خالتي:خلالاص سوي الي تشوفينة وادفعي الي عندك همن ابعطيك اذا جيتي
انا:اية بتعطيني بعد اجل ادفع وابلش وش يطلع فستاني وابي اروح اشتري واحجز عند الكوفيره ...اية بعد يعني انتي الي تكشخين وحنا لا...
الفرقة ....احم احم < < < == افهميها يامها وسكري مناب فاضين لطقاقك انتي وخالتك
انا :يالله خالتي مع السلامة الظاهر الفرقة تبي تدق على المصرية وكلب الحراسة ..
خالتي...اي مصرية واي كلي حراسة ..
انا:طخ بالسماعةوطوووووووووووووط ..(لو اقولها اني سويت مميزات بتتوطى بطني بعد ناقصة انا).....
الفرقة ...:يالله تبين تسدديدن بالبطاقة ...انا/لا ياشيخة انا كااااااش ماعندي بطايق وكلام فاضي امسكي هذي 3 الااف ويبقى لكم سبعة الف ..
الفرقة :اوكي اجل نشوفكم على خير ....
انا :فمان الله
بس توصوا بكلب الحراسة والمصرية نبيها كبر مجمع الفيصلية ....عشان تسد على البزران لايلعبون بالمنصبة ويدزون العروس نعرف عيلانا قشران ...
وطخ بالباب.....< < < ==== هم صقعوا الباب بوجها
واركب السياره(ياربية ...ورا ذا الناس اخلاقهم خربت اوف بس )
المهم ...وبعد شهر ونص تقريبا ....بدت حوسة العرس..وبدت الزحمة ...
وقام كلن يطير بفستانة ياقصره ياطولة ...ياعند كوفيره ..يحجز ياعند ...محل جزم يشتري كعب يناسب علو االفستان ....
وانا همي بس افكر بالمصرية وكلب الحراسة ......
المهم ويجي ابوي ...ويقول يالله مشينا الرياض...معاد بقى على العرس غير يومين ..... واركب واحط فستاني من الفرحة بحضني لايتعفط ...والحذيان ..ماشلتها من الكرتون اخاف تجيها طقات منا ولا منا وتنعفط ..همن ابلش
< = = == مطقمة الشنطة زي الفستان .....
وخواتي الي حاطة في شعرها زيت ورابطتة ...والي حنا ..وامي وابوي عاصبين روسهم من الصجة .... كل وحده تقول ابي شوط لي لحالي ...
ومابة غير دهره ...
اربع ساعات ...ماسمع الا ملاجد وملاجد وملاجد بذا الطريق ..لين وصلنا ..
والبيت يدهر طالع وداخل......
وانا ابي ادخل الصالة اسمع العيال(عيالهم القشران بين 10 و16 سنة) يقولون لبعض والله رحنا امس مع ابوي نشوف الصالة ...فيها فتحت مكيف...نقدر نطل معة ....وقال الثاني < - - - - ولد خالتها ذا الصغير واقشر ويحب يقلد البني مرررره..
يقول لا ياشيخ ..انا عندي فكره ازين ...وراء هالحين ماندخل مع الرجاجيل ...
عشان نشوف ازين ..وبعدين يشوفونا البنات على الطبيعة ..(يبي يدخل مع الزفة ) وامشي واخلية وانا اقول بخاطري ضعيف مايدري عن كلب الحراسة
وادخل على العروس والقاها ترقل ...وراك يخالتي ..وش فيك ...الامن مستتب لا تخافين ....جبت الي وصيتني علية الشموع ....وفساتين البنات الطقم .._(_الي بيزفونها)....
قالت لي :انتي بوادي وانا بوادي ..انا ضايق صدري اني بخلي البيت ...وانتي عرس وماعرس...ياليتني بس ماطلع وارتاح .....
انا:هووووووووووووو (د هشة قوية ....ايش ايش....اية طيب هين (والله لااطلق المصرية عليك ) وبعدين كل هالتكاليف كل يوم داقة علي ابي وابي والحين خفتي يالله عاد انثبري) < = = == حمقت شوي ...
