هذي قصيده الأمير فيصل بن خالد بن سلطان بن عبد العزيز
في رثاء ولد عمه الأمير :محمد
طوح سبوقه وانتهض وادرج الحوم
واطيري اللي عقب النجم ياعم
أصيح يامحمد ..وأنا أطيح وأقوم
والله يبيحه راح وماقال لي تم
سبقت طيرك بالهدد وانت محشوم
كذا الحرار تموت ياللي تبي العلم
للوكر تلويحة شياهين ورجوم
وللصدر صرخة موجع مالقت فم
قفى ..وأنا وجل حزين وملكوم
والقلب ماهو للفراق متولم
وعيني مخاشر دمعها قلة النوم
واقصى معاليق الحنايا ترزم
والشعر ابيه..ولا يجي جعله القوم
من عقب أبو خالد قصيدي تيتم
من فايت الجمعه وأنا تقل منجوم
أربع عشر ليله وانا مونس الهم
هو مات كساب الثنايا روحي التوم؟؟!
راعي هلا ويامرحبا وأبشر وسم
وراعي علوم تطلق الوجه وسلوم
نبكي عليه ونذكره وانتبسم
كريم طبع سراج ربع أفتل عزوم
عشاق رفع حجاج أبوه ورضي أم
عزاه يامحمد ... سند كل مضيوم
رحماك يامجري السفاين مع اليم
لوشفت كيف عيال عمك هاك اليوم
وقاف وجموع المعزين تلتم
صبح العزا والقصر بالناس مزحوم
والفقد كايـد والحضور امتجهم
يالله عساه بجنه الخلد مرحوم
ويالله تنور له بقبره اليا اظلم
يالله زبنتك لا اعتراض ولا لوم
يافارج الكربه وياجالي الغـــــــم
عزالله إنه غيب الموت زيزوم
وعز الله إني فاقد لي ولد عــــــــم
العرض الشجري
