مساء الخير ـ هالمره ـ بلاش آسف على التأخير
........................... مدام الرد بعيونك دموع فكل تأخيره
ثقل دم العذر ، والا كسح وجه الخطا تبــــرير
.........................مدامك عارفه طبعي . أجل وشوله الحيره
ترى ماجيت لجل اسمع سواليفك عن التقصـــــير
....................... أعرف ان الخطا مني (بلاش نعيد هالسيره)
انا وانتي بهالدنيا تحملنا بعضنا كثيـــــــر
........................ تعوّدتي على عنادي ، وصرت آحب هالغيره
انا وانتي حكايتنا مثل : صدر السما والطيـــر
....................... كثير اللي يطالعها ،، ولحدٍ طالها غيره
انا وانتي حكايتنا .. مثل لعبه ، وطفل صغيـر
........................مع انه دوم يهملها رفض يسمحبها لغيـره
انا وانتي .. وشاوصفلك ؟ عجز عن وصفنا تعبير!
..................... مثل ! مدري ! مثل وشو ! ولكن صعب تصويره
انا وانتي ـ بلاش انتي ـ أنا ـ لو بفقدك شيصير
...................... ومجرد طاري الفرقا علي ياصعب تأثيـــره
أحبك ؟ ايه أحبك .. ذي بعد يبغالها تفكــــير
.................... يخلف الله على عقلٍ ملكتي كل تفكــــــــيره
تعالي .. نحترم ( شيبة غلانا ) .. لعنبو التصوير!!
................... تعالي نغتنم فرصة لقــــانا دامها قصيـــــره
ومساء اللي تبي ، حاضر ولاتزعل ( صباح الخير )
................... أنا كل يوم بتأخر .. اذا في دمعـــتك خـــيره
((قــايــد الــخـيـل))
العرض العادي
