ردوا الخبر ياهل الركاب المراويح=وخذوا تحياتي وصادق سلامي
للّي دخل للقلب من دون تصريح=ودّه تمكن في صليب العظامي
لأجله سهرت وولعن المصابيح=أسهر وكل الخلق دلهى نيامي
واون لاهبت من دياره الريح=وإن لاح براق بوسط الغمامي
وأفكار عقلي ضاويات مساريح=تسابق الأشواق والقلب ظامي
لولا الحيا لاأطوّح الصوت تطويح=ماهمني لو لام اهل الملامي
وأقول ونّوا ونتي يامجاريح=على وليف الروح بدر التمامي
ودّه سرق قلبي وسيّحه تسييح=هو غاية الهقوه وغاية مرامي
ياورد ياريحان يادوش ياشيح=ياند ياعوده وفل تهامي
أنا أشهد إنك شيخ كل المماليح=هذي حقيقه ماعليها كلامي
يحفظك من له كل حمد وتسبيح=سبحانه إسمه فوق كل الأسامي
العرض الشجري
