الصبح تصحى ..
ولما اصحى انا لازم آخذ شاور ، هيد اند شولدرز أكيد عشان حساسية فروة الرأس (اما فروة كثر منها ) ..
انا عادة اعمل تنظيف للوجه وآخر صابون لقيته جابته لي إختي دلال من فونتين فرانس وهو عبارة عن كريم برغوة (على وزن ادغام بغنة) ، وكنت من زمان اعمل التنظيف عشان الحبوب (اللي راح مخه بعيد يرجع ثاني بليز) بعدها صرت اسوي تنظيف عشان البثور ، بعدين عشان البزور ، وامهم .
طبعا الإشاعة اللي طالعة على معجون أسنان (كلوز أب) ضرتني كثير ، وهي ان المعجون ما يستخدمة الا الشاذين ، ورغم ان هالإنطباع مهو موجود برا ، الا اني حاولت اتعرف على السبب ولقيت انه بسبب دعايتهم في تلفزيونا ، فالشركة متعودين يقدمون المعجون على انه منتج شبابي (ابيض واسود) والعيال والبنات يقربون من بعض (فيري كلوز يعني) ويقزون اسنان بعض ، ويحبون بعض بعدها ، وعشان ممنوع عندنا ، خللوا العيال مع العيال ، وصار اللي صار ، وبطلت من وقتها استخدم هالنوع وراحت اسناني وطي ، وتكونت طبقة (البليك) وللقراوا اقول انها مالها علاقة بالبلك .
فطوري.. عصير برتقال فكة الريق ، والبرتقال اللي تشوفونه في اسواق الخضار عندكم ممكن يستخدم عصيره كموية بطاريات ، لأن اللي ما ذاق عصير برتقال تروبيكانا ما قد ذاق برتقال ، ممكن فول ، بس يكون كاليفورنيا ، ومزاجي الصباحي يتعدل بأميريكان كوفي ، بلاك نو شوقر ، وأحيانا وليس دائما اخلطه بكوفي ميت (يا بعد حيي وميتي ) .
ملتزم بالدوام ، يعني ثمان بالزبط انا على المكتب ، يسموني في العمل مستر بيق بن ، وعشان توصل ثمان يابوالشباب لمكتبك عندنا في الرياض لازم تطلع من بيتكم سبعة والا سبعة وربع ، وتكون معاك سيارة محترمة عشان تعامل بإحترام على الطريق وما تتعرض لمفاجآت الطريق ، انا موالي للنكولن ، منذ ان كان عمارة تسير على اربع في الثمانينات والى اليوم ، اودي الأولاد لمدرستهم ، اللي نظامها امريكي ، لدرجة انهم يودعوني وهم نازلين باي دادي ، وابوي قراند با ، وطبعا الشاكوش يفق خشته ، لأنه مستكثر الهاي تكنولوجي عليه هو وارد الظهيرة .
اليوم اتصل علي في الطريق صديقي ابو هشام ، والموتوريلا الجديد فيه ميزة انه ممكن يشعرك بالمكالمة بس ما يزن عليك ، هلا ابوهشام صباح الإشراقة ، عازمني على الغدا ، سم أنت تآمر علي أمر ، في ستيك هاوس وحدة ونص sharp .
في العمل .. الهيد إيك المعتاد ، اضطريت اطلع عشان اشتري هدية لعيد ميلاد ولدي بسام ، فكرت اجيب له بلاي ستيشن جديد ، وبعدين رحمت الباقين ورحت لتويز آر أص وشريت لديمة باربي وزوج باربي بعد ، ولنايف مجموعة بيكومون كلها ، ولحسن حظي كان باقي يومين وينتهي تاريخ الأميركان إكسبريس .
على الغدا مع أبو هشام ، من زمان ما شفنا بعض ، طلب مني التسجيل في نادي الإنتركونتيننتال مرة ثانية ووافقت ، وبعد الغدا اخذت لي علبة علوك تشيكلس عشان الهظم ، رغم اني شربت نص لتر دايت كوك بس ما فاد .
المساء مالي خلق على أحد ، رميت نفسي على الووتر بيد ، وخذت لي بانادول ، صحيت ونزلت عند الأولاد ، قلبت القنوات ، وفتحت الأوربت ، انا أعز برامجهم ، اميريكا بلس خصوصا ، ومسلسلاتهم ، فريندز ليت عندي اصدقا مثلهم ، وباي ووتش (أحيه) عساهم ينقذوني يا رب ، وساينفيلد ، بس الأولاد دايم يبون ديزني تشانال وانا ديموقراطي .
أخبار السي إن إن اليوم تغطية كبيرة للميديل إيست ، الصدامات الفلسطينية الأخيرة ، وصور الجنود الإسرائيليين وهم يردون بالرصاص على الأطفال المساكين ، قالي بسام انهم في المدرسة يتكلمون عن مقاطعة المنتجات الأمريكية ، وقالت ديمة ان معها قائمة بالمنتجات الأمريكية ومنتجات بديلة .
عاد انا قمت اقرا وانا متأثر بالوضع عموما وبحماس الأولاد ، وبعد القراءة اكتشفت انه من السهل مقاطعة المنتجات الأمريكية ، اذا حنا سكنا في أرطاوي الرقاص (راجع الخريطة ) .
العرض الشجري
