قالت قريت بناظرك سر الاحزان
*****واظن بأحزان الحياة نتشابه
طبع السكوت اللي فرضته على شان
*****تخفي معالم قصتك مع عذابه
قالت وزود هرجها جرح الابدان
*****زود على جرح الضماير كتابه
جتني تواسيني على غدر الازمان
*****قالت زمنا يا ولد وش جرابه
وتشكي علي قصة غرامه ولا بان
*****والحب الأول بس..ما أحد درابه
وتقول جرحه سببه اقرب انسان
*****وش عذب المجنون غير القرابه
الله عليك يابنت كان الزمن حان
*****بكشف الحقايق وخاطري لا تهابه
انا معي سر الحبايب بالأعيان
*****قولي ترى قلبي كل سرى به
ولاتسألين القلب عن ماضي كان
*****قلبي غدا مني بأول شبابه
تريثي مع خاطري بعض الاحيان
*****والله ما ادري خاطري وش حكابه
ضاقت علي كل الوسيعه بهجران
*****وتقطعت من فوق جسمي ثيابه
كشر بوجهي الياس والوقت مازان
*****لكن ذبحت الياس وكسرت نابه
لا ماقطعت عروق قلبي بنسيان
*****وان قال بأبنسى اعتبرها كذابه
صحيح عشت العمر كله بحرمان
*****بس الأمل عندي وضيعت بابه
انا خذيت من الزمن غلطة احسان
*****وان كان جتني بالمشاعر هلابه
وباكر تجي ذكرى حياتي بسلوان
*****مع شوق عمري لكل عين الصبابه
انا اشيل الحزن بألفين عنوان
*****واللي عرف لغة عيوني قرابه
وكانك قريت بناظري سر الاحزان
*****كلي فخر يوم المشاعر تشابه
المرهــــــــــــف
العرض الشجري
