الميعـــــــــاد

[الملكه]

نامت الورقا
على حبل الغمام اللي تقاطر من صميل البارحه
وطاحت النجمه على صدر الثرى
وقالت :
سرى ..
ليل الحيارى .. والعذارى .. والكرى ..
يا ورد جرحي اللي نزف
خلى الستاير والنوافذ ترتجف
البارحه بس
كانت كراريس التعب شمس
وكانت عيوني المحبره .. ورموشي الأقلام
آه السهر ما نام
وأصابعي خطت على رمل التعب
همس العصافير
حلم القناديل
وقالت:
لـــحفني ياقيظ الضنى
بحلم الربيع .. ونمت

### ###

مدري شصحى في الدياجير العقيمه صورتي
برواز من يأس وغضب
وعيون يوقظها التعب
تبكي بسبب .. وبلا سبب
مدري هي النار اهتكت عــذرا المصابيح
والا الديار اشتاقت لدّم المجاريح
مدري ..
لكن رايت اني على ماء وريح
وطفل ذبيح
وعذرا تشد اجمارها وتصيح
وعجوز تاكل نهدها
وشيبه يحن .. مدري يون .. مدري يغني ..
مدري ..
اضن انه يدوّر له عن اللي يشتريه
ابيطعم اعياله
الله نسيت
انه غني..لا.. انه فقير
الله نسيت
هذا خشير الجرح .. وجار الفؤاد
هذا هو الميعاد

#### #####

آه..آه
من يحلب انهود الوله .. ويجلب الماء
ظميانين
مابقى غير الحنين
حبيبتي ياللي قطفك اليأس من غصن التياعي
كنت ساعي
وكانت اعيونك شراعي
كنت انسج من عبير الهرج شمس
متكي اطرد ذباب اليأس عن وجه المدينه
واستحم ابوجه زينه
من ذنوبي
من هموم الوقت لا صارت عيون الناس صوبي
كنت امد آخر حبال الوصل
كنت ازاوج بين فرع البارحه والأصل
لما مرتني سحابه
وامطرت فوق الورق
وانبتت بعض الكتابه
في سفايف بنت خالجها كلام
ياحرام
شفتها تقظم اظافر حزنها
ممهورة بالجدب
مسكونة بضنونها
ترسم خطاويها ارتعاش الدرب
بين النظر والقلب
ترمي جديلتها على غصن البشام وتحجب الشمس
قلت: ابنسى
دمّ هالطفل الذبيح
وبستريح
مرت نسايم حلم
وطاحت على صدر البنفسج
من غدير السالفه نجمه
وهمهمت للضفتين
كان الكحل في العين
وكانت اصابع هالزمن مرود
ياهيه ياللي فتنتي الموج بالساق النحيل
الخيل غارت
واستفزت مولد الغربه بليل
وانا
بين الجدي واسهيل
طويت ارضك مع سماك إف معصمي
ماكنتي لحظتها معي
يا هيه
ردي المطر للغيم
لدت وفي رعشاتها بعض انكسار البارحه
وفي عيونها غور ودمعه سافحه
ومشيت ادور عن رصيف
يضم عثرات الرمال
رغم احتراق الشمس وانّات انكسارات الزوال
لا الوجه وجهي
ولا انتي يالطيفه اول المشوار وآخر دمعتي
عصرتني ادروب الوجل
الليل اول من كشف لي السالفه
لكن
من هو درى عن شاطي ماتت على فمه المراكب؟
من يعاتب من
لا صارت مداين حلمنا منفى لنا ؟
دخيلك يازمن
وقف على حقول التعب
حبيبي سافر من اول حدود القلب لآخر حدود القلب
وعيت يديني تلامسه
بعض المنافي شامسه
وانكسر عود البشام
ياصابع الحلم الجميل

##### ####### #######
فجأة رجع لي الصوت
عذرا وعجوز تموت
وشايب معه نبوت
وطفل جرح حضن السكوت
قلت اعرفه
لا....
اعرف ابوهم كلهم
بسيماهم المتشابهه
وقفوا كما وقفت ف محراب الكنيسه راهبه
كانوا اخشرا في الجرح
وجيران الفؤاد
وجه دميم يكتسي ثوب الحداد
هذا هو الميعاد

## ### ### ###
_ ياهامة النسيان :
إمتى الدروب القاحله تخجل من اخطا المتعبين ؟
_ لما الحجار تلين