دايم دايم دايم ها الموضوع أفكر فيه *** مشغلني ذابحني ممردغني قاهر ني رافع ضغطى ليل نهار ونهار وليل ليلة الدخلة 0 وش بسوي في ليلة الدخلة ؟ وكيف بتصرف ؟ وشلون بتكلم ؟ ووش بقول إن تكلمت ؟ ووشلون بتصرف ؟
أسئلة كثيرة ومعقدة أفنيت سنين من عمري أفكر فيها وابحث وادور عن أجوبة لها وسألت أهل الخبرة بس لين اللحين ما عرفت شي،خلوني أقولكم وش قصدي من القصة طبعاً العلم عند الله بس هذي بعض تخيلاتي وتصوراتي للي بيصيرلي ليلة دخلتي
ا:خبطت اقصد خطبت وبعدها تملكت حلو ، وجا يوم العرس وسبحت ( سباحة استثنائية بالعادة بس في الأعياد ) وفركت جسمي با الليفة وفرشت سنوني ونعمت وكديت قذلتي وحددت شنبي وقصصت أظافري ( علشان ما امخش ) ولبست صراويلي وفنيلتي وبعدها طقيت لك ثوب العرس الكشخة ولا أرضا بأقل من ثوب الدفة طبعاً عريس وبعدها صكيت القلابي وبيحمر وجهي كالعادة ولبست الطاقية الزري ( وعععع) وفوقها شماغ العقل ابو خمسطعش وفوقة عقال متنتف وأخيراً لبست آخر قطعة وهي البشت واكيد بكون متسلفة من واحد من الربع أما بفصل واحد بهاك العدة علشان ليلة معصي0 وبتجي الوالدة الله يطول لي بعمرها ( قولو آمين ) وتبخرني وتصبصب علي من أنواع الاطياب وبتقول " ما شاء الله عليك حارسً يحرسك يا وليدي كلك ملح وقملة اقصد قبلة وبتجي جدتي سوير وبعد ما تبكى ( الفلم الهندي زي العادة ) بتقول هي بعد " ولااااااااك يخزي العين شو ما احلااااااااك يا بيزاا "( حشى وراها قلبت لبنانية ؟) لا بتقول " مبروك يا عميري والله عشت وشفتك معرس عقبال ما أشوف عيالك معرسين ) وطبعاً بيخلل كلماتها هذي دموع ومشاهق ووقفات لمسح الدموع با الشيلة ثم المتابعة وبينقصنا صوت ربابة علشان يكمل المسلسل يعني شغلة المهم تبخرت وركبت في سيارة اخوي ( كراسيدا 95 جي ال) اكشخ موتر عندنا طبعاً بركب ورا وأبوي بيركب قدام ولو ابو العريس وادهرت الصوالين تحمل باقي الحريم وما يحتاج طبعا صياح البزارين ولجتهم هذا بيركب قدام وهذا يبي يجلس عند الدريشة وذوليك قالبين المرتبة الأخيرة فرع لملاهي الحكير وأنواع الصياح وذيك تجلد في البزر علشان يوقف عن الصياح ( هذي اللي لين اللحين ما فهمتها عجبي ) !سرت القافلة أو الموكب وبدو طبعا دحيم وعبيسة يظربون بواري بسياراتهم ( ددسن 85 وهايلوكس 88) وعلى بالهم يسوون لي زفة وفضحونا بسياراتهم ( من زين السيارة اللي عاد انا راكبً فيها ) والقراوى دحيم وعبيسة يحسبون لا صرت في موكب عرس يحقلك تقطع الإشارات وتعاكس في الشوارع وتسب وتلعن في اللي ما يفتح لك الخط 0 انا أصلا من شفت ضرسة اللي في الواجهة طايح ويقولي توة لبان وانا غاسلً رجلي منة وصلنا للقصر واكيد انه بيكون في حي النسيم لاني طفران وماني قد قصور الأفراح اللي بالعليا بيعرض اخوي بسيارته عند المدخل وبيجون يركظون أخوان العروس يفتحون لي الباب ( هين كلها