" دجاج " بتشديد الجيم الأولى على وزن " حجـاج "..
موظف مداوم في وزارة الدجة والبثارة في مكتب 600 متر في 600 متر ,
لا ينازعه في مكتبه الا المدير !! ..
محد يدري وش سالفة هالموظف اللي جت علشانه كتيبة ترميم خاصة لتفتح له هالمكتب الكبير ,
ومحد يدري بعد كيف إنطرد 20 موظف كانوا قاطنين بمكتبه قبل مايجي أو لنقل كانوا قاطنين في المساحة الضخمة
اللي أصبح يتبطح فيها
من هو " دجاج " ذا ؟؟ .. محد يدري ..
... المهم " دجاج " ذا داوم جزاه الله خير في مكتبه الكبير ...
حضر يوم ماقصر .. بس اليوم الثاني غاب .. ثم سحب أسبوع .. عيا يجي ..
يقول لازم تكملون الأغراض الضرورية بالمكتب والا ماينفع الكلام هذا !!
راح لمه شخص كبير بالوزارة ... شوي ويحب يدينه علشان يرجع !!
الكبير : تكفى .. تكفى يابن الحلال تعال داوم
دجاج : وراه مكتبي كذا ؟؟ والله ما أجي ياشيخ !!
الكبير : وش تبينا نسوي بالمكتب يعني ؟
دجاج : أبيه مثل مكتب أبوي بالسفارة النيجيرية !!
الكبير : لا ياشيييييييييييخ ؟؟؟
دجاج : أجل مانب مداوم ضف وجهك !!
الكبير : خلاص يابن الحلال عطنا أغراضك كله وماعليك مايجي السبت الا مكتبك صاير مكتب وزير موب موظف علاقات عامة
دجاج : على فكرة موظف علاقات عامة .. غيرلي اياه ...؟؟
الكبير : وش تبي بعد وكيل وزارة؟
دجاج : لا .... فراش !! ... أكيد وكيل وزارة ؟؟ ... ترا فشلتوني قدام خوياي ...
بندر و ماجد و سلطان !!
الكبير : ولايهمك تعال بس السبت وتشوف اللي يسرك !!
امعانا باللعانة !! ... جا دجاج السبت ومعه البشت ...
ولاجا الا الساعة عشر الصبح ( صدق أنه صار وكيل ) .. دخل مكتبه الوفير ..
وشاف ذا الديكور اللي مامثله ... يقولون ان أحد الوكلاء بالوزارة طلب نفس الديكور لمكتبه ...
قعد على الكرسي .. جا صباب القهوة أبو محمد وصبله قهوة ... وامعانا باللعانة بعد ...
دجاج صار لابغى يعطي ابو محمد الفنجال ينزل يده تحت .. علشان يجبر أبو محمد ينزل كله علشان ياخذ الفنجال ...
دجاج بالفنجال الثالث يسوي حركة ألعن ... حط الفنجال فوق كندرته السودا ... !!!
طلع ابو محمد... ودجاج ماغير يتدوحس فوق كرسيه .. حط رجله فوق الطاولة ...
وتذكر شي .... " السوق السوق " ... فتح الجهاز ( المجهز ) عنده وعلى طول " تداول " ...
شرى أسهم من بورصة أمريكا : أتش بي و مايكروسوفت و ببسي و توشيبا و شركة حلاو أبو بقر ( هذي عندهم زي المكيرش عندنا )
مادرى الا الساعة 12 ... لاحظ وجود ملفات فوق مكتبه ...
تعنى المسيكين وجدعهن على المكتب اللي بجمبه عند الموظف ( طلال ) ...
تلفت يمين ويسار وخلص دوامه وطلع من الوزارة وراح لأقرب مطعم و خذ مثلوثة وأنسدح بالفراش وكمل نومة أهل الكهف !!!
اليوم الثاني .. جاب معه كره ولعب بمكتبه وتبارى مع أبو محمد وفاز عليه غصب !!
اليوم الثالث : جا وجاب معه بلايستيشن .. ولعب الدوري الياباني مع أبو محمد وعطاه اليد الخربانه ....
راحت اربع ايام على هالحالة.. ماش الدوام زفت ... ضاق خلقه ياناس ... ضغط عمل غير طبيعي .. خلاه يروح يراجع الطبيب النفسي ...!!!
الدكتور :
خير يادجاج وش فيك ؟؟؟
دجاج :
والله تعبت .. تعبت يادكتور
تعبت من الدوام .... مالي خلق أروح !!!
الدكتور :
ليش بالضبط ؟!!
دجاج :
ياخي ضغط عمل ... وناس ماتنطاق هناك
كلهم ثقيلين طينة !!
الدكتور :
أفااااااااااا .... ليش ثقيلين طينة
دجاج :
ياخي كلهم عيال فقر !!
بعدين احسهم حاقدين علي
تدري عاد ...
تعبت من حالة العداء البشرية ضدي
يعني ... يعني أنا متى أعيش بسلام مع العالم ...
أحس يادكتور اني أعيش بجزيرة معزولة مع السعدان والقرود.
الدكتور :
عيال السعدان ذولا وين ساكنين ...؟؟؟
دجاج :
بالغابــة !!
الدكتور :
أهااااااااااا ...
يقربون لسعد خضر ؟؟
دجاج :
لا ....
سعد خضر عمهم !!!
