يومياتي معه قهوة الحريم

[ملاك وبس]

هذا الله يسلمكم أنا عايشه دور في مسلسل خليجي >>>>العب دور حرمه عاقله وسنعه
قولوا ليش ؟؟؟؟ انا اقولكم ليش اختي عندنا ولدت وجابت ولد وهذا احنا ودع واستقبل
عاد امي لازم ترزني قدام الحريم علشان اصير حرمه سنعه على قولتها خلاص انا تخرجت ولازم اخذ دور الكبيره في العائله
عااااااااااااد الله يسلمكم طلعت خبله مع مرتبة الشرف وانا قاعده ارز نفسي ويقالي كاشخه وأوزع الحلى
فجأأأأأأأأأأأأه وبدون مقدمات سقط الحلى مني وتناثر في ارجاء الغرفه >>>لاحظوا بس سقط وارجاء تحسوني في حصة تعبير
فتناثر وجهي معه وحسيتني صغنونه خبله وانادي الشغاله علشان تجمعه وترتب المكان والف وجهي بسرعه الا انا طع في الباب مادري ليه احس الباب كان بعيد وهو قريب مني وشوفي انواع الالم وانا اسوي الوضع عادي ماحسيت بشي وكان هذا في اليوم الاول من الاستقبال
ثم صار اليوم الثاني وقلت يابنت الى متى بتصيرين خبله ولاتعرفي تقهوي الحريم
واجيك متحمسه واجعد شعري واكشخ الموهم طاااااااااااااح وجهي بالنهايه هذا بنت جيرانا انا مجننتها ودايم اتخانق معها واخذه راحتي معها ودايم اصيحها فاصطادت في المويه العكره بنت اللذين يوم دخلت على الحريم قالت على بالك حلووووووووووووووووووووه كان شعرك شعر عبده هنا الحريم ضحكوا ..انا قمت اضحك من الفشله وطاح وجهي للمره الثانيه على التوالي وقمت اتهددها واتوعدها بالنظرات ويوم اطلعوا الحريم يانا كفرت فيها طبعاً اهلها مخلينها سبيل عندنا كل يوم مطيحه عندنا يقال تلعب مع بنات اختي
وصار اليوم الثالث وحرمت اجعد شعري وخميت القهوه يقال بصبها على الحريم انسى بعضهم واصب لبعضهم والوحده تقعد ساعه ماده فنجالها ومره اصب باليد اليمنى ومره باليسرى وامي انواع الفشله مني وهم بعد بايخين مايشبعون قهوه
ولكن بعد جميع التفشيلات والمواقف البايخه قررت اختفي عنهم يومين اعيد تأهيل نفسي ووضع بنود بالطرق السليمه في صب القهوه والثقل وعدم الرجه ثم الظهور مره اخرى على الساحه حتى يتم تخطي هذه المرحله
وسلامتكم اليوم احسن ماطلعت للحريم هم الخسرانين >>>>لاياشيخه ماحد جاب خبرك