جاوب سؤالي ياسود الوجه يالليل** وضح النويا كيف صارت قضيه(من اشعار البحر الميت)

[ان وفيت]

ساقت مشاوير الشقا وأردف الليل = سريت ودروب السهر سرمديه
أزريت أسوق الهم وأحط وأشيل = وتعبت أكابروالمواجع نــــديه
الحيل مل من التعب مابقى حيل = والجفن مــاله بسهر مقدريه
البهذله...والمهزله...والغرابيل = أبطال وسنين العمر مسرحيه
الهم..والحرمان..والحزن والويل = ضيوف وجروح الوفا شاذليه
والصمت والهوجاس بوح التعاليل = والخوف مسرى والليالي مطيه
يالله عسى درب السنع بالمقابيل = والا الليالي اللي مضت جرهديه
حر(ن)كفخ واستأسرته المحابيل = وعقب السما الرحبه هوى للوطيه
حر(ن)غدر فيه الزمن والمداخيل = مقرود وكفوف العطايا رديه
غلطة عمر منها جنيت البهاذيل = ذنوب غيري حطها الله عليه
غلطه ودحدرها القدر بالمحاصيل = ورضيت بالمقسوم غصب عليه
تناقلتها شلة القال والقيل = وحطو عليه لين صارت قضيه
وقامت تناهشني رخوم الرجاجيل = اهل الملامة والعلوم الرديه
اللي تجيك اخبارهم بالتفاصيل = ويحرفون الهرج عن سوء نيه
بالله قلي ياسود الوجه يالليل = وضح النويا كيف صارت خطيه
قل لي من اللي ضلل الحق تظليل = ومن علم الوافي يخون بخويه
ومن بروز الاوهام خدعه وتمثيل = ومن طلسم الواقع وخان الوصيه
من قال لي دربك مهود وتساهيل = ومن علم الضحكات تمشي عليه
من كفن دموع الوفا بالمناديل = ومن هو جزا الحسنه بمليون سيه
اللي قتل حلم الضلوع المناحيل = وقال انقتل فيك العوض والبقيه
جاوب سؤالي ياسود الوجه يالليل = وضح النويا كيف صارت قضيه