شهرين ويتوطون في بطني ) 0بنزل وبسمع الخنبقة المعهودة " مبروك مبروك منك المال ومنها العيال " بيجي ابو العروس يسلم على ابوي ثم علي وبيجون اثنين شايلين مداخن البخور وبيغمتوني بريحتهن واكيد طرف شماغي بيغط داخل الدخنة وبيحترق زي العادة0 مع ها الاجواء الحلوة والريحة الزينة بيهجمون علي الناس ويحبحبوني وبلقى أنواع السعابيل على خدودي عقبهم وعقال بيطيح اكثر من مرة وطرف بشتي بيوطونة لين يقلب لونه وكل هذا عادي ومستعد لة0 عقبها بيمسكني ابو العروس مع يدي تقل اني أعمى ما شوف دربي وبياخذني الى الصالة وبيجلسني على البيست ( طلع ديسكو مهوب قصر أفراح)بيدهرون المبزرة بالقهوة والواحد منهم لاجا بيصب لي الفنجال بيقعد ينتفض ويرجف من الرهبة ولو هو جالس يصب للعريس !بيغثوني قهوة وشاهي ومتأكد انه بينكب فنجال قهوة على ثوبي من واحد من ها المبزرة اللي يصبون 0 عادي حصل خير وعقبها كل شوي جايني واحد يسلم ويحبب فيني وابو العروس بيسوي فيها فاهم وبيقولي هذا فلان وهذا علان مو مشكلة بمشيها لة 0 بعدها بيجي دحيم وباقي العيال يستهبلون علي عند ابو زوجتي ويتميلحون علي ويعلقون على شكلي ويضحكون ويستخفون دمهم بس برضو بعديها لهم 0 في اللحظات هذي اخوي بيكون في مطعم يا مال الشام يشتري لي ولزوجتي عشاء وغالب الظن بيكون مشويات وخلافة ولايهون عصير ابو طبقات 0 وبعدين بياخذ العشاء ويودية لشقتي ويحطه في المطبخ بعد ما يغطيه بسماط0 في القصر بيقوم ابو العروس ويرفع راسه وكرشتة وبينسف شماغة ويقول بصوت عالي للضيوف " ياالله تفضلو يا جماعة على قل الكلافة العشاء جاهز وهذي والله الساعة المباركة اللي خلتنا نشوف وجيهكم الطيبة 0 بيقوم ابوي ويروح عني بعد ما يسلم علي وبيجي ابو زوجتي وبيوشوش في أذني وبيمسكني مع يدي مرة ثانية ( صار يمون بقوة ) وبياخذني غالباً مع الباب الخلفي للقصر علشان نوصل للغرفة اللي عروستي بتكون جالسة فيها ( سندريلا على غفلة ) 0 طبعاً بتجيني ام الركب وبحس بدوار البحر وحرارتي بترتفع والعرق بيبدا يصبصب 0 وصلنا للغرفة وفتح الباب بعد ان يقول العبارة اللطيفة " يا هيش يا هيش " 0 بينفتح الباب وبيدخل وبيجرني معة ووجهي بيكون لونة ازرق + احمر واتصور انة بيطلع في وجهي لون جديد بس مدري وشو بالضبط 0 بدخل وبلقاء عروستي واقفة ولابسة الثوب الأبيض والشرعة على الرأس وماسكة باقة ورد بيدها واكيد إنها بتكون منزلة راسها " طبعاً هذي أول مرة أشوفها " واكيد إنها بتعجبني طبعاً " بنت " 0 المهم جنب المخلوق الرقيق اللي هي عروستي بتكون فيه وحدة واقفة جنبها من فصيلة الثديات زينا بس اشباها شرانية وبتناظرني بقرف وودها تزنطني ليش ما ادري هذي هي حماتي ام زوجتي 0 بجي مدرعم وبسلم وبعدين بروح لحماتي واحب راسها والله يعيني على ريحة الحنة اللي براسها 0 بجي عقبها اسلم على زوجتي وبتلخبص مدري احبها والا لا ؟ أخاف احبها ويجلدني أبوها بس الظنة منيب حابها بعدين خخخخخ 0 بيطلعون أمها وأبوها بعد ما تقعد تقرقر أمها با الحكي اللي ما لامة داعي وهو " حط بنتي في عيونك " وش قالولك فاتح فندق في عيوني يوم اني أحط بنتك فيه ؟ والا خذ هذي " ترا بنتي هذي أغلى ما عندي وأبيك تحطها بين عيونك " وهي عندها غير ذا البنت خمس وكل ما أعرست وحدة قالت نفس السالفه !0 طلعو وصرنا لحالنا انا وزوجتي وبتمر الثواني كنها أيام علينا مغير ساكتين هي تعفط في ثوبها وتكسر أصابعها وانا ما غير أغير شخصية الشماغ مرة انسفه منا ومرة منا والتالية بصك اللطمة 0 بيدخل أبوها علينا ويقول ياالله بتروحون لبيتكم والا بترقد ونفيذاا وهو يضحك ( على بالة ينكت عادل إمام على غفلة ) 0 أكيد بضحك وبقهقة مسموعة مجاملة لة هو وكرشتة اللي تقل كيس شعير وبقوم انا وهي بتلبس عباتها وبنطلع لسيارتي واكيد بتكون الكريسدا حقت اخوي بيمدية رجع من المطعم ولبق سيارته في الكراج وخلا مفتاحها عليها 0 شغلت السيارة وجت بتركب زوجتي وبتجلس ساعة بحلة بعمرها هي وثوبها المنتفش ووردها اللي معها وباالاخير بينصك بابها وبدق الريوس واطلع من القصر 0 متأكد في اللحظة هذي دحيم وباقي العيال بيكونون في سياراتهم وبيلحقوني على بالهم بيصرقعون بي ويبهذلوني ! وبيوقفون جنبي عند الاشارة والله من زين الأشكال اللي يطالع ويضحك علي ودحيم بيزيد على صوت المسجل وبيرقص سامري على بالة اقلاع بس بعطيهم اشكل وبيروحون في حالهم0عاد حنا مازال الصمت مخيم علينا في السيارة سوا صوت بعيد بالعافية يسمع خارج من سماعات السيارة وكان صوت بشير شنان يغني وصوت المراويسوفلة الحجاج والعالم الله اخوي نسى يطلع الشريط لانة مجنون بشير 0بسوي فيها عاقل وبصك المسجل وبلتفت على المدام لعل وعسى يبدا الكلام بيننا طبعاً ما راح أشوف شي غير السواد وبقول مو مشكلة في البيت نسولف على راحتنا 0 وصلنا البيت وفتحت باب الشقة وولعت اللمبات وقلت لها تفضل يا عروسة نورتي بيتك ( أسلوب صح ) وبتدخل بحياء ممزوج بدلع على شوية شطة ( صارت شورما مهيب آدمية ) 0 فصخت العباة ووقفنا في الصالة وريحت العشاء فايحة في كل مكان وخصوص الثوم مع اني بكون محرص على اخوي قلهم بدون ثوم بس ياالله 0 بقوم افرجها على الشقة مع العلم إنها قد جتها قبل يوم انها تجيب خلاقينها وعفشها وكالعادة بكون مسوي جرد على كل شي جابتة عقب ما يطلعون من الشقة خخخخخخخخخ بعد الفرجة وبكون اتميلح اثناء الفرجة واحط تعليقات مظحكة محاولً استخفاف ثقل دمي 0 رجعنا للصالة وانتصينا فيها واقفين ! ياربي وش نسوي اللحين ؟ بقول اوووة العشاء نسينا العشاء ههههه وبضحك كذا هههههه ( يا شيني ) بروح للمطبخ أجهز العشاء وفي اللحظة هذي بتتكلم أخيرا وبتقول : آاااا لا لا استرح انا اجهز العشاء 0 بكل تأكيد كل صواميلي بتنحل بعد حكيها ذا وبتنح شوي وبقول : لا والله ما تروحين الليلة ليلتي وبسوي كل شي بنفسي انتي عروس ما تسوين شي انتي بس تآمرين ( آاااة يا مصلحجي لك غرض ) بدربي دميجتي للمطبخ وبكون لين اللحين ما فصخت بشتي من زود الثوارة وقلة الدبرة 0 تعشينا وكني أشوف شكلي وانا أتعشى مسوي نفسي فاهم وآكل با الشوكة والسكين وأنواع الحوسة والمطرسة وكل ما جيت امسك شي با الشوكة طارت من صحني واستقرت على فستانها 0 وكني اسمع صوت المماطق اللي بيطلع من اثمي وانا آكل الحمص وبيبقى شوي حمص على أطراف خشتي زي العادة وزين ان ما طال خشمي شي بعد 0وهي بتآكل اكل نمل ابد بتقعد تقطع من ذا الخبز وتاكلة من زود الحياء ( أو يمكن بتحوم كبدها من طريقة أكلي ) 0 وجا وقت العصير وبشرب ابوة كلة وبقعد اتفنن بشرب آخر قطرة في الكاس با الشفاط وبتطلع ذيك الأصوات المزعجة ( جغغغ غررر جغغغ) 0 الحمد لله عاد العشاء وخلصنا وضفيتة ومعد أشوف قدام عيوني غير زقارة طالعة من بكت مالبورو ابيض تناديني تعال تعال يا شاطر بس المشكلة لا البنت ولا أهلها يدرون اني أدخن أكيد بكون كاذبً عليهم وقايل لهم اني مبطل التتن 0 بس اللي براسة شي بيسوية بقولها " اوووة نسيت أوراق مهمة في السيارة وبروح اجيبة بس دقيقة وراجع "بطلع وامخمخ على هاك الزقيرة وبرجع وبتفاجأ انها لين اللحين بفستانها ؟ طيب وبعدين ؟ بنقضي الليل وحنا مشخصين بثيابنا انا ببشتي وهي بفستانها بفكر وافكر بطريقة المح فيها لها على انة خلاص عاد يا الله 0 بنقابل التلفزيون شوي وبعدها ببدا اتثاوب ( يعني فيني النوم ) 0 ان كانها ذكية فهمت ، بس أحس ان زوجتي بتكون غبية فعلشان كذا فكرت بطريقة ثانية ألا وهي بقول لها " ما ودك ننام " ما فية باالوجة عدل 0 تبي تتلخبص البنت وبيقلب لون وجها لعدة أشكال
و بالأخير بتقول " تونا بدري هذانا نسولف " بعدها عاد 000000تدرون وش صار
هههههههههههههههههههههههههههههههههههههه
الله يرجك ورب البيت اني مسجلت الا عشان اعلمك اني اضحك
لا من جد في راسك فتق
بالله كمل والا شكلك تحتري اللي انت سرقت منه الموضوع في المنتدى الثاني يكمل وتورطت <<ذيب يبي يخليه يكمل بسرعه
بدر الشووووووق ياهلااااااااااااا ومرحبااااااااااااااااا بوزير الدفاع اسفرت وانورت والله ولك وحشة وشدعوة كل هذي قطاعة وبعدين مثل ماقلت ياكثرهم وماحد رد خخخخخخخخخخ
وانت فلبيني اسود كيف تجي ماني عارف بس مشيناها المهم احرجتني والله والضحكة دوووم انشالله
بس ها لاتعلم احد اني سارقه بيني وبينك اوكي
اما باللنسبة للي صار بالتلفزيون(للكبار فقط)خخخخخخخخخ
وابشرك جدتي اللبنانية سويرة زعلانة منك كتير كتير تقول هي الي تقوله مو انا تقول مالك داعي كثرتي ملح بالفتوش وكثرتي عجين بالكبة
هههههههههههههههههههههههههههههههههههههههه
ليـــــــــلـــه الدخـــــــــلــــــــه>> لــلــكــبــار فــقـــــط<<
العرض العادي