الدكتور :
المهم ماعلينا ...
نتعرف عليهم بعدين !!
أنت تقولي أن الموظفين حاقدين عليك؟
دجاج :
أيه ...
الدكتور :
وليش مايطيقونك ؟
دجاج :
مدري ليه ...
الدكتور :
طيييييييب .....(ثم يفكر لحظة)
أنت وين تشتغل أخ دجاج ؟
دجاج :
بوزارة الدجة والبثارة
الدكتور :
واللي مايطيقونك بالعمل من هم ؟
دجاج :
الموظفين ..
الدكتور :
تقدر تتذكرلي حادثة أكدت لك هالشي .
دجاج :
أبشرك يا دكتور الدكتور أنا من يوم بديت العمل في الوزارة
وهذي حالتي مع الناس .. اول مادخلت المكتب قعد يخزني زميلي بالمكتب زي كذا
( يغمز بحقد بعيونه )
دجاج :
ومرة جتني ترقية ( أخس أمداه تجيه ترقيه ؟ ) ... وجاني مسعود زميلي بالعمل
وقعد يصارخ في وجهي وأنت ماتستاهل وأنت وأنت
ومن هالكلام البايخ .... ليه يادكتور ليه يادكتور كل هالحقد ..
الدكتور :
هو قال ماتستاهل ؟
دجاج :
أيه ...
الدكتور :
بيني وبينك أنت وشلون جتك الترقية ..
دجاج :
أبد ... بس الرجاجيل سنعوها
الدكتور :
أها فهمت ....
بس قبل لاننتقل للسؤال الثاني
هم " رجاجيل " والا " رياجيل " ... تراه فيه فرق !!
دجاج :
لا ... رياجيل !!
الدكتور :
كمل كمل ...
دجاج :
ومرة تهاوشت مع موظف
بسبة أني أخترت ضمن بعثة في الخارج وهو لا ..
( أخس وبعثة بعد بهالمدة القصيرة بالله عليكم يمديكم؟ )
الدكتور :
ووش قال ..
دجاج :
قال أنت ماتستاهل .. وأنت موظف كسول ومن هالكلام.
الدكتور:
وبيني وبينك كمان ... وشلون جتك البعثة ؟
دجاج (وهو يغمز):
الرجاجيل ماقصروا ....
الدكتور :
قصدك الرياجيل !!
المهم
قلي يادجاج وشلون تعاملك مع المراجعين ؟
دجاج :
زفت يادكتور ..
الدكتور :
عطني حادثة حصلت لك مع واحد منهم ..
دجاج :
مرة كنت كسلان ومالي خلق أقوم و أوقع معاملات
واحد من المراجعين جاني يبي يوقع معاملة قلتله أصبر خلني أغفي شوي
ونمت على المكتب
وتهاوش معي وقال : أنت مثال للموظف الفاشل
قلت والله الفاشل أنت .. قال أبشتكي عليك .. قلت أعلى مافي
حميرك أركبه ..
الدكتور :
أسمها خيلك .. خيلك
دجاج :
لا .... حمارك ... بكيفي
(حط أصبعه على رأسه كنه بزر)
الدكتور :
ماعلينا .. طيب هو أشتكى عليك؟
أنا متأكد أن المدير العام سوى لك إنذار وهددك بالفصل .. صح؟
دجاج :
يخسى الا هو ....
الدكتور :
أفاااااااااااا ؟
دجاج :
جا لمي قالي تكفى لاتفشلنا ... و ...
الدكتور (يقاطعه) :
سنعوها الرجاجيل صح ؟
دجاج :
لا الرياجيل !! ...
ومرة زميلي أشتكى علي لأني دايم أحول معاملاتي عنده
الدكتور :
وسنعوها الرياجيل بعد صح؟
دجاج :
لا هالمرة الرجاجيل سنعوها ..
وصاروا كرماء معي بعد وفصلوا اللي أشتكى علي
الدكتور :
شف علشان مايصير التباس ...
الرياجيل ذولا وش يقربون للرجاجيل ؟؟
دجاج :
مدري بس اللي اعرفه أن الرياجيل من بني خي الرجاجيل بالرضاعة !!
الدكتور :
والنعم والله !!
المهم ...
أخ دجاج .... أنا عرفت وش فيك
أنا أكتشفت أنك مدمن ..
والناس مايحبونك لأنك مدمن والعياذ بالله
دجاج (مذهولا) :
مدمن ؟؟؟ ... أنت صاحي يادكتور؟
أنا مدمن ؟ ...
الدكتور :
نعم مدمن ... وأنا أنصحك تعقل وتخلي هالحبوب اللي تاكلها دايم.
دجاج :
لا يا دكتور لاتفهمني غلط تكفى !!
والله العظيم يادكتور أني ماني مدمن ولا آكل شى.
من وين تجيب الكلام هذا أنت ؟
الدكتور :
لا أنا متأكد أنك تاكل حبوب
دجاج :
حبوب وشو ؟؟؟
الدكتور :
أنت مدمن فيتامينات
وخصوصا ..
فيتامين (واو) السام والعياذ بالله !!!
دجاج :
وشلون يعني ؟؟؟
ترسلوني لمستشفى الأمل مرة ثانية ..
مشوااااااااااااااااااااار ....
مع تحياتي للجميع
اخوكم
وليف الروح
دجـاج مـدمـن في الوزارهـ
العرض الشجري
