نحن

[dr_bai]

نحن……أردت أن أكتب هذه الخاطرة وعنونتها ب نحن…أستميحكم عذراً سيشوبها بعض من الكلمات العامية كي تعطيها روح الدعابة
نحن..في نجد الوحيدون في العالم الإسلامي…. بل من بين دول الخليج، اللي نطرد الشباب من كل مكان حتى مواقف السيارات بحجة انه فقط للعائلات يعني اصبر الين تكبر وتتزوج، ولا جب معك أمك ولا أختك عشان تتقصى ولا تتمشى وترفه عن نفسك –وهذا أبسط حق لك كونك بشر - يعني بطاقة دخول بالعربي.

نحن….الوحيدون الذين لنا الحق بأن ننقد الناس في أي مكان م في الأرض سواء في لبسهم ولا أكلهم ولا لهجتهم وخاصة في طقوسهم الدينية الإسلامية، ولكن مايحق لهم أبد يقولون لنا شي لأننا حنا أزين الناس وأرقاهم وأعلمهم وحنا بس أهل الدين ولا فيه أحد أبد أزين منا.

نحن… الوحيدون –أقصد الشباب- اللي إذا جينا نطلع من بيوتنا بالويك اند ماندري وين نروح.. نتأرجح بين المطاعم والمقاهي لأننا منبوذون من كل مكان… لأننا كما يدعيه المانعون مدعاة للفساد وين مانروح نخررب.. يعني من ندخل السوق أيدينا بمخابينا بس ندور وين البنت عشان نرقم "أنا ما أقول إننا كلنا صالحين ولا كلنا خربانين فينا وفينا سواء على مستوى الذكور أو الإناث مثل غيرنا من البشر اللي عايشين على الأرض"

نحن…. المجتمع الوحيد الذي يعادي كل فتوى تتسم بالسماحة التي تميز بها ديننا الحنيف بل ونخوض بمن أفتى بها لأنه اجتهد واتى برأي مخالف لعاداتنا التي في بعض الأحيان نصيرها عبادات

نحن… المجتمع الملئ بالتناقضات-ولسنا الوحيدين بالعالم –ولكن اللي يميزنا ياجماعه شي رهيب إننا ماعندنا استعداد نغير شي ابد ولا نتقبل احد ينقد أي وضع ونرد بالمقولة المعتادة "الله لا يغير علينا" لاحظوا إني مافصلت بالنقطة هذي أبتركها لكم و لأنه كل واحد له وجهة نظره الخاصة بالتناقض والتغيير.




نحن… العرب بشكل عام وليس فقط المجتمع السعودي …هجرنا الكتاب ونسيناه بل حتى بعض البيوت مافيها شي اسمه كتاب ولا دولاب مكتبه….انشغلنا بثقافة الألوان الصارخة والصورة السريعة-أنا منب ضده لكن المفروض ماتصير هي كل شي- وأصبح جل همنا وش آخر لبس لبسته نانسي ولا خلونا نشوف وش يسوون ستار اكادمي… ودي أبين سبب ليش قلت "العرب" يقولكم ياجماعة الحين دور النشر اللي برا وأخص منها اللي بأوروبا مثل لندن ولا بعضا اللي في المغرب ولبنان يدققون ألف مره على الكتاب اللي بينشر ويردونه والحجة انه مافيه قارئ عربي .. يقولون إننا نطبع الكتاب ولا يباع...وعلى النقيض اذا كان من ألق الكتاب يهودي فان الكتاب يطبع بأسرع وقت لأن اليهود-وأنا دايماً اسميهم بالصهاينة- يتميزون بأنهم قراااء خاصة فيما يخص تراثهم وتاريخهم.. يقرونه كبيرهم وصغيرهم.. ونحن من سدنا العالم ومن بعث فينا خاتم الأنبياء والمرسلين ،نحن أهل التاريخ نخجل أن نخوض في نقاش مع اي أجنبي عن تاريخنا لأننا بكل بساطه لا نعرفه أو نسيناه

أعزائي أنا لست متشائماً ولا ناقم على مجتمعي بل بالعكس أحب وطني ومجتمعي وديني …..كما أني أحب أن نتطور للأفضل .يجب أن نتبنى نظرية النقد الذاتي لأن الأمم لا تتقدم إلا بعد أن تتعلم من أخطائها وأخطاء من سلف من مثيلاتها …. أنا لا أقول أننا غارقون فقط في الأخطاء لا بل هناك أمور كثيرة تميزنا بها عن غيرنا من الأمم والمجتمعات الأخرى… لكني كتبت خاطرة …خطرت في بالي …فنثرتها على الورق وأحببت أن يقرأها غيري.

تحياتي

[Sahaaaar]

زفيتنا زف والله ما نستاهل كل هذا ........







فينا بعض الصفات الزينة ليش ما ذكرتها تفرحنا على الاقل شوي

[الورور]

اختي سحر خلي عندك روح رياضية شوية
خلي دكتور باي يعبر عن عواطفو شوية ويفضفضلنا شوية
اخويا دكتور باي انا معاك في كل اللي قلتو
انا اضم صوتي لصوتك
تسلم اخويا على الموضوع
نشوفك على خير
يلا في امان الله

[Sahaaaar]

ليش كذا عاد الكل ضد الشباب لكن يالله راح اتقبلها بروح رياضية بس انتظر المرة الجاية يكون في شي في صالحنا


مشكورين..........

