القطو ولد النعمة والقطو الحونشي
القطو ولد النعمة والقطو الحونشي
هاذي حكاية قطو ولد عز ونعمة ساكن بفللة بالعليا في شمال الرياض اسمه ( تومي)
والقطو الاخر ولد فقر رابي بحواري منفوحة في جنوب الرياض واسمه (الزاحف)
في يوم غائم من ايام الشتاء بالرياض التقى تومي والزاحف والسبب الهجرة
فالقطو تومي تارك العليا ومهاجر رايح منفحة بينما القطو الزاحف مهاجر رايح العليا . خللونا نشوف وش صااااااار.
الزاحف شاف تومي منفوخ وشعره طويل ومنفوش عاد واختلط عليه الموضوع ويحسب ان تومي قطوة .
الزاحف : دقها تكويعة على الرصيف ويحتري تومي يوصل عنده
تومي : اذا سمحت تبعد عن شوي خللني امشي
الزاحف : يا وييلييييييييييه فديت المشية انا يا أحلى قطوة بالديرة
تومي : يووووووه وش فيك انت ما تميز بين قطو وقطوة
الزاحف : عاد انحرج وقال افا انت قطو وراك خكري كذا
تومي : انا موب خكري يا متوحش
الزاحف : ورااااااااك تغلط يا الخكري ترى بتوطى ابطنك ان زدتها
تومي : خاف وعاد هو ما عمره تهاوش مع احد قال مو قصدي اغلط عليك بس انت جرحت شعوري
الزاحف : نيااااااو يو يو يو (يضحك) وشلون انجرح شعرك . بس لا يصب دم من شعرك !!؟؟
تومي : يوووووه انا ما قلت شعري انا قلت شعوري
الزاحف : اييييييييييه . بس عاد وين انت رايح
تومي : انا رايح لجنوب الرياض في منتقة (منطقة) اسمها منفوحة اصحابي دللوني عليها
الزاحف : وش تبي بمنفوحة
تومي : انا ما اقدر اعيش بالعليا اكثر من كذا
الزاحف : يوووووووووووك انت من اهل العليا وليه تاركها
تومي : بسراحه (بصراحة) انا البيطري لما رحتله العيادة نصحني انني ابعد عن العليا كم شهر
الزاحف : وشششوووو ذا الظيطري؟؟؟؟؟؟
تومي : البيطري يعني التبيب (الطبيب) اللي يعالجمي لما اكون مريض
الزاحف : احنا بمنفوحة اذا مرظنا نروح زبالة المستوصف نجيب الدوا. بس ليه قلك الدختور تروح منفوحة.
تومي : الدكتور قللي اننو الكلسترول عالي عندي واننو القلب ممكن يتعب اذا اكلت اكل دسم وعشان كدا قللي روح منفوحة لأن الاكل هناك قليل وكمان ما في دسم
الزاحف : نياااااااااو نيو نيو (يضحك) يا ولد اسمع مني وارجع للعليا انت منت وجه بهدلة
تومي : لا لا ما اقدر انا صحتي تعبانة ولازم اعمل نقاهة بمنفوحة. بس انتا وين تبغى تروح
الزاحف : انا يا ابو الشباب حكايتي حكاية وبصراحة انا هارب من منفوحة
تومي : هارب ؟؟؟ هارب من ايش
الزاحف : بصراحة انا قتلت واحد من القطاوة بالحارة و أهله طالبين الثار
تومي : ياااااااااااي حرام عليك ليه قتلتو
الزاحف : بصراحة كنت جوعان ورحت الزبالة حق المطعم ولقيت قطو شرراني اسمه (سداح) وقام سداح منعني من الاكل بالزبالة . وانا لعب الشيطان براسي وغافلت سداح وامسك ذيك المغرفة والطه براسه ذيك اللطة وافلقه فلقة جابت العيد فيه . انا شفت سداح ميت قدامي وانحاش واتوزى اسبوع كامل لا اكل ولا شرب الين ما خوياني دبروني وهرربوني من منفوحة .
تومي : يا حرااااااااام . طيب وانت وين بتروح الحين
الزاحف : بروح العليا لأن هناك ما في تبادل مجرمين مع منفوحة
تومي : اوكي قوود لك فور يو (يعني بالتوفيق)
الزاحف : تصدق ما فهمت شي من اللي تقوله
المهم انتهى الحوار وانطلق كل منهما في طريقه الى عالمه الجديد
وبعد مرور عدة اشهر التقى تومي والزاحف واثنيهم هاربين مرة ثانية.
خللونا نشوف السبب...........
تومي : سلام يا زاحف كيف احوالك
الزاحف : حالي ما هي زينه وانا راجع منفوحة ولو على موتي. بس انت وش علومك
تومي : منفوحة ما ينعاش فيها ابدا بصراحة انا عشت مجاعة عندكم نصبح نقرقش عظام ونتعشى خبز ناشف وبعدين لما نقعد على الاكل بوسط برميل الزبالة يقوم بعض القطاوة يسوي حركات قللة حيا . ويوم قلت ابغى اتزوج ما حصلت ولا قطوة تقبل فيني كل ما أخطب وحدة تقوللي ما اتزوج خكري واخرتها تهاوشت مع قطو شرراني عضللي اذني وقطعها ونتفلي شواربي . انا برجع العليا وخللي الكلسترول يرتفع. لكن انت ليش تركت العليا
الزاحف : انا يوم رحت العليا زانت لي العيشة وبصراحة زبالتهم زبالة خبر يوم مفطح ويوم مشاوي وحتى اكلت ذا اللي تسمونه هرقرقر (همبرقر) وبعدين ما قطوة شافتني اللا واعجبت فيني لأنهن يدورون على واحد زقزت مثلي وصرت اصبح معرس على قطوة وامسي معرس على غيرها. واللي حصل ان كل قطو بالعليا حقد علي الين اجتمعو علي هالخكارية وربطوني وقامو يقبصون فيني الين ما تقطع جلدي وانفتح براسي شوارع . وهاذا نا هاج من العليا ورايح ديرتي الاولة
تومي : تستاهل لانك واحد سوفاج (متوحش)
الزاحف : وشو ذا المساج عساك ما سبني
تومي : لا انا قصدي انك واحد زقرتي وما تستاهل اللي صارلك
الى هنا انتهى لقاو تومي مع الزاحف.
كل ما أعلمه ان تومي لا زاليعيش في العليا عيشة رغدة بعد ما اتعلم شوية حركات من منفوحة وصار له كثير معجبات.
اما الزاحف فقد تعرض لمحاولة اغتيال (أخذ بالثار) ولكن على الرغم من اصابته بجراح خطيرة فقد تعافى وهو الان يعيش متخفيا بالقرب من اطراف منفوحة.
انتهى...........
ارجو ان تكون هذه القصة ممتعة وان تزرع الابتسامة على وجوهكم
الرجاء من الاخوة والاخوات القراء ابداء رأيهم وعدم حرماني من تعليقهم على الموضوع
~~~~~~~~~~~~~~~~~~~
اخوكم
المهــــــــــــــــــ روح ـــــــــــــــــــــــــــــــــــــــــا*t *r *t *r
العرض العادي
