مرة من المرات .. معزوم(ن) عند ناس((لا يا شيخ)) والله واسمعهم يحتسون ويقولون ان البترول .. تراه بقايا كائنات حية متحلله .. وهم متحمسين وخذ سواليف ونصب .. سألت واحد بجنبي قلت وش السالفة ؟؟ قال : لا يقولون اليوم تبي تمطر (صرفني) .. قلت لا جد بالله وش يقولون .. قال انهم يتفلسفون ويقولون ان البترول شجر ونخل واثول مدفونة من مبطي وابد مع الوقت جانا البترول عقب ما تحللت.
انا ما صدقت خبر !! <<-- مفهي ...ومن طلعت من مجلسهم صارت لي هالسالفة..
طبعا بعد ما سمعت كلام هاللي بجنبي.. وانا اعض شليلي .. وامغط لم ابوي ..
وادخل عليه والقاه في المجلس يتسدح .. قلت يبه .. ابشرك خلاص امورنا تبي تزين واحوالنا تبي تصير ما يحتاج ..
قال لي ابوي : اقول همّز وكل تبن
قلت : يبه .. انت وش تسوي بالفطيسة.. قال : أدفنها .. جعلي ادفنك !!
قلت حلو !! حلو !!
قلت له : من متى وانت تدفن هالغنم والبقر في المزرعة ؟!
قال : والله يا وليدي من عرفت نفسي .. هذا سلمي وسلم ابوي وجدي .. الفطيسة ندفنها <<-- زين السلم جدك يدفن وانا ادفن وجدانا يدفنون..
وانا : اخم ابوي واقعد اجغفه .. وابوسه .. .. قلت يبه جانا الفرج .. بيتنا اجل فيه بترول .. تو يبه انا في عزيمة .. وقاعد اتسمع لهم احسبهم يحشون فيك عشان اعلمك .. لكن صاروا يحتسون عن البترول .. وسألت واحد منهم وقال لي : ان البترول يجي اذا كثرن الكاينات الحيه <<-- ما اعرف اقولها بالفصحى
في الارض .. والحمد لله مزرعتنا .. من عرفناها وحنا ندفن فيها هالكاينات اللي هم يقولون ..
فز ابوي من مكانه .. وقال انت تقوله صادز !؟
قلت له : وش دعوى : كبرك انا امزح معك !!
قال لي ابوي والله لو يصير هالكلام صح يا البدرررر .. ويظهر في بيتنا بترول .. والله اني لأركبك معي في الغمارة <<-- دايم مجحود في الصندوق
قلت يبه : الا صحيح ونص !! البترول فيه .. فيه
ونقعد نطامر في البيت ونصارخ !! بيتنا فيه بترول .. او يالله .. وكل البترول كلهم لا فرق الله شملهم ..كل البترول خيالة !! وانواع الرقص وانواع المطامر !!
واللي خلاني أتأكد زيادة ان بيتنا فيه بترول قاعد(ن) اشرب مويه واحس فيه شي(ن) لزج في اثمي .. وحسيت ان الدنيا لفت بي
قلت بس هذا البترول اختلط مع الماء .. واقعد اعبي من الماء وابيع قدام بيتنا وباسط(ن) بـ جيوك 25 لتر <<-- بزعمي اني ابيعه خام
واقعد اعبي الدفايات والسيارات .. من البزبوز .. وصرنا نسبح به من زود الفسقة .. بس ودنا نصبر الين يطلع هو من نفسه وتفجر الارض ..
دروا كل الجيران .. وكل الجماعة اللي في المسجد ان عندنا بترول ..
وجوا لمنا يهنونا .. ويقولون مبروك عليكم البترول ..
صرت البس كنادر حبوب .. وصرت اسمي الفلوس ( دراهم ) .. واسمي العنناص أناناس
<<-- ودي اكشخ بس ما اعرف .. وصرت اروح اشتري من البقالة .. واقوله : سجل صديق واذا طلع البترول عطيتك !! ويرد على ابو هنود : ويقول لي ما فيه مشكل عمي البدوووور
وصار كلن يقدرني .. اذكر اول اذا جيت اروح العب كورة .. يقولون لي : جاء ابو نخرور وش يبي <<-- ويصرفوني حارس .. واذا جا بلنتي ما يخلوني امسك .. يقولون لي رح اجلس ورا الحارس عشان تجيب الكورة
والحين .. اول من يختارون انا .. .. وكل(ن) وده يختارني قبل !! وصاروا ما ينفخون علي ..
