لـو كـل ما فالبـال للناس ينقـال

[ورد الندى]

يا صاحبي .. ياللي لك القلب مدهال
في داخلي ضيم وهمومٍ طليقه
لا تنشد الخاطر !! ولا تنشد الحال !!
مـا ودي أنها تنكـشف للخـليقة
لـو كـل ما فالبـال للناس ينقـال !
.,. ما شفتني صديت من كل ضيقه !!
طاريك .. نادا الشوق بقفاي وقبال
وتراجد بوسط الضلوع الدقيقه
ليته كثر ما حطّ في خافقي شال !!
على الأقل ما شلت شيٍ ما أطيقه
صابر ولو قلبي رعى فيه غربال
ما كني أسمع في ضلوعي شهيقه
إن رحت في دربك وليل الجفا طال !!
القلب وافي ... والمشاعر رقيقه
وإن جيت ودم فرقاك من بيننا سال !!
الشوق وافر ... والعلاقة عريقة
فالقلب لك حشمه وقدرٍ ومنزال
مير بغرامك جفّ .. ما بلّ ريقه !!
شف أنت مبعد .. مير عندي وتختال
وأقرب كثير من الشقيق لشقيقه
من غبت ضاقت بي من الجال للجال
وطاح الجمل والحمل عيّا يطيقه
وش عاد لو شفت أزرق الدمع همّال
دامه سفير الحزن وأسهل طريقه
وما نزّل الدمعة على خد رجال
غير الجروح المبطيه والعميقة