المهم اليلية هذي ليلة العرس ...وكلن حجز على دوره المياه وانتم بكرامة ...الي يتروش قبل الزحمة ويتفرك .....والي يغير لون الشعر ....
والعالم طق وطقيق...... على الغرف...والي يعلق ثوبة ..اكوو لي الثوب والي يقول وين الشماغ.....والي يقول وين جزمتي البنية ...وراءها قلبت سوداء..
وجدي يدور احد يكوي ثوبة ضعيف...ومحد معبره ....حرمتة ...تدق الديرم ...
عرس بنتها بعد .....
المهم يوم جت 12 نومنا العروس ونزلنا حنا البنات ...انوم البزران ...ونهدد الحريم بانهم من بكره ان شفنا واحد من عيالهم يحوسناولا يحوس غرفنا ولا يهوب من ناحية الملابس ان حنا بندبجة دبج مبرح وراح ينحرم من حضور البوفية.. ....
اصبحنا ولا ماصبحنا ....اصبحنا ولا ماصبحنا ...ماقمنا الا على صوت الساعة الخراش..
< = = = =دايخين من البارح مانموا...
المهم ...انا طمرت لتلفون ..واتصل بالفرقة ....الو ....اهلين ..
المنظم موجود....ايوه دقيقة ..
ايوه ...
اهلن ...هاه اليوم الوعد ..
المنظم :مين معي اختي,,,,,,؟؟
انا :هو وشذا نستني ..انا صباحي..اليوم عرسنا بالرياض...
ايوه ايوه ..
اليوم عندكم حجز معنا ...ايوه افتكرت
انا:_(عمى يعمي قلبة وراءه كنة ماطق خبر....)
انا: وحده من البنات موجوده ....
المنظم :لا والله امس كان عندهم عرس مارجعوا الا الفجر ..
انا :ايشششششش
وشولن قومهم ...كسر عليهم الباب قل وراهم سفر....
المظم :لا والله عماتي مزاجهم صعب هم عارفين وش عليهم
انا:لا تكفى في عرضك ....ولي يرحم والديك ...ذكرهم ...
(يوم صكوا على القروش.....نكرونا)...المنظم:اوكي ابكلم السكرتيره وارد عليك ...
< = = == =انلطعت ساعة .....
مقطع عرضي.....
البنات انطلقوا للكوفيرات الساعة 2 الظهر....
>>>>>>> اصبروا لي احجزو لي وجع يبلشكم ....والله لااحوسكم ....الكرت معي....الحجز معي موب مدخلينكم (تخوفهم )
<< = = == == محدعبرها ....كلن همة نفسة ..
ياربية وش بلشني مع ذا الطقاقات ...
المنظم : الو معي اختي......
ايوه ايوه معك هاه بشر
ايوه عندهم حجز على الساعة 6 او 8 مادري اي واحد ...
هية انت مهبول ...وشذ 6 او 8 اي حجز فيهم اوكي ...
المنظم :مدري...بس اكيد طياره الظهران = الرياض
انا :لا وش رايك اجل طياره الظهران نيوزلانده ...
المنظم : يضحك برود ... لاماعليك اوعدك انك بتنبسطين ..
طيب طيب اذا جت 6 ماوصلوا للقاعة ترا بنادي فرقة ام سعد ....
المنظم :مين هذي...؟؟
انا:ماتعرفها ..... هذي تجي للطؤاري......
واخبط بقوتي بسماعها لين طارت الارقام <<<< تحب تبالغ ...
المهم
واركض اجمع قشي واركب اي سياره والله مدري مع مين نطيت..بس ركبت ..وقلت اقرب كوفيره ....يالله بس....
وخر عني هالحين ابصير نوال الزغبي..
والظاهر اني ركبت مع اخو المعرس...جاي يجيب ..الخرفان ..ونطيت معة
المهم وينطلوني ازين وجهي وماي شعر.....(ومانيب قايلتلكم وش صار في وجهي يوم حطوا علية ذا الاوان .... ولا شعرها حطوا علية بخاخ ...فليت مدري مثبت
وذيك الزحمة والطق على الحجز في ذا الكوفيره ..اية يوم خميس ..وكوفيره على الدايري ..وش تحرتين بعد ...كل من هب ودب ....جاي وكلن عنده عرس...في ذا القاعات المنطلة بين كل قاعة وقاعة قاعة ...اعوذ بالله من كثر ذا العالم الي تعرس....ويقولون عندنا عنوسة ...اي عنوسة ...وجع تعالوا شوفوا ذا الكوفيرات ..وتعرفون ...اي عنوسة...)...
