الأطفال هم أحباب الرحمن ...هم نور الحياه... نغضب أحيانا من تصرفات أطفالنا
ونعاقبهم بأشد العقوبات تقلقنا أحيانا تصرفاتهم البريئه..ويزعجنا أحيانا سلوكهم
ونحتار كثيراًفي كيفية التعامل معهم....
متناسين أننا كنا أطفال مثلهم وقد مررنا بالعديد من المواقف
حتى كبرنا وتعلمنا
عندما كنا اطفال كانت لنا العديد من المواقف الخالده في الذاكره
بعضها حزين والبعض الأخر مضحك ..
عندما كنا اطفال كنا نحلم بأن نكبر... ونحقق أحلامنا البريئه التي ربما لا تتجاوز
سياره صغيره نقودها .. او شنطة ميك أب.. او تقليد من هم اكبر منا
.
فيا لقناعة الأطفال ماأروعها .. وما أجمل قلوبهم وما أصفى نياتهم
بالأمس جلست مع أمي فحدثتني عن طفولتي وحكت لي بعض الذكريات الطريفه
التي حدثت معي.... واليكم بعض المواقف التي ذكرتني بها أمي وما زالت عالقه بذاكرتي إلى اليوم
.................................................. ...............................
1-كانت ماما تقولي إن الشيطان هو السبب لما الأبله تخاصمني او ماما تزعل مني
وتقول هو الي يقولك تسوين الخطأ وهو الي يطيحك و انا سألتها وين بيت الشيطان
يا ماما ..قالت لي تحت الأرض وفي دورات المياه... المهم أنا صرت أخذ مويه حاره واكبها على الأرض في الحمام علشان يحترق واقول احسن تستاهل علشان مره ثا نيه تتوب تتعرض لي
..ماما شافتني مره وسألتني ليش تسوين كذا وخاصمتني
قلت لها علشان احرق الشيطان.. قالت غلط يا ماما اذا قلتي بسم الله الشيطان ينقهر
قلت لها طيب حاظر يا ماما ... بس كان كل تفكيري اني ازعج الشيطان واكدر عليه صفوه
سألت ماما وش اكثر شي يزعج الشيطان ..قالت اذا قلتي اعوذ بالله من الشيطان الرجيم
يصغر الشيطان ..واذا قلتي الله يصيبك ياشيطان يكبر....
انا صرت العب مع الشيطان...اصغره واكبره على كيفي ..مره اقول الله يصيبك يا شيطان وارجع اقول
اعوذ بالله من الشيطان في اليل والنهار.....(هههههههههههههههههههه)
2-كنت أحب الصوص (صغار الدجاج ) واتمنى يصير عندي واحد بس ماما ما ترضى تجيبلي علشان تقول حرام بعدين يموت..جاتني فكره حلوه
قلت في نفسي الصوص يطلع من البيضه ..ليش انا ما اخذ بيض من الثلاجه واحتفظ فيه في غرفتي الين يفقس ويطلع لي صوص ؟؟
وطبقت الفكره الشيطانيه اخذت خمس بيضات وخبيتها تحت البطانيه في الدولاب
واليوم الثاني رحت المدرسه
والشغاله فتحت الدولاب وشالت البطانيه وطاح البيض على الأرض وتفقس
ورجعت لقيت الخبر قدامي وجلست ابكي واصرخ ابي صوص وااااااااااااااااااااء
(ههههههههههههههه)
3- كان عند عمي مزرعه كبيره وكنا نروح لها ايام الويك اند
وكان فيها ضفادع كثيره ..مره نطيت بجزمتي (اكرمكم الله) على بطن الضفدع
وطلع له صوت وأعجبني الصوت ...وسويت مجزره كبيره من الضفادع الابرياء
وشافني عمي ...وشاف منظر الضفادع وهي ميته تقطع القلب
قال ليش كذا يا بابا مو حرام ..هذي مسكينه مالها ذنب ليش موتيها
انا حزنت مررررررررررره....وقلت خلاص توبه اخر مره يا عمو
وناديت العامل حق المزرعه
قلت له ابيك تساعدني نشيل الضفادع الميته وندفنها تحت الارض ونحط على قبرها
ورود..
... <<( تقتل القتيل وتمشي في جنازته )قال خلاص أنا بشيلها وادفنها
المهم ماما خاصمتني وعاقبتني وندمت مرررررررره
حتى أنا نايمه افكرفي منظر الضفادع الي موتها واجلس ابكي واقول ياحراام ليش انا سويت كذا وتبت اتعرض للضفادع بعد كذا
تلك كانت بعض الحكايات الطفوليه البريئه وهي ليست من نسج خيالي بل هي واقع قد عشته
وما زالت احداثه عالقه بذاكرتي ا الى اليوم ..وهناك الكثير من المواقف ا الشقيه التي حدثت معي
...والأن هاهي تلك الطفله البريئه قد كبرت وتغيرت افكارها . ولكن قلبي. ولا يزال قلب تلك
الطفله الصغيره..يحب كل الناس ولا يكره سوى الشيطان....لأن الشيطان هو الذي يضل الأنسان ويسبب له المتاعب في الحياه
أخوتي واخواتي
هذا ما عندي واحببت أن اشارككم به ..واتمنى منكم أن لا تبخلوا علينا ببعض المواقف الطفوليه
التي حدثت معكم.. فما أروع الحديث عن الطفوله ..وما أجمل ذكرياتها
ولكم خالص محبتي وتقديري
اختكم
مزايا
العرض الشجري
