بسم الله الرحمن الرحيم
الموضوع هذا طرحته ..و أبي كل شخص يحط فيه مواقفه عن عيد الضحيه سواء موقف مر عليه
هالسنه والا اللي قبلها والا الجايه
<< وش السنه الجايه والله لو انك تماشي عرافين ...
يعني الكل يقول موقفه بشكل ساخر عشان ننبسط كلنا
وانا راح أقول موقفي ..
( البــــــدايـــــــة )
قبل العيد بيوم ... جلست على السرير مواصل الين حسيت أن عيوني طلعت كنها كشافات ملعب مدرسة .. حاولت أني أنام بس ما قدرت جاني أرق وجلست أفكر لأول مره في حياتي حسيت أني استخدم مخي وإلا بالعادة جديد بقراطيسه ..
جلست أفكر في أمور الدنيا وفي الوظايف والتقديم وفي المعارك اللي تصير مع كل تقديم وفي كل مره أروح أسابق أركب طقم ضروس من كثر الضرب .. ألين مل الدكتور المصري مني وركب لي فك ثور توهم متقاطين فيه مصاريا ساكنين في حراج بن قاسم وذابحينه عشان لحمة الثلاجة
.. كانت الحياة صعبة مره والدنيا موليه والعالم تطحن في بعض وحنا نتبرع للخارج وكأن عمر بن عبد العزيز عايش معنا ومكفينا
وأنا جالس افكر .. دخل علي اخوي الصغير يصارخ يقولي قم تعال خالي يبغاك تساعده في الضحيه .. ناظرت فيه وانا قرفان قلت مانيب فاضي والله قله يجيب قصاب ويفكنا لا يجلس يملينا دم وقلة حيا .. وقف وقال ليش يجيب قصاب وهو يعرف يذبح .. تأففت وطالعت في شكله هو ويا قميصة المقنزع وقلت رح الله يرضى عليك جعله في خشمك هاللي كنه ركبة عجوز مثنية .. قالي تعال .. قلت طيب خلاص ابنزل انت وخالك هاللي مسوي نفسه رامبو كل سنه نجلس ست ساعات في ذبيحه وحده وكأن حنا ناخذ اعترافات الخروف ..
ناظرني وهو يقول بالعكس خالي يعرف يذبح .. قلت يا عمي طير انت وخالك .. تذكر العام الماضي .. يوم جا وسوى زحمه ومسك الخروف وقلبه وجلس عليه وقام يصفط في رجليه ويعفط في يدينه .. اخر شي مل الخروف وأخذ السكين من خالك وذبح نفسه .. ترى خالك ما عنده سالفه
وأنا اتكلم سمعت صوت خالي وهو يصارخ يقول ( أبو هديب ) تعال ساعدني .. قلت طيب جاي .. نزلت وأنا لابس قميص قصير عشان الدم .. أول ما شافني خالي قالي وهو يضحك وش هالقميص كنك شغاله منحاشه من كفيلها .. قلت وأنا اضحك بالله عليك أنت شفت سيقانك هالسود كنك تسوي دعاية تبرعات للزلزال للي ضرب شرق اسيا .. أنا قلت كلامي على طول ناظرني بطرف عين وهو يقول تراني خالك .. قلت وأنا أدنق براسي عارف أجل امي .. خلصت كلامي ثمن قال تعال يا الله ادخل معي عشان انطلع الخروف .. قلت طيب
دخلنا للحديقة عشان نطلع الخروف .. وأنا متحمس مسكته وقمت أسحب فيه وخالي يصارخ .. وخر .. هذا أنا .. على طول فكيت ثمن قلت وش جابك في يدي .. قال انت اللي ما تشوف ماسكني .. قلت والله تبي الصدق يا خالي لخبطت بينكم .. حاول تحط علامه عشان افرقك عن هالخروف أحس انه اخوك من الرضاعه .. ما امداني اكمل كلامي إلا سطل الموية حق الخروف جاي في وجهي على كم سبه على كم وعد على كم تشويت .. ثمن بعدها قلت آسف
قالي وهو معصب رح جبه أنا استناك برى .. قلت طيب ..و دخلت ثاني مره وجيت عند الخروف .. وناظرني بطرف عين .. ثمن قلت وش فيه .. وأنا اناظر حسيت أني صرت افهم لغة الحيوانات .. على طول سمعت الخروف يقول .. يرحم امك فكنا من خالك مستعد أموت بالرصاص لو تبون بس فكنا من خالك عليه ريحة اباط .. قلت بصوت واطي وش تبيني اسوي أدري انك تتعذب وحنا قبلك تعذبنا لكن الحمد الله فقدنا حاسة الشم مع مرور الوقت ومع كثرة زيارات خالي لنا صرنا نحط خشومنا على الكمدينة الين يروح ثمن نركبها ثاني مره ... قاطعني الخروف وهو حول ما يصيح .. ( أبو هديب ) بالله عليك عطني فرصة بس اخذ عزم واضرب راسي في الجدار عشان اموت وارتاح .. قلت يا بن الحلال اذكر الله ترى اللي تسويه انتحار والانتحار حرام .. قال طيب وش اسوي ما عندي استعداد اني اشم خالك .. قلت شف اجيب لك حبوب راس وإلا اني أسد فتحة خشمك بفوطة بيالات ..