واقعد افكر واقول صدق المثل اللي يقول : ( البترول يغير النفوس) ا
صار ابوي .. كل مغرب يجلس في البيت .. ونجيب له كرسي يقعد عليه .. وانا واقف بجنبه .. وناخذ المعاملات من الناس المحتاجة .. واللي يبون مساعدة ..
وكل(ن) صار يجي لمنا .. واللي يقول انا مديون .. واللي يقول : انا ابي حراثة .. واللي يقول ابي ارض !! يا اخي هالناس ما قد شافوا احد عنده بترول الا حنا <<-- كل تبن اقول !!
كانت امي تدرس في محو الامية .. ما عمرها نجحت في حياتها ولا مرة !!
يوم طلعت النتايج واثرها .. صايرة الاولى على الفصل .. ومكتوب على شهادتها .. رقم جوال المديرة تحت
وابوي حلف ان جتنا بنت : والله ان يسميها ( قاز ) .. وصرنا عايله ما يحتاج ..
اذا مريت في الشارع كل(ن) يسلم علي .. ويحببوني .. حتى المصري النصاب حق الحلاق !! درا ان عندنا بترول .. وقال لي :
بص يا بدر أنا حأعمل لك حتة تحليأة (تحليقة) ما تخرش المية !!
قلت اقول : اها بس وعن الخربطة .. وسو لي (توليت ) <<-- محروم منها ايام الدجة .
قال انت تأمر يا باشا <<-- انا يعني .. قلت حلق لا والله أدير صابرك .. وهو يحلقني والله ويسفر وجهي .. واغدي ما عندك باحسن مني ..
وادخل يدي بمخباتي .. ابشوف هو يبي الفلوس والا لا .. قال والله ما تدفعش حاقة يا باشا خليها علي .. قلت بكيفك <<-- والله اللي ما صدق
المهم حالتنا صارت على كيف كيفك .. وابوي ما يصدق على الله ان به عنز(ن) مريضة ..او بقرة(ن) بها كسر على الخفيف .. على طول دفن !! والله مير صار ما يناظر .. يدفن وهو عجل
صارت المزرعة والبيت .. انواع الخياس .. قسم بالله من بعيد تشم الخياس ..
وابوي يشم الريحة .. ويقول : ااااااااااااااااه يا ريحة ابوي وامي ايه هذا البترول السنع مهوب بترول الدمام ... قلت له اي والله هذا البترول السنع .. حتى يوم اني اذوقه مع الماء ذاك اليوم يوم يلزق لساني في لهاتي من قوة لزوجته.. بيّن انه بترول(ن) جيّد
وصرت ما انا م في الليل .. ألبس ( خوذة ) <<-- مثل حقين ارامكو وأجلس بين الشجر احرس البترول .. أخاف يجيه احد لا قدر الله <<---
وصرت ما انام .. وانواع الحلوم .. في هالبترول .. اتخيل انه طلع خلاص ..
واننا صرنا من عيال المطخطخين .. وأقعد أفكر .. واقول وش بسوي بالفلوس حقات البترول الحين .. ..
مرة اقول ابفتح مطاعم .. ويصير لي مطاعم واسميها (( ماما بدر ))
ومرة اقول لا ابشتري معرض سيارات .. وخذ تفكيرات .. حت شعر رمشي وانا افكر !!
وكل صبح اقوم وارش الارض مويه .. ابوي قايل لي عشان يصير البترول .. مابه رصاص .. احشر والديه مويه .. ومن زود الحرص ملزق على بيتنا لوحة .. كاتب(ن) عليها ممنوع التدخين
يقعد يشب البترول .. همن ابلش عاد !! من يبي يطفيه !!
وكل ظهر .. ما عمرنا سوينا غدا(ن) ابد .. كل يوم .. ناس جايبين لنا غدا .. وما تشوف عينك الا تلميحات .. اللي كاتب(ن) على ماعونهم ( نفط )
واللي حاطين بزار وكاتبين عليه .. بترول بالبصل .. واي شي يطري على بالك من انواع التلميح ..
المهم مرت الايام ...وكبر أبوي وأمي بعد .. قال لي أبوي : البدر
قلت : هاااااااه <<-- تعرفون ولد نعمة
قال : الظاهر ان ما به بترول .. قلت فال الله ولا فالك !! الا به بترول وامور(ن) سنعة وش هالحتسي ؟!! .. خل عنك حتسي ابو حدرية جارنا تراه يحب الشر !!