المهم ...واطلع بسرعة ونص اللفافات بشعري....مامداهم يشيلونها كلها ....
واطمر واكلم اهلي ارسلوا لي احد ...
جدتي: هلا بامي مها وراس تاخرتي كل البنات فيذا وخالتس تدورس...تبيس تشوفين زينها ..
انا:يمة ارسلي لي اي احد ...ياخذني طقني الجني...فيذا ....
جدتي:يمي العيال لاهين ..
انا :يمة تكفين نادي ابوي ولا اخو ي....
جدتي:طيب وينس فية ....عشان ارسلهم لس
انا :اي والله مدري ويني فية داجة بذا الشارع اية اية يمة الشارع الي كلة كوفيرات ..
جدتي:وين يعني ..
انا:اصبري ابطل وش اسم المحل
ماعندها وقت طلعت بشارع تقراء اللوحة ...
الو جدتي : مشغل (تعال وخل كلش علينا) ...
اية يامي ابرسلس احد ......يجي ياخذس ...
المهم واقعد احتري واحرتي ...
محد جاني...
شوي واطل واعود واطل واعود ...ملوا الهنود مني في الشارع ...والهنديات شكوا فيني ...انتي يدخل يطلع ..يدخل يطلع انتي في شبهة ... انتي سوي سمعة محل مافي كويس...
انا:يابنت الحلال ...وخري عن وجهي لااحوسس ...بس فاضيتن لس بس...
وياذن العشاء.....
ياربية .....وقامت دميعاتي تبطبط ....وتخنقني ام العباري....
(اقول لنفسي يامها لو انك تشغلين ذا السياره وتشخطين ...ومايحدك الا المنصة كان) ...
بس ياربي من جدتي شكلها خذت لها قيلولة ...
ابدق ثانية ...
الهندية:مافي استمعال تلفون .. انتي ممكن كلام صديق سوا سوا ياخذ ,,
انا:بلش يضرب سبدس ..اها وخري عني ....بعد
البنات الي في الكوفيره:خذي جوال دقي على اهلس......< = = = عندها كرامة عيت
وطلعت وركبت ليموزين .....والتسريحة عيت تدخل مع الباب..مسوية شانيون صيني ....
وينزل السواق يدخل التسريحة ...
المهم ...يالله يالله الساعة صارت تسع ....بسرعة صديق...روح القاعة...
< = = == تذكرت ان فستانها في البيت ....لازم تعود .....المهم ..
وتقلب الطريق مع السواق ويقطعون الاشارات ....ويطمرون على كل الارصفة ويخالفون كل قواعد الانظمة والمرورو ....الليمويزين تفاعل معها.....
< = = = == كان يشوفها التكسي وهي تدخل وتطلع من كوفيره الهم والغم .. ...وحاس بمعاناتها .....
المهم ...والبس فساتني وانسى طقمي الذهب...مالبسة ..امي قافلة علية التجوري...
واحط رجلي واطلع الشارع والقى العيال ...ياعيال وين احد خوالكم يوديني للقاعة ...
العيال ...مشوا كلهم ....مافية احد ..
انا :والسواويق ...
العيال:ودوا البنات الكوفيره ...وخالتك راحت ... القاعة وركبت لحالها بسياره وعيت تركبنا عشان الفستان حقها مايخرب ...ركبت وراء لحالها ...
انا:قليلين الاصل خلوني انا ويا ذا الوجهة فيذا ..
طيب
ياعيال:ليموزين يالله بسرعة ..
عاد عيال خوالها صغار وبثرين ....طلعوا على الشارع العام وقفوا اربع ليموزينات ...
ركبوا كلهم معي يعنني حراسة مايدرون اني جاية بليموزين لحالي...
