قصه حلوه

[king4arab]

في زمان قديم مغبر
عاشت بهذا الزمن..قبيلتين..قبيلة المهابيل..وكان قائدها اورابورا....وكان يقال لي اورابورا يوم هو صغير ..يااوربورا شب النار..يااورابورا شبه..


والقبيله الثانيه..هي قبيلة الدلاخه..وهي ماخوذه من دلخ..صار غبي..فهو دلخ..ويرجع اصل هذه الكلمه ..الى شرق الدنمرك جنوب الهند الشرقيه طريق الأفلاج عند مطعم الفارس

وكلمة الدلخ والمهابيل..تصب معانيها..في صحن واحد..الا وهوا الدلاخه..مجموعه في قوله مستدلخون..

كانت هالقبيلتين..حبايب..وش حليلهم..ابد مايتهاوشون على مواقف السياكل..ولا عمرهم تلاقطوا وتناشبوا الشوش عند بقالة البركه((سابقاً))قرطبه حالياً..

واقترحوا اقتراح ..فيما بينهم..انه يخلون واحد يكون قائد هالقبيلتين....وقعدوا يدورون من هو اكبر دلخ ومهبول موجود ..

و ماتعب القوم من الدوران..حيث وجدوا اورا بورا ..اكبر مهبول مر على تاريخ المهابيل

طبعا..اورابورا..كان متوقع اختياره..حيث قال ذات مره ... كن دلخ تعش حياتك هنيئا...
واذا زعل يقول وشوووو هيدااااااااااااااااااااا

استلم اورابورا حكم القبيلتين..وصاروا مايحتاج...اقوى ناس في ذلك العصر

حيث اشترك فريق البلوت في دوري الاستراحات العالمي..حصل على المركز الأول..وذلك بفضل اللاعب الخطير..عـــــزه..حيث كان اذا ربع ولعب التسعه ولعب اللي من الفريق الثاني الولد تصير لعــــــزه بالغصب (يعني خلوها على الله احسن)

وايضا شاركوا بدوري الدرجة الممتازة للكيرم..وبدع فريق الاعب الشهير كوغــه..حيث اشتهر بحركته الشهيره..بتسقيط الخمسين مع طباقته في آنن واحد..واطلق على هذه الحركه اسم..اطلق سيقانك للريح..

ومن ناحية الفتيات فقد اشتركت..النوير((اكبر بياعه في الافلاج)) النوير من قبيلة الدلوخ ..بلعبة السلم والثعبان فئة فتيات..وحازت على المركز الأول

خلاصة القول...انه ازدهرت التجارة والوناسه في عصر اورابورا لفترة من الزمن.......ولكن ومع مرور الأيام...

بدأ اورابورا..يكثر من حركات الأستهبال..ويتأمر على بعض العيال..
حيث ورد عنه انه كان ذاهب للبقاله ..و لمح بعض الفتيات يلعبن ام ثلاث..جا وحاس عليهن..

وايضا...منع لعب الكيرم اثناء الليل...و اصدر قرار..بمنع دخول السياكل المظلله..ويذكر ان ساليش قد قام بتظليل سيكله ..وذلك لأستخدامه في تهريب العلوك..

وكان لي اورابورا أخ اصغر منه..قليلا..يتمتع بطول القامه ..حلو المظهر..وخشته تظهر عليه ملامح الدلاخه..

وكان اذا شافته الفتيات يغمى عليهن من شدة فتنته.....انه الزير رطرط..

في ذلك الوقت من حكم اورابورا للقبيلة..كان الزير رطرط..غارقا مع الفتيات ..ولا هوب يم احد ..وكان عــــزه يقوله ..: كل البنات بتحبك ..كل البنات حلوين..طبعا ياسيدي يابختك ..الخ

وذات يوم..لمح اورابورا..سيكل ساليش....فانطلق عليه وصدمه ..واخذه وحلته ( رماه ) من فوق السطح..

