السلام عليكم .. كيفكم ياشباب
عدت اليكم بعد انقطاع عقد من الزمان <= مايدري وش معناها بس يبي يقولها
ندخل في صلب الموضوع
من شوي كنت انا و المملوح عبادي صديقي ابو حبه خال في رقبته رايحين لمقهى الشلال نشيش
(اكيد بنشيش و الا بنلعب مصاقيل )
المهم سواليف انا وياه و مضاربات و اكيد الجلسه ماتخلو من النصب و الدعابات الي من ذا الراس الفاضي قال لي
يابو عزو ورا ماتسير علينا بالمنتدى تذب وجهك و تستبثر علينا شوي قلت ازهلها من خشمي اليمين قبل اليسار
عاد طلعت انا و ذبيته في مقهى ثاني و الله مدري عنه ذا الولد شكله خرب عقبي و انا رايح للبيت و كافخ طبلون
موتري الــ 430 الأبيض و اقلب في ذا الراس و اغفص يمين و يسار ابي تطلع معي فكره مالقيت قلت شكله
مافيه الا اني ادخل و اتفرج بس ماله داعي اكتب و اطول المسجل كنت مشغل عبدالله الصريخ يغني
كلم يقول الوقت ماطاع اسير ..
المهم وقفت انا عند كودو الي بامتداد التخصصي و انت جاي من الشمال و التفت الا جنبي لنكون بيج فيه اربع
بنااات خيال <= مهب منتدانا يعني انهم زينات) و كالعاده فكيت خشتي و طلعت سنوني الي كنها رصيف صادم
فيه واحد من الشباب و التقت عليهم و اسأل قلت بالله ذا الموتر كم موديله تعرفون واحد قروي ماقد شاف بنات
و يبي يحتك بأي طريقه و تنزل الملقوفه الي ورا الدريشه شكلها اول مره تروح معهم قالت هذا موتر هذي و تأشر
على الي قدام قلت انا طيب انتي يابطله وش اسمك قالت انا اسمي سوسو قلت طيب فرشي اسنانك على شان تروح
السوسه قعدت تظحك و بغنج <= امش يالمصطلح ) و اقعد اتميلح انا و ارز خشتي و اناظر بعيون كلها غزل و
حب و شوق و حنين <= الفيديو كليب ) قلت انا اقلطوا عندنا الماما مسويه شاهي و فطاير عقب الفطور ترا مهب
شينه قالت الي قدام و الله مشغولين نبي ندز <= لاحظ ندز ) للتحليه يقولون فيه موتر هناك يجنن يااااي قلت طيب
متى نشوفكم قالت الي قدام الثقل شكلها دبيه مره على شان كذا طلعت ثقل غصب قالت لااا ماله داعي .. عاد انا
انعفط خاطري و حسيت ان كرامتي طاحت بالشارع و رحت لحقتها و طلعت قرطاسه علك ابو طبعه ذاك الي
تسعبل على قرطاسته بعدين تصكها في ساقك بقووه و يطلع مثل الوشم المهم يوم لاحظت انا شي غريب انهم
لابسين ثياب قلت امش يالبنات و الله زاحفين و كذا من دون اي مقدمات لاحظت ان وحده منهم لها سكسوكه زيي
<= يعلمكم يعني ) و بالأخير و بعد كل هذا اللقاء الصارخ الجميل الدؤوب اكتشفت انهم من خكاريه العليا
و سكرت دريشتي و طولت المسجل و كان الشريط تعدا الأغنيه الي قبل شوي و صار باغنيه يازهور الورد مع قطر الندى
و دمتم سالمين <= دمتم سالمين و الا سلامتك
اخوكم الخطير*7 *t
العرض الشجري