المهم وانزل للقاعة الي في شمال شمال شمال الرياض بعد ساعة ونص من الزحمة ....وطريق الملك فهد ....وانواع الطل في وجهي مع كل كتر ....الي يقول الرقم والي يقول شف التسريحة ...والي يكش علي... مادري وراهم يكشون ..يمكن يقصدون اليموزين .... اكيد الليموزين ,,ولا انا اهبل
وانا ياجبل مايهزك ريح .....مشخصة محد قدي.....عسى ماركب قدام بعد ..
وادخل ...وماسلم على بنات خالتي ...واول وحده ماسلمت عليها جدتي..
اية سافهتني بعد .....
وامشي كني مالي شغل
واطلع الدور الثاني اشوف خالتي العروس والقها تصيح دورني ....وينس جعلس الي مانيب قايلة
ليش وش صار...؟؟
توني ابقعد اصيح عن حالتي ...يوم نسوني بالكوفيره
الا تقولي خالتي الطقاقة ماجت ...
ايش الطقاقة ........ماجت ..وش تقولين الحين تسع ونص...
اصبري.... يمكن تجي..
واروح اوقف بشارع ....ثانية< === = == = تحسرت الضعيفة من شارع لشارع ....... وبعد لطع ساعة كاملة
وال ذا الجمس الالوان ....وينزل ذا ك العبيد ويفتح الباب....وتنزل ذيك الطيران وذيك الميكرفونات وذيك الشنط تقول شنط السفرامهات حديد..وذيك الحرمة ... الله مالك الملك .....
مشاءالله ..واقعد اهلل واكبر...الحمد الله على سلامتكم هلا هلا نورتوا ..,
اقلطوا < == = == اي اقلطووا عشاء هو ..
واطمر لخالتي...جو جو ...وخالتي خلاص معاد بة ميك اب ميح الوجة صار...
من كثر الروعة ..
واطمر.... وانزل للحريم بالقاعة ...وانتظر يشبكون الاسلاك ...وماتسمع الا اصوات
ذا الحرمة دودوددودودوددودودودودوددودودودوددودود
يبربرون...عاد حريم ومافية صوت اغنية ..مافية الا حش...المهم ..الا امي تناديني..
مها وراس مالبستي طقمس الذهب..
انا:وخري عن وجهي انا اول من بيرقص ..صفقي لي يمة هاه ..
امها :اية بس نادي خواتس يرقصون معس
انا :لا والله يهبون ...الا هم ....رايحين ومخلنيني .
امها:وين خلوس...؟؟
انا:بعدين بعدين اشرحلس؟؟ابي استفتح الشوط ..
المهم واوقف عندهم ..الا هم مشخصات ...وحركات باروكات ..وفساتين مشخلعة ..
والمصرية ...تهوش ...واقفة فيذاك ..بس تحرى احد يتحرك ..
والبزران عيونهم تلاقط يحتروون اي تصرف او اي اشاره ....
< = = == عرس قراوء من جد... (ماكتبوا ممنوع اصطحاب الاطفال والمغاتير)
المهم ويقعدون ذا التكارنة ..يشبكون بذا المايك ..
الا وحده منهم تقول الهندي حقنا يقول عيت الاسلاك تنشبك ....
هاه ....وجع وراكم ..واجيك فازعة...واركب على المسرح ...واقطع سلكهم القديم واتصل بصالة عطونا سلك جديد ..
والناس طقها الجني.....تحتري ذا الفرقة ........ وانا ماغير احوس بذا الاسلاك ياجيب ياودي ...
شوي الا اسمع الطقاقة تقول..الو الو
اوووووووووووووووووووووووووووووووه اخيرا زان المايك ...
عاشت مها ...
واطمر اقعد جنبهم اية بعد العرس علينا يقومون خوات المعرس يرقصون ...معصي بعد....
واتولم ....للرقصة واجرجر الفستان ...واتاكد من الكعب.... لا ينكسر همن ابلش..
ومابة الا رنرنة جوالات ...وانواع الدقات ...والازعاج ..
وياله بداينا ..