وأنا اتكلم مع الخروف صرخ خالي ( أبو هديب ) وش رايك نجيب لك شاهي عشان تكمل الجلسة .. كل هذا عشان اطلعه .. التفت وقلت طيب ابجيبه .. وانا ملتفت انطلق الخروف وطلع برى الشبك .. وحاول يمسكه خالي وفلت منه .. وقمنا نلاحقه .. الين طب عليه خالي ومسك في رجليه وقام الخروف يسحبه في البلاط وغسل فيه الحوش .. وخالي يصارخ وقفوه بطني ولع من الحرارة .. قلت طيب واطمر على الخروف واوقفه ونكتفه ويجي خالي معه السكاكين .. ويمسك رقبة الخروف ويجلس يحرحر فيها يمين ويسار .. والخروف يصارخ .. وانا لاف وجهي من الجهة الثانية .. والخروف يصارخ واخوي الصغير يقول فكوه .. وخالي يقول اسكتو خلوني اعرف اركز .. قلت وش تركز انت بتشوت بلنتي .. والا بتقطع راس .. قال اسكت .. وهو يتكلم وانا اناظر في الخروف اللي قام يرفع يده ويتشهد أو شكله يدعي على خالي ..
وخالي يقول ثواني واخلص .. قلت وش تخلص يا خالي والله لو انك تحلق له دقن كان خلصت .. قالي اسكت قلت شف يا تنهي هالمهمة المستحيله يا توم كروز والا قمت وخليتك .. قال طيب شوي اصبر وحنا جالسين نصارخ كان باب الحوش مفتوح دخل علينا إمام المسجد وأول ما شاف الوضع .. على طول طمر وشات خالي وهو يقول اتقي الله في نفسك .. وش جالس تسوي ما يجوز عليك تعزر بالذبيحه كذا .. اذا اردت ان تذبح فأرح ذبيحتك .. لا تصير مثل اخوانا العرب يشتغل سباك واذا جا وقت الضحيه صار قصاب ويقطع من أي مكان مهوب عيب انك تقول ما اعرف لكن العيب انك تسوي نفسك تعرف هذي روح لازم تعرف كيف تتعامل معها وهي تحس مثل منت تحس .. والشيخ يتكلم قام وذبح الخروف وطشم الدم وخالي جالس بعيد يقول يا شيخ الانسان يتعلم .. قال الشيخ يتعلم صح بس ما يتعلم بالتجارب .. يتعلم بالشوف ويكون معه شخص يعرف عشان يقدر يتعلم هي مهيب لعبة في يدينك انت وعيال اختك .. قلت يا شيخ انا ما لي دخل .. ولو ما جيت في الوقت المناسب كنت أبصور الحدث وارسله لحماية حقوق الحيوان عشان يحاكمون خالي محاكمة ارهابية ..
التفت علي الشيخ وهو يقول الله يجزاكم خير لا تصيرون مثل خالكم افدغ .. قلت والله يا شيخ انا انسان مواصل لي أكثر من يوم وأحس ان مخي قفل معد استوعب عشان كذا ابروح انام والله يجزاك خير على المعلومات اللي اثريتها لنا واللي راح تفيدنا في حياتنا العملية .. وانا معك يا شيخ
في كل كلمة قلتها الانسان يتعلم صح .. لكن لازم يكون شخص جنبه عشان يعلمه ويفهمه ويكون تحت اشرافه .. وفيه ناس كثير تحاول انها توفر مية ريال قيمة ذبح .. عشان يذبح هو وما يفكر أن هالبهيمة نفس وانها تحس بالالم لو حاول يذبحها غلط والا انه يعزربها .. لكن اتمنى ان فيه ناس تسمع كلامك يا شيخ ..
وانا هالحين استاذنكم ابي اروح انام ...
( النهـــــايــــة )
صكيت علينا 
والله قسم بالله فطست من الضحك 
تسلم ونستني
العرض العادي