بيني وبينكم .. طقني الهوجاس قلت : تخيل ما فيه بترول ؟!! وش يبي يصير وضعي قدام العيال .. واقعد افكر .. الله تبي ترجع لي ( ابو نخرور )
وغلام راعي البقالة .. تبي تصير نفسه شينة(ن) علي .. ويبي ينشب في حلقي يبي فلوسه .. وأمي يبون يصقطونها هاللي ما يخافون الله
المهم ... مات الوالد وصرت اجلس بمكانه اشوف أمور الرعية !! <<--مهوب عاقل
سمع بخبر البترول واحد من اعز اصدقائي .. اسمه ( سالم ولد الدلالة) <<--عاد انتبهوا ذا يتكلم عليه احد .. والله لأفرشه .. من اعز اخوياي
قال لي : يا البدر شف حالك وشلون ؟؟ تدهورت صحتك وعيونك صارت تسنها متساوي في رقبة صلبي .. ما صرت تنام .. لا عادت عليه بترول
وانا اخوك فيه شركات بـ 500 ريال تكشف لك عن البترول هو صحيح موجود ولا لا .. وريح نفسك يا اخي .. منها انك ما تعيش في وهم .. ومنها ترتاح وتريح هالناس ..
قلت : هاه والله انها مهيب شينة !!
قلت باتسر ان شاء الله اجيب هاللي يكشفون ..
ويضيق صدري وارجع افكر مرة ثانية اقول لو ما يصير فيه بترول وش يبي يصير !؟؟؟؟
قلت اعوذ بالله من الشيطان الا به .. وراي قمت اوسوس انا ..
المهم واجيب لك ذاك الفلبيني .. واوكله اكل ما ياكله ابن امه <<-- ينقالك رشوة
ويجيب عدته .. واغراضه .. عشان يكشف على الارض يشوف بها بترول والا لا ..
ويجي يدخل حديدة(ن) معه في الارض وتوافق لها .. بطن حاشي <<-- دافنه المرحوم
يوم انشق بطنه .. قلت بس هذا البترول
هلا والله بالبترول .. صحيح ما عقب التعب الا الراحة ..
قال سالم ولد الدلالة : اركد !! اركد !!
وهو يغير المهندس مكانه .. ويقعد يتفحص .. ويقلب عيونه .. هالفلبيني .. ويدور .. ويتشمشم .. الخياس ذبحنا .. وهو يقول صبر صديق ..
وحنا نحتري .. جا الخبر اللي نزل على نزلة الطشت على الراس <<-- يسمع بالحكم والامثال
قال : شوف بــــدر .. بترول هنا ما فيه .. ويقعد يشرح الفلبيني لسالم ولد الدلالة .. بالانقليزي .. وانا اقول لسالم .. انهج وش يقول لك : قال انه يقول : مابه ولا حتى غضارة بترول
قلت وشو !! وانا امسك الفلبيني مع حلقه .. قلت له روقنا الله يرحم امك .. والماء اللي مختلفة(ن) ريحته وطعمه و ش يصير ما ملا عينك
المشكلة البشرية متجمعين .. وسمعوا كلام المهندس الفلبيني وهو يقول : بترول مافي !!
ويدلون يحتسون .. يقولون : ترا بيت الــبــدر ما به بترول
ويتجمعون الديانة وكل اللي انا متسلف(ن) منهم .. حتى الحلاق جحدني وقال جب الخمسة حقت التحليقة ...
المهم رجعت اموري مثل اول .. واردى .. ونزلوا الناس قدري أخس من أول ..
انا ووجهي اقول يمكن ان هالخياس اللي في الماء هو بدايه تحلل الفطايس الى بترول وبشرت اهلي وصار في الاخير عقب التحليل للمويه ان البياره منفجره على خزان الشرب والبلاااا في الصرف الصحي الخايس في منفوحه .. وبحلت في هاللي عبيت لهم بنزين عقب ما خبطت مواترهم
بس الحمد لله استفدت من هالقصة امور(ن) واجد :
منها :
اكتشفت اننا نحرص على راعي الفلوس نقدره ونحترمه .. والداج ما نعطيه وجه . ا
- أي خياس تراه مهوب بترول <<----- جتني عقدة نفسية لا تلوموني
- اللي عايش في وهم يصحى ..
- الله الله بمواصيركم يا حقين الصرف الصحي <<--صلحوهن يمال الغناة
- لا احد يروح لم عزيمة <<-- حقد عقبها
- العجله في كل الامور شينه
أخوووووووووووووووكم ... كلاشينكوف *7
العرض العادي
