السلام عليكم ورحمة الله وبركاته
بحط ذا الموضوع للغزلان الشارده بعض الأفخاخ الي تسهل عملية صيدالتمساح بلاء عناء يذكر ....
لحظه
هيه خيرررررررررر ياطيرررررررررررررر أشوف الأخ قاط(ن) معنا يالله أقضب الباب الموضوع ذا للسحالي بس
ألي جميع السحالي (لأن تمساحه مدري شينه في حقنا )أكنا جميلات أو غير جميلات (ودي أقول قبيحات بس أخاف أجرح شعورهن .........أيه هين أخاف أنتي وحدة (ن) منهن )
ألى كل سحليه نشبة(ن) في حلق أهلها وماتصرفت مع أنهم حاطين معها أختها مجانا (لترويج البضاعه المتحرجمه في البيت )
أليك عصارة راسي وبنات أفكاري أضعها بين يديك ....
كيف تصطادين تمساح ........دون اللجوء للأساليب المعهوده والسقيمه (المغازل ،الترقيم،التميلح الي ماله سنع،الترزز بالاسواق .......الخ )
للأجابه على هذا السؤال اليك مايلي :
أهم نقطه :نشني على العجوز الي حاطة(ن) عينتس على ولدها ثمن نفذي مايلي :
1-خليتس مع أمتيس لاتروحين مع البنات وتهيبلين ماورى ماتهيبلتي أصبري عنهن كم شهر لين تتم العمليه ..
2-أمشي وأنتي حاطة(ن) رأستيس بين كتوفتيس لاترفعينه أبدا حتى لو يصير كله صعارير (خلي الفكس دائما في متناول اليد ) علشان يقولون مؤدبه ومب متكبره ...
3-كلمة خاله خليها على لسانك وخاصة(ن) لأم التمساح علشان تحس بنوع من التميز عن بقية العجز ...لامانع تنادين وحده ثانيه بخاله علشان أذا مانجحت الخطه مع العجوز نمبر ون تنجح مع الثانيه اتبعيها كخطه أحتياطيه (يعني ستبنه )
4-أذا بدت أمتيس تتكلم انغزيها بكوعتيس ،علشان تدخلك بالموضوع حتى لو مالك داعي تطبيقا للمثل (كثر الطق يكسر الحديد) أدري أن المثل ماله داعي بس مالقيت غيره
5-أخوتيس الصغار لاحقيهم وطامري وراهم وين مايروحون حتى لو مب عادتيس بس تصرفي معهم كأنك أمهم لأن هذا يوحي بما لايدعو مجال للشك عند العجوز بأنك حريصه على ذريتس (جعلهم عقبتيس)
6-مهما أكلت أمتيس من أكلة زينه خليها تقول :نفس الاكله الي تسويها بنتي (حتى لو الاكل من المطعم الصيني أو المكسيكي )
7-أذا جيتي بتمدين أيدتيس جعلها الكسر (خربتها) أعبطي خشتيس وتويجعي (مب قوة علشان مايقولون جواره) وخلي أمتيس تقول :قايلة (ن) ليتس وأنا أمتيس لاتنظفين جدران الفله الخارجيه بس أنتي الله يهدتيس ذابحتيس النظافه (جعلي ماأبكيتس أجل بتنظفين جدران الفله ..نظفي غرفتيس أول الي تقولين ثايرة فيها قنبله ذريه )
8-دايم أرتزي كأنك بالعة(ن) قصبه علشان ماينقص من طولك ولا سنتيمتر (للقصيرات)
9-أذا تكلموا الحريم عن أي عرس أكتمي نفسك لين تحمر خدودك علشان يقولون البنت تستحي ومالنا حق تكلمنا عندها (بس لاتكتمين نفسك مره أخاف تروحين فيها وأصير قتلت نفس بغير حق :mad
10-مهما كان موضوع الحوار حماسي لاتبدين رأيتس وخليتيس مثل الطرماء لأن اللقافه تجيب أجل الخطه ....::
11-شعرتيس أفرديه لين يتحسحس لاتخلينه طاير وشوشه مهما كانت الموضه لأن العجز مايدورن الا الي شعورهن ناعمه والا ياعمري الي شوشهن طايره مااحد يلتفت يمهن ---------->>(اعاني من هاالنقطه ).
