اعشقك مـا ابيـك ادري ليـه قولـي وش تبيـن
اكرهـك والله مـدري بايـعٍ عمـري وشريـتـه
السؤال الحين واضح مـن طلـب منـك تجيـن ؟
والجواب ان مـا وصلنـي لا تحسبينـي رجيتـه
اذكـر انـي كنـت اودك وانتـي مثلـي تذكريـن
وقلت ابصبر وان عصاني الف عرقٍ لـك ثنيتـه
وجبت لك باقي سنيني وانتـي صرتـي تجحديـن
المصيبه لا هي لحظه ولا هي عمـرٍ لـك هديتـه
المصيبـه مـل حيلـي مـن مواعيـد السنـيـن
وادري اني لو تبعتك مـا وصلـت اللـي بغيتـه
وخايف اني لـو تركتـك فـي حياتـك تبلشيـن
ولا انا كم مـن هنـوفٍ تجمـع تـرابٍ وطيتـه
والخماسين اللي تعصفنـي يـوم كنتـي تلعبيـن
بين عيني وبيـن رمشـي دونهـا فـراقٍ بنيتـه
اصبري وخلي الزعـل ماهـوب وقتـك تزعليـن
لين اوفي لـك كلامـي وقولـي والله مـا هقيتـه
وانثـري دمعـه ودمعـه واختميهـا بشهقتـيـن
ولا قفلتي الباب ورحتي قولـي مسكيـن ابتليتـه
خابـرك والله مالـك قلـب يسكـنـه الحنـيـن
ولا عرفتي دمع شـوق ولا شكيتـي مـا شكيتـه
وكل كلمـه تنتمـي لـك ناقصـه عقـلٍ وديـن
كنها مطلـع قصيـده اسمهـا ( جـرحٍ كويتـه ii)
تذكريـن اول لقانـا كيـف كنتـي تضحكـيـن ؟
يوم قلت ارجوك قلبـي فـي يدينـك لـك رميتـه
والتفتـي مـن يسـار والتفتـي مــن يمـيـن
وقلتي وينه وين قلبك مـا اظنـك لـي عطيتـه !
ادري انك مـا فهمتـي ويـوم جيتـي تفهميـن
قلتي لحظه وين ( كحلي ) ضاع مني وما لقيته !
لعنبو كلك ومـن لـك ليـه جيتـي تركضيـن ؟؟
وكل همّك شفت ( عقدي) تدري من وين اشتريته ؟
اجمعي كحلك وعقـدك وزينـك اللـي ترسميـن
وقصي رجلي كان شفتي يـوم لـك دربٍ وطيتـه
العرض الشجري
