هب الهواء
هب الهـــوا من يــــم نجـــد وخذاني
شــوقي لـذاك البيت واللـــي سكن فيه
بيت اقـــرب الخــــلان له فالمحاني
كــــــل الغلا والحب من شـان راعيه
راعيــــه / مَن حبـه جعل له مكاني
وسط الخفوق اللــي على الناس مغليه
خـــلٍ هـــــواه القلب وايضا هواني
ولـــو حبنــي غيره مــن النـاس مابيه
راعــي العيون اللي سهمها رماني
رميـــة فهيـــمٍ لارمــــى شـــي يفنيه
وخــــــدٍ كما بدرٍ على الناس باني
إليا ظهر فــــي داجي الليـل يضويه
وشــــفايفٍ تخفــي بياض الثماني
تـــروي خفـــوقٍ يابــساتٍ عراويه
إليـــــا نطقت اســـمه يرد بحناني
ســـــم ياوليف الـروح حاضر ولبيه
ماقــــد خبرته يوم صد وعصاني
متبــادلين الحــــــب باسمى معـانيه
كانت حيــــاةٍ كلــــــــبوها تهاني
والهــــم مالــه طاريٍ لجـل نطريه
ومـرت سنين الحب مثل الثواني
وصارت كما حلـمٍ تلاشت مواريه
اليـــوم عن خلـــي بعيـــدٍ مكاني
مقــــدر علـى شوفه ولاني حواليه
بس اتذكـــر مامضى من زماني
والقلب يرجـف لاتذكــرت ماضيه
يامن يخبرها تـرى الحـال شاني
وجرح الهوى عيّا المداوي يداويه
احس كـــن الموت قرّب وجاني
صرت اتحرى له وهذي حراويه
العرض الشجري