وصل خبر ماحدث الى ساليش..فغضب ..لدرجة انه كان واصل المرحلة الأخيره بشريط درايفر اللي بالسوني..وفصل السوني بدون مايحفظ المرحله ( لله درك يا ساليش اذا غضبت ) وكان جالس يعسل

وانطلق الى اورابورا ...والشرر يتطاير من عينيه...وكان مخربها..لدرجة لو طبوا عليه اربع باكستانيه لجلدهم..

قال ساليش لي اورابورا..: خير يابو الشباب وش فيك على سيكلي ..

اورابورا : اقول ليش ماتعقل ..تراي انا الحاكم ..قسم بالله لا امحطك بخوص النخله انت وخشتك

ساليش : ياخي حاكم ايه عادي ماقلنا شي..اما مسألة انك تقربع سيكلي معصي ....وين سيكلك ابخربه..

اورابورا : بدررري على امن جابتك ...كان فيك خير سو شي

ساليش : اقول ..ترى مهوب من صالحك ..ترى ابي أسدفك(( اضربك)) بلي هالمعسل هاللي بيدي

اورابورا..: انا بمشي وكانك رجال سو شي ..

ساليش..: اقول تعال كلمني هنا...والا تعال ضارب ..لا تلقيني ظهرك








اورابورا : ياربييه ياذا البزارين ..يالله بس ضف ضف ..( واستدار اورابورا )
ساليش : التفت علي تراي ابضاربك ..ولا ابي اضربك مع ظهرك...وابي اغولك من عند رقبتك هاللي تقل رقبة عنز..

اورابورا : اها بس كل تراب

ساليش : حسنن...خذ لا بارك الله بذا الخشه ..

ويمحطه من عند ضهره ويغوله بلي المعسل وينقطع جواله قصدي نفسه ويخر صريعا
ساليش : تفو على ذا الخشه ..قايلك اني منيب امزح....يؤ شكله مات صدق...ابهج ...

في تلك الأثناء..وبينما حدثت تلك الهوشه...كان الزير رطرط وصديقه الصدقي ابو عــــزه..يلهوان مع الفتيات..ويشربون كؤوسا من الببسي ....

وهرب ساليش الى اهله..فعلم ابو ساليش بما حدث وقال له : لقد وهقتنا يا ابني..لسوف نتوهق توهيقتن كبيرة..

ساليش : لا عليك يا أبي..سوف نصرفها...والتفت الى اخيه صرصر ..قائلا : مارأيك بذلك يا صرصر..?

كان صرصر مبتسما ..

قال صرصر..لا عليكم ...سوف اتفاهم مع الزير رطرط لأنه صديقي..ومسلفه يد بليستيشن ذات مره..

...

وصل خبر قتل اورابورا الىرطرط....فلم يصدق..وبدأ يناقز من شدة الحزن..وانطلق الى ابنة اورابورا الدجاجه..

فوجدها تبكي ..وقالت لعمها رطرط : لقد قتلوا ابوي انت وخشتك ..ورا ماتروح تاخذ بثار ابوي..

كان رطرط قاعد يحك ظهره..وقال : اهجدي لا اصنك بجنط السيكل مع خشتك خلين افكر..

قال رطرط..: بروح للعيال باللأستراحه..اشوف وش رايهم..

وصل رطرط للأستراحه..وكاف عــــــزه..قد فاز على كل العيال بالسوني..وقال لي رطرط..: كل عام وانت بخير..قصدي احسن الله عزاك..

رد رطرط : هلا صحة وعافيه ولا يكثر....اقول تراي ناوي اخربها مع قبيلة المهابيل..لا بوهم لابو اللي جمعهم..

رد عـــزه : ينصر دينك ...الله مير يسلم ها البؤ..(ماتركب صح)

رطرط : اجل الله مير يسلم ها البؤ هاه... متى تبي تعقل انت...لا اجي امحطك بالعقال..انا من الصبح اصيح على اورابورا وانت قاعد تفلسف..

عـــزه : ياخي اسكت بس..بروح انادي العيال عشان فيه تفقيع وجيه((مضاربه))..

رطرط : ايه رح رح فكنا بس..

