يالله يالمعبود يارب الارباب
تجعل لسان الزيف مثْني ومعقود
وتحصـن لساني بيُونس والاحزاب
وتثبت اعبادك على الدين والجود
ياللي نسيت الحق واعراف الانساب
واللي تقوله شـئ ماهوب مسنود
شواهد التاريخ تحفظ على اكتاب
وفيها لكل الناس غايه ومقصـود
لما تقول ان الزمن كله اتعاب
يعنـي تعبنا ماله أيات مردود
الله أكبر يالدهر صار ينـعاب
وحنا العيوب اللي بنا مالها حدود
ولما تقول ان البشر صار كذاب
يعني قذفنا بعضنا قذف بحيود
ياهي مصيبه كيف تظلم ولاتهاب
والروح لله والجـسـد ياكله دود
ولما يجيك الضيف وتسكر الباب
يعني شحيح النفس والطيب مفقود
ومن هو تردا بالقرايب والاجناب
لابد مايصبح مـع الناس مضهود
ولما عـن الواجب تعذر بالاسباب
يعني ضعيـف الراي والعزم مهدود
لامن ضعف عزمك ترا الحظ ماطاب
ودنياك هذي كلها مابها فود
ولما تشكك بالصداقه والاصحاب
يعني يصير الفكر ناقص ومحدود
ومن ماصنعت اضحيت واهم ومرتاب
ومقيد ٍ عمرك للأوهام بقيود
ولما تعقب خلق ربي وتغتاب
يعني مشيت بدرب ماهوب محمود
تصبح بغيض الوجه والاسم نتاب
مكروه لامن غبت وان كنت موجود
ماهكذا الدنيا تشابه لـسرداب
الكون واسـع والمراجل لها فنود
خلك وسيع ابطان والصدر ترحاب
حتى تكون بصدر الامجـاد معـدود
وكلمة نعم خلك لها دوم كساب
والطيب دايم يم راعيه مردود
وخلك رفيق اللي تحلوا بالالباب
حتى تصير برافد الفكر مسنود
حي الرفيق اللي يناصحـك بعتاب
وان كان جاتك حاجةٍ جاك ويذود
وخل البشاشه من سنا الوجه تنساب
ماتنقص الا والله بقدرك تزود
وحذرا تفرق بيـن شيـخ وحطاب
الفـرق ديـن الله وراعيه محـسـود
وخلك كما ذيبٍ علـى راس مرقـاب
وابذل علـى دينـك ودنياك مجهـود
وان طاب وقتك طاب وان خاب ماخاب
باب الدعاء مفتوح ماهوب مسـدود
العرض الشجري