12-أذا أدلت العجوز (أم المتوهق) بأي رأي سواء كان سياسي أو وطني أو أقتصادي وافقي عليه حتى لو هو ماسخ وماله داعي مثلا تقول العجوز:أمس بوش متقهوي عندنا قولي لها :وليه ماعلمتينا ياخاله نجي نعاونكم
13-في العروس لاترقصين أربضي وأقضبي أرضتيس وأعتبري الرقص عيب وشق جيب ...
14-أذا جاء طاري السوق وطبعا هو لازم يجي الطاري لأنه ملح الجلسه عند الحريم خلي أمتيس (الله يعظم أجر أميمتيس) بناتي مايطلعون للسوق أغراضهم أبوهن يجيبها (وانتي شكلك مقطعه السوق تقطيع )
أحتمال وارد الحدوث
ممكن تكون العجوز منشنه على بنت غيرك لكن بعد النقاط السابق ذكرها بتصرف نظر عنتيس وعنها (أمزح لاتصدقين )
الحين بتكون العجوز وقعت باالفخ نرووووووووح للتمساح الحين :
أهجدي في بيت أهلتيس ولاعاد تطلعين ,,,,,,,أذا جاء المعرس بيشوفك خلي أبوتيس يقوله :والله ودي تشوف البنت بدون ماتدري علشان تأخذ راحتك وانا عمك وبعدين تشوفها على الطبيعه علشان ماتقول بعدين غشيتون (أيه هين ياالشايب لو يحصل حطيت بدالها مشعال بسكلاني والا أليسا والا مايا ...هاالي مطيراتن عقول عيالنا :mad
وقبل يجي اليوم الي بيشوفتيس به بحوالي أسبوع أو أكثر (على حسب شين وجهتيس ) أدهري من مشغل لمشغل (صبغه ،فرد،تنظيف بشره،.........الخ) لاتخلين على روحتيس قاصر ..
[COLOR=blue]ولما يجي المعرس خلي أخوتيس ياقف بجنبه عند الشباك علشان مايطول باالتبحلق ويبان المستخبي وذلك تطبيق(ن) لنظريه اللمحه ذبحه ........
بعدها عاد كيف بيشوفتيس هذي عليتس مب كل شيء بعلمتيس أياه دبري عمرتيس
بس خلي أبوتيس في نهاية المشاهدة يقول:العذر والسموحه وأنا عمك (الأخ ضمن الولد يوم أنه يقول وأنا عمك ) ترا البنت حوسه (مع أنك طاقة (ن) كل زينك بس يعني أني ) ........
في هااللحظه الولد بينط على رأس أبوتيس وبيمطخه لين يشفط مخه وبيقول متى العرس ياعم (اللهم أرحمه فقد كان ولدا بار (ن) بوالديه )
عاد الله يوفتيس ولاتنسيننا من حلاو العرس والكليجا وأياني أياك تعلمين الولد من الي معلمتيس هاالعلوم ولا حتى بأسم المنتدى لأني أعتقد أنه بيسوى مصيبه وأخاف يحط حرته فيني
تحذير
أبعدي عن أمهات العيال الي متعلمات راعيات الشنطه مثل لون الجزمه لأن هذولي يبن خطط بعيدة المدى ..........
نصيحه
رفيقاتيس بيلاحظون التغيرات المفاجئه الي صارت ليتس فأنتي قولي لهم :أنك خلاص أنسانه عرفتي درب السنع والعداله (فاصل دعايه للطقاقه فطومه )
تدرين ليه؟؟خوفا من سرقة الفكره الادبيه ....
عاد أدعي لي لأني من العطله الصيفيه الي راحت وأنا حاطة(ن) عيني على عجيز وببدا أنسج خيوطي العنكبوتيه حولها
والله يفوفقكن البنات
واتمنى الافادة لكن
العرض العادي
