زمان كانت الطقاقات يدورون على المناسبات اللي ممكن يحيونها والحين المناسبات تلف الدنيا تدور على الطقاقات لا وبعد ازيدكم من الشعر بيت ناس يحددون مناسباتهم حسب جدول الطقاقه المشهوره مايبون غيرها (يالله المعافي) وصارت الطقاقه تحس ان
الوضع بدونها فاشل جدا وعشان توافق تحيي مناسبة
زواج تكتب قائمه طويله عريضه من الطلبات واذا وافق هليها الطرف الثاني تقوم الرئيسه بعرضه على مجلس ادارة الطقاقات لدراسة الامر والموافقه عليه
وبعد الموافقة تضربهم الطقاقه رئيسة الفرقه خمسين الف ريال((وولد أبوه يعترض)..
...
وش رايكم نستعرض شروط الطقاقات ؟! تقول الطقاقه
المبجله من ضمن الشروط لابد من دفع عربون قبل البت في الامر وبعدين لين جينا لمقر الحفل نبي ناس كشخه تستقبلنا وناس ماهيب كشخه تشيل طبولنا وسماعاتنا وناس متوسطين الكشخه يأخذون عباياتنا .
....وبعدين
اذا قعدنا على المنصه بيجينا العصير ((فرش)) ولانبي بزر من البزارين يطب على المنصه ولا لاتلومون الا انفسكم لان معنا وحدة معها خيزرانه مربصينة بالبركة شهر متخصصه بجلد البزران الشياطين .
...وبعدين
اذا بدينا نطق مانبي الحريم المهبل يتجمهرون فوق روسان ونموت من الحر وبعد
مانبي كلن يطلب اغنيه على كيفه حنا نبي نغني حسب الكتلوج الي معنا بالترتيب وحظ ونصيب كل وحدة تسمع اغنيتها المفضله
تطب وتناقز عليها لين تقول العيد باكر وياليت لو سمحتو اللي ترقص مرة
ماتعيدها عشان الواحد مايمل من تكرار الوجيه الا اذا عجبنا رقص وحدة حنا نطلبها بشكل خاص.
......واذا
جا وقت العشا تقلطوننا مع اهل المعرس على البوفيه موهب مثل بعض
الطقاقات ......قصدي الفنانات
يحطونهم اهل المعرس بعد الناس مع المبزرة
وتعالوا شوفوا أنواع الهوشات ...الطقاقه تلحق البزر بالنعله ((اعزكم الله)) والبزر ياقف من بعيد وعيرها0
واذا خلصنا متعشين تجينا القهوه والشاهي والنعناع الزين في المنصه ولاحنا بطاقين لين نكيف روسنا 0
وبعد موافقة اهل العروس على هالشروط التعجيزيه
يجن الطقاقات على ذاك الجمس الملكي اللي كنة طيارة من فخامته ((والله اني ودي استقيل واشتغل طقاقه))المهم ينادي البواب بالمكرفون
على ام العروس لأانها منبه عليه يعلمها اذا وصلن الطقاقات عشان تقوم بالواجب
(( وتعالو عاد اذا وصلن الطقاقات مع اهل المعرس تحتار المسكينه الام من تستقبل))
المهم تركض الام للبوابه ومعها المبخرة وتهلي وترحب بالفرقه والطقاقات
لو تشمون ريحتهن ((تجيب الغادي )) ماعلينا
مالنا غنا عنهم)) وأخذت عباياتهن وجابت العصير ((الفرش
حتى من حيرة الام حطت كل أنواع العصيرتخاف
مايعجبهن ....المهم عدت بسلام وكل شي حسب العقد ووصل المعرس وجات الام وطلبت من الطقاقه تجي تطق عند أهل المعرس عند العروسه قالت الرئيسة هذا مااتفقنا عليه بالعقد وعشان أدخل عند العروسة لازم تدفعين الفين ريال زياده ((قالت الأم بعطيكم اللي تبون يابعد حيي بس تعالو شرفوناعند أهل المعرس ودخلت الرئسية هي وريحتها وقامت الناس ترقص وهي متلطمه ..المهم طلعوا وبدت الحفلة حسب العقد وولد أبوه يطلب المنصة مرتين الا أذا حصل عليه سحب !!!1
الحريم المساكين بدن يناقزن على اغاني ماتناسب طريقة رقصهن يخافن ماتجي أغانيهن المفضله ويموتن بحسرتهن وهن حالفان ماينامن الليلة الامن التعب ..المهم أقبلن ذاك الخوات ماشاءالله عليهن عددهن ثمانيه يبي يرقصن مع بعض قامت الطقاقه واضربت عن الطق راسها وألف سيف مايدخل المنصه اكثر من ثنتين ...وجت أم العروسه تركض وطلعت ست وخلت ثنتين كله ولازعل((رفيعة الشان))وشكل الحريم كلهن مليانات على ها الطقاقه ودهم يكسرون طبوله على رأسة ..لكن يبون الليله تعدي على خير ..وأم العروس هالمسكينه تتردد على دورة المياة شكلها قلقااااااانه مرة.
المهم كثيرين من البنات فيهم هوى ومشتهين الرقص مرة تركوا المنصة ووبدوا يرقصون تحت وبين المدرجات لدرجه تحس فيها ان القاع كلها ترقص ..ويوم انتهت الحفلة أخذت الرئيسة المكرفون وقالت سامحونا على القصور وعسانا بيضنا وجيهكم والله يوفق الجميع..ها المسكينات الحريم اللي ناوين يرنونها علقة بعد الحفلة بصوت واحد الله يبيض وجهك ماقصرتي أبد ويتراكضون للمنصة علشان يأخذون رقمهم!!!!1
الشاهد:حنا العرب مررررة طيبين ومايطبع في أذهاننا الا المواقف الأخيرة
*4
بايو
__________
مع خالص محبتي
العرض المتطور
