طبــعا كلكم عــارفين انه اكبر الشخــصيات في العالم بـدأو عاطلين مشردين في الــشوارع زي الواد حق مايكروسوفت دا يبل قيتس والعم كنتاكي كان يدور بعربيه في الشوراع وهتلر وصدام والطقه دي كانو كلهم عاطلين ,,, وانا كمــان دحين عاطل .
خليني اقــولكم البرنامج اليــومي حقي خليكم تاخدو خبره وتتعلمو قبل ماسير مشهور وماني فاضيلكم
طبــعا استيقظ من الصبــاح الباكر بعد صلاة العصر مباشــره :
اروح ادور اي مسلسل او فيلم اتفرج عليه لمدة نص ساعه عبال ماافوق واستجمع قواي العقليه والبدنيه ( الين ماتفك حالة التناحه ) ازبط دلة القهوه واختار رقم من الجوال واتصل عليه ( عادة هوا شخص واحد ربنا باليني فيه )
انا : كيفك يازفت ( انا واصحابي مره محترمين مع بعض )
هوا : تمام ياعره ايش عندك اخلص .
انا : تعال اتسمم القهوه عندي .
هوا : طيب دقيقه البس واجيك .
انو يوم من الايام يقولي لا معليش مشغول مااقدر ولا على عندي ظروف !! ابدا مقبره ماترد ميت
نجلس نشرب القهوه ونخلص علبة جالكسي كامله ونتبادل اطراف الحديث اساله ايش سوا امس وهوا يسألني ايش سويت انا امس ( مع اننا امس دا طال اليوم مع بعض ) المهم نمشي اي هرجه الين مايأذن المغرب نبدـ عمليات السلتحه في الشوراع جوله مبدئيه على عم بارنيز والشي الغريب انه من يوم مانشوف لوحة بارنيز نسأل بعض معاك فلوس ؟
ياويله الي يقول ايوه لانه مصاريف اليوم كل راح تكون على قفاه ,, بس لازم واحد يقولي ايوه عشان يمشي اليوم المنيل دا طبعا بعد ماناخد القهوه ننزل على الاسواق ( مين قال نغازل ؟ ) لا طبعا الاخ يبغى يتجوز وكل يوم على دا الحال مره يشوف غرفة نوم ومره دهب ومره مبطخ وطبعا مين قاعد ينقي معاه ؟ انا لمن تسمعو انو في واحد اتجوز وحرمته رمته هوا والعفش من الطاقه في اول يوم على طول اعرفو انه دا صاحبي زوقه مضروب وزوقي مضروب والغلبانه راح تتورط .
بعد جولة الاسواق تبدأ عمليات الاتصال وتجميع القوات وتحديد مكان تجميع القوات وغالبا ماتكون بالطريقه دي :
انا : سلام
الشخص المطلوب : اخلص ,, فين المكان ومتى ؟
انا : ابو طربوش الساعه 10
هوا : طيب .. طوط طوط طوط ( مو اقولكم الاحترام اهم شي بيننا ! )
والي بعده نفس الطريقه وعلى كدا الين مايتم التجمع .
وجلسه في ابو طربوش وطبعا كل يوم في ضحية عشان يشيل الليله وتكون الجلسه على راسه لذلك الواحد يكون حذر قد مايقدر ومايبدأ هوا الهجوم بالكلام .
بعد العشى يجي الوقت الي كلنا نكرهه وقت الدفع بعد الاشتباكات والملابسات وتبادل الشتم والاعتراضات وتدخل قوات الامن الطربوشيه يتم الدفع وتنتهي الليله بسلام .
طبعا كل واحد لازم يكون مسوي نداله ومبقي ( 5 ريال للدخان ) .
بعدها كل واحد يتوكل على بيته وانا اتوكل على المزرعه اجلس فيها الين الفجر واتوكل على البيت ,, وبعدها النت الين الصباح والصباح يبدأ دوام الدشره التاني برضو قهوه من العم بارنيز وفطور اما سندوشتات ( مليس ) او كودو على حسب الخسائر الماديه الي اتكبدناها في الليل الدشره الصباحية عادة ماتختلف عن الدشره المسائيه في عدد الافراد الدشره الصباحيه افرادها يكونو شخصين او 3 فقط .
وبعد التعب دا كله يجي وقت الراحه والاسترخاء والنوم
وتاني يوم نفس الوضع والسلتحه
المطلــوب منكم الدعاء لاخوانكم العاطلين والله بنتعب تعب مو طبيعي
منقوووووووووووووووووووول
العرض العادي
