وين الدوا يا ذيب لا صرت مجروح!!!!

[شاعر الدرر]

لاهنت يالغالي ابخبرك بوضوح= العمر ما هو دوم ننهل نعيمه
ما ينفع اللي مثلنا يالخوي النوح= ولا يرجع اللي صار سلعة قديمه
راحت علينا في زمن كل سلتوح=اصبح ينادونه من ارباب شيمه
والله يابو ريان ما عاد من بوح= والضلع الاعوج صار له الف قيمه
شوف المغفل يحتفا به وممدوح= وابن الحمايل ظله اصبح نديمه
قتل المبادي صار ذا اليوم مسموح= وما عاد به مجني وهذا غريمه
هذا خفوقي يحترق من لظا الفوح= من وقت اسهل ما يكون الجريمه
ياذيب خبري فيك دندون طحطوح= تحل عقدتها ولو هي عديمه
ان قلت لي باب الامل دوم مفتوح= اقول ويش يرضي النفوس الكريمه
وين الدوا ياذيب لاصرت مجروح= تعجز خطاي اني اجيب الغنيمه!

المهندس الشاعر/ثامر الحارثي (شاعر الدرر)
23/12/1430هـ