[dr_bai]

شي جميل أن يشاركني الرأي شخص واحد على الأقل......على فكرة أنا ودي أزفكم زف ولكن ماقدر لأن واحد منكم .
على كل حال هي كانت فضفة بصوت مرتفع أردت أسمعها لغيري وكل الذي أستطيع أن أقوله لنفسي هو

إذا ضاق الزمان عليك فاصبر ولا تيأس من الفرج القريب
وطب نفساً بما تلد الليــــــالي عسى أن تأتيك بالولد النجيب

شكراً لكما.................................تحياتي

[Last Lady]

اشكر لك طرحك
dr_bai
واسمحلي ان اعبر عن وجهه نظري فيما ذكرت
لقد تناولت عده امور او قضايا في طرحك
وسابدأ معك بالاولى/

العائلات وانو الشباب ماعندهم مكان
يرحون له هذا فنظري يرجع للخوف على البنات (عاداتنا وتقاليدنا)
وبعدين احنا للاسف ماعندنا غير الاسواق ,المطاعم والمقاهي
المقاهي فيه قسم خاص للشباب والمطاعم نفس الحكايه الا ماندر
اما الاسواق فاسمحلي الشباب يسببون ازعاج كبير ومضايقات وصعبه انهم يدخلونهم
على اساس انه فيهم الزين وفيهم الشين التجربه راح تكون فالبنات وانت ادرى بافعال الشباب
خاصه لما يجتمعون حتى مانقدر نتسوق وبعدين الشباب ماله داعي يروح السوق الا اذا كان
بيتقضىوهذا شي نادر بما انهم غالباً يلبسون الثوب اللهم ملابس رياضيه او للسفر وياخذ اخته او امه حتى اصلا تسا عده فالاختيار ومع كذا ففيه اسواق كثيره يدخلونها الشباب جت على واحد ولا اثنين بعدين عندكم الصالات الرياضيه والبلياردو غير الكشتات فالبر ياخي يكفي انكم تسوقون وماحد يسئلكم وين رايحين ووين جاين البنات هم المساكين محد حاس فيهم

الثانيه/

مشكله النقد هذي فعلا مشكله كبيره عندنا وهذي في مجتمعنا نعاني منها بشكل مو طبيعي واقصد التدخل في شؤون الاخرين والمفروض كل شخص يتصرف بحريه ولكن الحريه المشروطه طبعاً يعني بدون تعدي على الدين اما في غير ذالك لايحق لاحد التدخل ومراقبه زلات وعيوب الاخرين اول شي يصلحون انفسهم ,اما النقد الذي لايتقبله الكثير فهو في غايه الاهميه ولن نتطور الا من خلاله حتى نرى عيوبنا ونحاول التحسين من انفسنا وهنا اقصد النقد البناء ولايوجد انسان كامل كل البشر خطاءون ولكن خير الخطاءين التوابون ولكن بتعلم كيفيه النقد فالنقد فن

الثالثه/

الكتاب واهميته الكبيره افضل معلم على الاطلاق الذي تركناه سيراً خلف ماسميه (مراقبه نجاحات الغير والاستمتاع بها)نعم هنا اوافقك الرأي dr_bai المفروض ان نوزن بين الترفيه والقراءه وان لاننسى انفسنا ونعطيها حقها فالامرين فيجب ان نبحث عن ذواتنا ونغذي عقولنا وارواحنا بما يفيدها حتى نفيد انفسنا اولا ونفيد مجتعنا ومن حولنا ثانيا ويكون لنا قيمه وتقدير للذات ولتلافي هذا الجهل الذي نعيشه يجب
ان نعمل بتوعيه الشباب من خلال ندوات باهميه الثقافه والتعلم ولكن احياناً لاالوم شبابنا لجهلهم لانه ليس لدينا اهتمام مثل باقي الدول بالمحاضرات الثقافيه والعلميه ومن اهم هذه المحاضرات من وجهه نظري بعد المحاضرات الدينيه محاضرت عن(البرمجه اللغويه العصبيه)التي تساعد في تطوير الشخص وبناء ثقته بنفسه والتحكم في انفعالاته والتغلب على عيوبه نحن نحتاج لمن ينتشل شبابناويبعث فيهم الثقه والامل والحماس والرغبه في التطور نحتاج بشده لمثل هذه المحاضرات ولكن؟
لاحياه لمن تنادي

اشكرك مره اخرى
dr_bai
على طرح هذه القضايا الهامه
واعذرني على الاطاله
Last Lady

[Sahaaaar]

يا أخ dr_bai ليش الزف ترى والله في احيان كثيرة يكون المدح أفضل الطرق لحل المشاكل وأسهل الوسائل للنصح والسعي للرقي وأنا اعرف انك همك الاساسي التنبيه والنصح ولك جزيل الشكر