هـــــــــذا = مــكـــانــــي
الحمد لله ما توهمت السراب=الشي لاشفته أعرفه وأخبره
وإن شدني العنوان وغلاف الكتاب=ادري بمن خطه ومنهو سطره
ولكل وقت(ن)قول محسوب وخطاب=إليا نويت القول اقوله وأجهره
واصبر على المخطي ولا أرد بعتاب=أبدى بفعل إليا نويته اقدره
أعشق أنا العَسرات وركوب الصعاب=أكره انا لا أبدِيه خوفي وأظهِره
لاعاش قلب(ن)يوم شاف العلم هاب=إن ما حماني يوم إلا بنحره
السبع ياكل دام له مخلب وناب=ماهو كما العصفور زاده ينقره
وإن كان ماعشت بلقب حضرة جناب=ماكون ذاك اللاش محد(ن)قدّره
دامي على الطولات لي مليون باب=أدخل ولي مجلس أنا متصدّره
( هذا مكاني ) لا تسجلني غياب =الباب ذا بابي ولا احد(ن)سكّره
إن قلت لي راي(ن)ترى هذا الصواب=إن ما يزين القول انا أتعذّره
وش فرّق المخلوق عن بعض الدواب=إلا بعقل(ن) لا إستشاره دبّره
ياللي معاديني انا ذاك السحاب=اللي تشوفه من بعيد وتنظره
ماطاله اللي يرتقي فوق الهضاب=أللي يشوف الغيم - جاه وغبّره؟
(هذا مكاني) يوم شديت الركاب=إن جِيت لك جَتك الرعود المنذِره
والسيل لامن جاك جا فيه الجواب=أسقى عقول رجال وأنته - بخسره
حر(ن) ولا ني ساكن(ن)منزل غراب=أعِف نفسي عن شبيهه وأنفره
لا جيت اواجه كود اواجه لي ذياب=أللي سواتك لاحكى بي أنكره
العرض الشجري