عاد رطرط الى بيته عند الدجاجه..ابنة اخيه..ووجد الشيخ جلابص خالهم جاي عندهم..وقال رطرط في نفسه : لاحووول وش جابه ذا العله..

قال جلابص : هلا هلا رطرط ..بالحضن يابني بالحضن

رطرط : خير وش تبي انت .. وش اللي حضن انت وخشتك ..اللي كنه ترمس شاهي (جابه اما لو انها على نجر ) منسدحه...اصلا من يوم عرفت ان اسمك جلابص وانا غاسل يدي

جلابص : دعنا من هذا الكلام يا رطرط لا تفشلني ..وانا جاي اشوف وراك تبي تضارب قبيلة المهابيل..

رطرط : ياخي مشكلة اذا اجتمعت بالواحد ...صفة انه دلخ ..وشين بنفس اللحظه..ياخي ذابحين اخوي وتبين اقعد اتفرج..

جلابص : حسنن..ولكن خل عنك حركات الأستهبال..لا تذبح عيالهم ..اللي ذبح اورابورا هو ساليش..رح تدابغ انت وياه لين تملون..

رطرط : جلابص انت غبي والا تستغبي..بس ودي اعرف يعني...يا كمخه..لو اذبح كل مبزرة قبيلة المهابيل ..ماجابوا ولا خشم اورابورا عاد خشة اورابورا تقول هندسه ناقصه فرجار ومنقله لا وبعد المثلث منكسر ..

وبعدين تعال انت ..نبي نسأل الدجاجه بنت اورابورا...وش اللي يرضيه بمقتل ابوه..تعال انتي يالدجاجه الصقعاء..

الدجاجه : مازا اردت يا عمي ..

رطرط : اخس يا مازا..صايرتن مصريه اجل...ايه اسمعي..يقولك جلابص اذبحوا ساليش بدال اورابورا..
الدجاجه : لأه ..انا عاوزه بابا حيا انا عاوزه بابا حيا ......وظلت تقول هذا الكلام الى ان جاهاه ملقاط المعسل عاد يمشي مليون مع خشتها ..من رطرط عاد قاعد يعسل بشيشة اورابورا ..ونقول لرطرط سلمت يدك ..رطرط : هلا تسلم ياللي قاعد تقرا..

رطرط : هاه شفت يا جلابص ..تقولك عايزة مدري وشو ...يعني تبي ابوها ذا البزر((يعني ياهل بالكويتي))..

جلابص : انها الحرب قد بدأت يا رطرط..ادحضها ( يعني وقفها على ما أظن ) من الآن لا نتوهق..

رطرط : اقول قم قم انت ماينفعك الهرج..يالله لا اتوطى ببطنك امام اخوياك ذا اللي صافين صايرين تقل طقم ملاعق..

دق رطرط على خويه عـــزه ( دق ليست دق بيجر او جوال ..لأن ذلك الوقت مافيه ذا الخربطه ..ولكنه كز ( ارسل ) العبد حقه الى عــزه ) وقال لهعــزه هاه جبت العيال..

عــــزه : ايوه ذي حزتهم((يعني ذا وقتهم.)).

رطرط : خير وش فيهم ذولا ..اشوفك متأثر ببابا فرحان ..( في ذلك العصر كانت تجي بابا فرحان كتمثليه سهره يوم الخميس )

عــــزه : ايه ياخي والله يانا اخق على ام الخير..

رطرط : ايه طيب...عساك جبت الحطبه حقتي..والزرادية البرتقاليه ..

عـــزه: ايه..والعيال بعد هذاهم بالطريق..

وصل العيال..وهم مكونين من ...وائل ..? هيثم ..? سمير ..? بسطويسي..? رأفت...? ..?...? ستيشن..

يالهي ..انه ستيشن شخصيا..?

رطرط : ياعمررررري ياشيخ...اروح قوطي ببسي منسدح عند اشارة معك ياستيشن..لا خلاص بنفوز عليهم..

ستيشن : علا شباب..( علا = هلا ..ولكن ستيشن بالع مكيف ) اشغلتونا بهالمسفه.ياخي وينهم.