وجا ءالشوط الاول ... وتغني اغنية حزن وتجر عليها ذا ك الموال الي يقطع القلب....ومابة الا مشاهق على اغنية ( ياعروس مفارقة )..
المهم ...ويطلبون شاهي والقهوه ونقعد تنحراهم يتفنجلون العمات ....يوم قضوا قالوا الحلا ..ونرسلهم الصواني..
ابد وماعندهم الا طار يجي وطار يروح ويحمون بذا الطبول < = = = الأمن والسلامة عشان مايشبون فحم ونبلش..ويحترقون المعازيم ...< < = = فتيات القديح .في القطيف ..
وبعد ساعة دخلوا اهل المعرس ..وبازين بعمرهم ...قمت انا وطمر اعلم خالتي جو جو ..وهي تحوس ... طيب زحمة وألا لا(ماهمها الا ترتيبات العرس) < = = = = قامت حركات العرايس..وكثره الاسئلة ...
المهم قالت يالله انا صدعت ابي انزف واطلع وهذا تركي برا يحتريني,,,,اخلصوا علي...
قلت اصبري تفشلينا .,...الكشخة ينزفون الساعة وحده ..
قالت ايش وحده لا انا تعبانة مافيني حيل ...
انا:جعلك الي مانيب قايلتها .....ابنزل اشوف
خالتي :الا يامها طقها زين ..ولا لا ...
انا:اية يهبل (وانا مناك اتحسر على اول طقة )
واجيك مع الدرج ...ماتسمع الا مخابط كعبي..... هاه طقت يابنات ..البنات: ..نبي اغاني نبيل نبي عبد المجيد قولي لها يامها ...تكفين ...
واروح على بالي امون بنت اخت العروس المقربة ..واسمعهم يحشون فينا ...يحشون باهل العروسة ..يقولون (شنوا هذا العرس ...زحمة موت ...وحر,,,,,...مافية بنات هز وسط ولا شيء..)
وجيت يمهم ..قلت اية طب طقوا اغنية تحركنا ...ويناظرون بعض...قالو ا يالله وش تبون :قلت نبي اشر لي بالمدنيل .... < = = = ذوق ماش
يالله طيب
واجيك ....مفحطة ....وراء وراء...ومافية الا هز من قلب ....واقط الجزمة ...ويطبون خواتي واغمز لهم اقولهم حولوا ...ابي اكون لحالي...والناس تصفق لي...واحس ان معنوياتي مرتفعة ....ومافية الا خز بالعيون ...وتمايل وامسك الفستان واجي واروح واروي الناس موديل الظهر....واسوي نفسي وين ..وفجاءه من دون مقدمات ..يوقفون الطق بصوره خلتني احس اني ارقص على الهواء لااني ماحسيت من الحماس..الا وخواتي يقولون مها مها خلاص..اعقلي
قلت هاه قالوا وقفت الطق...
واعصب ويطقني الجني..... واسكتواكتمها بقلبي < < < === تحب تطلع حرتها بسرعة...
وتنزل العروس والزفة ...ويسكتون الناس...وقاوموا الطقاقات يتلقفون يقولون خلونا حنا نزفها ..بنمول موال يصلح للعرايس..قمت قلت لاتكفون كفاية اول شوط ..ويصولون علي صولة اعوذ بالله ..
وتخلص الزفة وتقعد العروس..
ويدخل المعرس...ويدخلون خوالي واخواني...وابروح اقط معهم بس مسكوني اهلي قالوا زوج خالتي مايصير لي وانثبر وانا ضايق صدري... ودي اروح اضحك مع العيال...عشان يجوني البنات من ذاك ومن ذاك ..
واطلطل عليهم كل شوي
..والطقاقة تخز خالي الكبير ... < = = = = حلو
وتجي تكسر الطار على راسة .... عشان لفت نظر تراك عاجبني وخالي خجول يدنق الراس.... (عاد هي كانت فاتشة يوم دخل المعرس ...ويوم دخلوا الرجاجيل طقت اللثمة ,,,والشعر الباروكة طالع ...والفستان اللماع طالع ....مدري ليش متلثمة)
المهم ويطلعون المعاريس.....
