يابعد كل الرسايل هالرسالة
توها ماكملت عمر الطفولة
طفلةٍ فيها العطر ياطول باله
وده يفوح .. ويبوح .. وهي خجوله
مثل طبع اللي كتبها من دلاله
في مسافات الزمن واربع فصوله
دالهٍ لاجيت اشوفه .. شاف حاله
ماتهيّا منه لو نظرة عجوله
صار عندي راس مال .. وراس ماله
ضحكةٍ معها عقل بس مهبولة
لاضحك في مسمعي كني قباله
كني اقطف ورده وعقده ولوله
واحبس بعيني خيالٍ من جماله
وارفع لسمعي يدي كنّي باطوله
وارسم لزوله شكل يشبه خياله
في خيالي ولاّ أنا ماشفت زوله
كل ماحرّمته .. القاني حلاله
وكل ماعنه ابتعد .. قربت انوله
كنت افكر مرّة القى بداله
دام وصله صعب .. والأصعب وصوله
قلت : يالله نفترق .. كلٍ وفاله
قال : يالله .. قلت : لحظة !! من يقوله؟!
أطري الفرقا وانا مامن صماله
وادري ان فرقاه ماهي بالسهولة
كم عذولٍ قد عذلني في وصاله
ومن عذلني قلت له نفس المقوله
مايخلي حالة الرجال حاله
غير بنتٍ في مواقفها رجوله !!
للشاعر
رشيد الدهام
وتقبلوا تحياتي ،،،
العرض الشجري