رطرط : هالحين بنروح نطب عليهم نلزخهم ..وانا سوف اروح اشوف زوجة اخوي اورابورا الحصيصه.

ولقد كانت الحصيصه حاملا....ووصل خبر موت هذا الطفل ..للزير رطرط..مما ادى الى انه جاه شد عضلي بخشمه من فرط الحزن..
قامت المضاربه الأولى..وقد ابلى رطرط بلاءا حسنن..حيث صفق 17 ولعب اكس اوو بخشة اربعه..وعبر عن انتصاره بأن جمع العيال بعد المعركه..وبدا يرقصون ويغنون ..الله الله يا منتخبنا خذني بقايا جروح ارجوك داويني..قمرين دول والا عينين....يذكر انهم مشغلين مقاطع هذي مو اغنيه..

بعد فترة ليست بالطويله..يعني ربع ساعه تقريبا..انطلق ساليش الى الحصيصه..قائلا لها..يجب ان نخفي المولود الجديد..

الحصيصه : ليش ياجعلك ماتربح ? ((ليش الأخت عليها سحب))

ساليش: لكي نقدر نوقف هذه الخزعبلات .من المضاربات الداميه..لقد تفقعت خشتي

الحصيصه : بس ياخي هذا ابن اورابورا ولازم يحمل لقبه ..

ساليش : ايتها الخبله هل تريدينا ان نقتل جميعا..

ووافقت الحصيصه على فكرة ساليش..بأن يجعلون المولود يحمل اسمهم ..وتكون الحصيصه عمته وليست امه ..على باله يبون يلعبون عليه..

وبعد مرور الكثير من المعارك..وكان النصر اغلبها لفريق الزير رطرط..لأنه كان يلعب بخطة فرنسا اللي في منتدى الألعاب...وهي نفس خطة ابو سعيدان مدرب نادي التوباد في الافلاج ..الا وهيا..هجوم لمين نجيب هدف..بعدين ..استخدام اسلوب نجر مشعلاني.? لا يهون صرخات الحب..الا وهوا اذا فاتك الكورة لا تفوتك سيقان الرجال..

وبعد هذه المعارك..والتي قتل فيها الزير رطرطاشخاصا عزيزين على قلبه..مثل صرصر..صديقه سابقا..والذي كان يلعب معه سوني بالدوري الياباني..

وابناء اخته سعدون وسعيدان((مأخوذه من اسمي سعد))....وذلك اثر على نفسية رطرط كثير..مما حدا عـزه ان ياخذ رطرط ..ويروحون لمقهى ابو هيثم..حيث طلب رطرط معسل فخفخينا....ونحن نذكر ان التعسيل يؤثر على صحتك الرجاء لا يهمك رطرط تراه من جنبها..

وبعد مرور السنين..كبر ابن الحصيصه والتي كانت تريد ان تسميه شطرطون كما كان يريد ابو اورابورا..ولكن مشورة ساليش ..جعلتها تسميه صندوق..

وفي يوم من الأيام احس الصندوق بأن فيه شي غلط..وقال للحصيصه..من انا ووش القصه..وكان حاشرها بزاوية الغرفه..مما جعلها تخر بكلش وتقوله السالفه

مما اغضبه وانطلق الى ساليش ليتضارب معه..وذلك بعد ان كان رطرط قد لعب بحسبة قبيلة المسفه كلها..
وبعد مضاربه حامية الوطيس ( يعني اقوى مضاربه ) بين شطرطون وساليش ..

انتهت بمقتل ساليش..وثأر شطرطون لأبوه اورابورا..

[مهمومه هموم]

خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخخخخخخخخخخخخخخخخخخخخخخخخخخخخخخخخخخخخخخخخخخخخخخخخ خخخ
كخكخكخكخك كخ كخ كخ كخ كخ كخ
هههههههههههههههههههههههههههههههههههههههههههههههههه هههههههه
ها ها ها ها ها ها ها ها ها
هااااااااااااااااااااااع هووووووووووووووووع هيييييييييييع
هع هع هع هع هع هع
يسلموووووووووووووووووووووووووووووووووووووو
وشطرطون احلى مافي القصه