ويشيطون البنات يبون يرقصون ...ويالله ..هاتك يارقص ...وبين كل اغنية والثانية ساعة راحة ..وساعة عشر بيالاات شاهي...وعشر حبات باتشي...
ومن دون اي مقدمات ....تمسك الطقاقة المايك ....تفضلوا على العشاء وتسبق العالم ..
وتفتح قاعة الطعام .......واول من قطع من كيكة العروس هي... < == = =يمونون ...
وانا بس اراقبهم ..
المهم جت الساعة 2 اليل وجت صديقتي ندى متاخره ...... ضاعت بشوارع الرياض
وعاد من حبني لها قلت ابهديك اغنية ....واطلب منهم بعد ماتسحبوا من صالة الطعام ....وبعد ماتجمعوا ..يغنون لصديقتي ...تكريما لحضورها .. < = = = قوية الجملة ....
واطلب اغنية ....مبسوط مادامك معي مبسوط ..(ذوقي وش عليها مني)...
قالت لا ماتصلح ذا الاغنية
المهم واعصب عليها واقول خلاص غني الحب الحقيقي ويالله عاد لاتتفلسفين ...
__ولم اشعر الا انها قامت بقذفي من المنصة قذفا شديدا ..حتى وقعت على راسي على الارض..بواسطة طارها المكتوب علية طار فرقة الشاطيء اليليلة ..
وبعد هذه الصدمة امام العديد من الشهود ...وامام الحفل الكريم لم يسعني غير ان اقوم وانا وجهي منصفق قدام صديقاتي واما م اهل المعرس الذين تشمتوا في وجهي وهو مصفوق ..
وانتابتني حالة بكاء هستيرية ...
واطمر واكتب معروض ساسلمة للامير سلمان عن قريب ....لااني بصراحة تهزئت في مدينة الثقافة .... < ==== تعرف الأخبار
اطالب فيه برد اعتباري ... وكتبت فية مايلي:
اولا:الطقاقات ياخذون زنده قروش واقل فرقة بتاخذ يا خمسة الف او فوق يابتجيك فرقة ام سعد للطؤري,,,,...
ثانيا:الطقاقات يتاخرون في حضور الزواجات مما يؤخر سفر الكثير وتعطل الكثير من المعاريس عشان العرروس ماتبي تطلع من الحفلة لين تختم اخر شوط والخطوط السعودية الي ماشاءالله ماتحتاج ..... اي تاخير...
ثالثا:لو كل واحد يجب خمس اشرطة امهات خمس طعش نسخة اصلية ويستعير مسجل من جاره ويطق سماعات كنود<<== ماركة مسجل ازين له ....وبيفقع بعد اذن جيرانهم الي مسلفينة عشان يدعون علية ولعاد يعطونة لوغطاء قدر المره الجاية ..
.وخل احد يقول انة مهوب راقص رقص البعارين ....بيرقص وبيدق الارض بعد..
رابعا: لو كل وحده ماسوت زيي وتصرفت وركبت ليموزين كان لين الحين تتنظر في كوفيره( تعال وخل كلش علينا) لاانة بسبب الطقاقة وتاخيرها ركبت من غير مادري مع اخو زوج خالتي ... < = = = ياحبها للمبالغ
خامسا: العرس سبب خساره اربع صواني حلا باتشي نوع فاخر مع عديد من قطع الملبس ....وكم كرتون عصير مزاز سنتوب ... شفطوه الطقاقات من دون اي مبرر ..
سادسا: الطقاقات صاروا مشهورات لدرجة ان فرقتنا معه كاميرا ويسئلون المعازيم احد يبي يصور مع المطربة صيتة ..... < < < بالله عليكم ادفع ثمن الصوره عشان اصور جنب صيتة ...الله بعد من شين الصوره
واخيرا :الطقاقات صارو موضه قديمه خلص عصرهم ..والله يحيي عصر الديجيهات
والديسكو والهشك بشك..
![الصورة الرمزية ][MALAK][](images/avatars/k5.gif)
![][MALAK][ غير متصل](Al-Wed/images/statusicon/user_offline.gif)
العرض المتطور
