حرب ومذابح وتكفيخ.. عووصماااااان
وش يبي ذا..اشوفه بدا يطيح الميانه
قلت ولا عليك امر...بس وراي قومه بدري وودي انام
قالي ايييه ابشر..بروح اجيبلك ثوب وبطانيه..ولو بغيت اجسرك وانام هنا ميخالف
قلت لالالا ما يحتاج خلك بالبيت انا متعود انام بالملحق حق بيتنا كل يوم( نصب على كيف كيفك)
جاب الاغراض وعطاني ثوب مشقوق..لو يجلدووني ما لبسته(طرار ويتشرط)..
قلت ممكن بجامه؟
هو يحسبني انكت وقعد يكركر..قال تبي بجامه بطقطق من تحت
المهم احتريه يطس والظاهر ان الاخ ماله نيه ..طفى الانوار وجاب اللاب توب وشغله
قلت انت بتقعد هنا؟ قالي ايه..ليه؟ قلت لا بس اسال
تصبح على خير..قالي وانت من اهله
7
7
7
7
ااااه منهم هالتماسيح
وش شفت يا بناااات...الله يا شفت علووووم
فاتح مليون وندو...مسنجرين...وبال توك..وتشات..وخمس منتديات
مدري وشلون يمديه يلحق..
واشوفه يطقطق متحمس واحيانا يبتسم تقل خبل....انا توجست ولفيت مع الجهه الثانيه..مابي اشوف
شوي ولا يركب المايك..هلا عيوني..هلا حياتي..صوتك يجنن..ما تخيلته كذا
وانا اقول يا عيبااااه..حسافه اعجابي فيك يا شرير يا خاين يا غشاش( بقلبي طبعن)
ايه اوكي..خذي 0505
اهم شي الصفر...رحبو بالصفر
ويدق جواله ويرد باسلوووب يقالك رومنسي..هلأ وغلأ...هلا عيوني كيفك قلبي
( مسسسرع صارت عيوونه وقلبه)
وانا انقهرت وقمت اشششخخر بصوت عااااااااالي ابي اغثه..
وهو ما حولك احد..يقولها ايه هذا الخرتيت حقي
شارينه من جنوب افريقيا..تعرفي الوالد رجل مهم وعنده بزنز بكل مكان ومره كان عنده اجتماع بجوهانس برغ..وتعرفي انا كان ضايق صدري ورحت معاه اغير جو وشرالي خرتيت
انا خرتيت يا سيد قشطه يا جربووع يا غوريلااا( برضو بقلبي)
واسمعه يقولها قصص عجيبه..مره تصارع مع خمس دوريات عشانه كان مسرع
بالماي باخ حقته بس بعدين استسلمو و محد قدر يسويله شي
ومره كان رايح يطعس بالرينج روفر ويوم غرست طلعها باصبعه..منتب عاقل يا طرزان زمانك
ومره كان طفشان وركب الدباب وراح للبقاله وما قدر ينزل من الجمهور..والناس يصارخون فهد فهد تكفى نبي نظره..نبي نكحل عيونا بطلتك البهيه
ما قدرت اتحمل..انفجرت بوجهه..
ليت من يقولها يالكحيان..ويصورك راكب العراوي حقتكم ورايح تعبي مويه بالقوايل
مير يجدع بوجهي المخده ويقولي هششش
قلت انت اللي اص انت اللي اص
اصصص ولا كلمه زياده فاهم ولا لأ اص يعني اص يعني اص <<< يعنني شجاع و حمش
قال للبنت اوكي حياتي اكلمك بعدين عندي زحمه
نعم خير وش تبي
انت ما تستحي على وجهك...انت ما عندك دم؟؟ تلعب على بنات الناس لييييه؟؟؟؟
والله بنات الناس محد ضربهم على ايدينهم..بعدين انا واحد وقاعد اتسلى..ولا بتسويلي فيها الهيئه؟؟ تراني رجال واعرف الصح من الغلط..فكنا يرحم والديك
يعني تعترف انها تسليه
ايه اعترف ونص..عندك شي؟
ولا شعوريا صرخت عليه
الحين لو لميا ولا ريم ولا مشاعل اللي قاعدين يتسلون...وش بتسوي؟؟؟ وش بتقول؟؟؟
ولا الغلط للبنت وانتو اللي معصومين عن الغلط... يعني بس خواتك هم اللي عندهم اهل وباقي البنات طز!!!!
تعال وش دراك باسامي خواتي
وعيني ما تشوف الا الباب..ارررررركض وهو وراي يسبسب ويلعن
واهيت ذيك الليله بالشوارع مع هالثوب المخطط تسني بسه مشرده
لا صديق.. ولا رفيق...ولا طريقن اتبعه
وقفني الشرطي...وش قاعد تسوي
قلت ابد اتمشى اطلق رجولي.. ممنوع؟
لا مب ممنوع.. وش اسمك؟
قلت سعود..مدري عثماااان
طيب عطني اثباتك..بطاقه احوال رخصه اي شي..
قلت ما يغلى عليك بس والله ما عندي شي
ويجرني مع عتراي للقسم..وهات يا تحقيق..واسئله
وش عندك تدور؟
وراك تلخبطت يوم سألوك عن اسمك؟
ليش ما عندك هويه او اثبات؟
وشرحتلهم القصه الطوييله وانا اناشق ويالله يالله ابلع ريقي
والشرطي يكركر لا يا شيخ..مرره صدقناك كثر منها
قولنا وش تعرف عن القاعده؟
طيب ليش خايف ومرتبك؟
طيب متى اخر مره شفت بن لادن؟
وانا اصايح واقول الله ياخذ عمرتس يا لميااا
مير يجلسوني بكرسي وربطو يديني
ويسألوني وورا كل سؤال يقلعون سن من سنوووني وانا اصرخ
يمااااااااااااااااااااااا اااااااااااااااااااااااااا ااااااااااااااااااااااااه
7
7
7
بسمالله على قلبتس يا بنتي تعوذي من ابليس وقومي جبنالك من هارديز
ركضت للمرايه ولا كل شي طبيعي اشوى واسناني كلها موجوده الحمدالله
وانقز بحجر امي
يمه الحين انا مين بالضبط؟ عثمان ولا سعود؟
بسمالله عليتس انتي سوسو نور البنات وشمعه البيت..يا ويلي طار عقله بنيتي
طيب وين الحبه اللي عطتني ياها لميا؟؟
اي حبوب واي بلاوي وش جاها بنتي يا ناس
وتنخم بوجهي تفففففف الله يحفظتس من الجنون وشر العيون
تمووونين يمه بس وع لا تتفلين لو سمحتي يعني
وع عليتس محد يقول لأموه وع اثرتس تدلعين يا عنز
برب يمه بكمل وشوف وشصار وارجعلتس
لا برب ولا تيت قومي يلا وصلي المغرب ولا اشوفتس شابكه
ما دمرتس وضيع عقلتس الا هالزفت اعوذ بالله مقابلته اربع وعشرين ساعه
وراتس امتحانات وتخرج..يلا يلا الله يرضى عليتس
=====================
انه ليس مجرد طموح..وليس حبا" للعلم فحسب..
لكن رضا الله من رضا الوالدين
وامي مره زعلانه على وضعي وكل ما رحت اتشكى قالت قلعتك...كل ما جبت درجه شينه قالت تستاهلين هذا اللي يستهتر وينهبل على اخر ترم
يا رب ما احمل مواد..يا رب ان معدلي ما ينزل
يا رب مابي اقابل خشش الدكاتره مره ثانيه....يا رب اتخرج وافتك
العرض الشجري
