الفرحه هلت والكل يقول الله
ولعزك يابلادي هذا المجد صناه
<< طربانه البنت
تدرون اني اموت في شي اسمه الزعيم والمنتخب السعودي
اذكر يوم مباراة المنتخب والامارات ايام بطولة كاس الخليج ( 18 )<<<ياقديمه.. بيدرون انتس كبيره
ياهي طقتني الغلقه شوي وبيصير شعري ابيض من هول الصدمه
يالبى قلبك يا ياسر يوم انك مغطي وجهك وتبتسي
المهم ماعلينا
من هالمنطلق صجيت اهلي الا اني اروح لمعسكر المنتخب السعودي اشوفهم لو من بعيد
ابي احسسهم اني معهم قلبا ً وتسبدا ً وقالبا ً << ايه هين مادروا عنتس
جيت عند امي واقعد اتحببها واترضاها ابيها توافق بس اني اركب الطياره << مجهزة التذاكر منذ مبطي البنيه
المهم ان امي شافت عيوني سوداء من كثر ماسال الكحل من دموعي وقالت لي :
يا حسافه انتس بنتي أجل تبين تراكضين عند الرجاجيل !!؟؟
قلت لها : أي اراكض يمه الله يهديتس هذا المنتخب السعودي
قالت : ايه يصير خير
قلت لها : هااااه وش قلتي أروح والا لا بسرررررعه يمه قبل تفوتني الطياره
قالت : روحي وسلمي لي على سعد الحارثي
قلت : أوووخص يمه تشجعين من وراي ولااااا النصر بعد !
قالت : روحي لا اخليتس منطقتن في ذا
بعد يوم كنت في ارض المطار في تركيا وفي نفسي اقول
جايتك يا المنتخب جايتك
وسيييييييده رحت للسفاره << مب سهله
قلت لهم أنا مهره من السعوديه وجايه اشجع المنتخب السعودي في المعسكر وينه فيه يا الاخو ؟؟
رد علي الموظف : خير خير خير خير خير خير << مسك خط
انا : هـو ! وش فيك ؟؟
الموظف : وش اللي وين المعسكر ؟؟
انا : يا بن الحلال انت وش دخلك ؟ << قويه البنت
الموظف: تعالي طقيني كف ازين
انا : طيب طرااااااااخ .... أحسن تستاهل هذا اللي علموك اياه في المدرسه انك تتطنز
على خلق الله ولا تساعدهم
الموظف : طيب طيب << بعد ما طاح وجهه
انتي صحفيه والا وش السالفه ؟
انا : لا وين صحفيه الله يخلف انا مهره من الرياض واشجع الزعيم
والمنتخب السعودي فقط وحابه اني اشوف المنتخب واسلم عليهم فيها شي !!
الموظف : لا لا عادي خذي راحتس
المهم انهم ودوني للمعسكر ويوم اقبلنا يمه قام قلبي يدق بسرررررعه
قال السواق : هذا هو المدخل حق المعسكر قولي لهم انتس صحفيه والا احلمي انتس تدخلين
انا : طيب والله انك اطيب من اللي تو
نزلت من السياره ومعي شنطه كبيره شافني رجل الامن وقال لي :
من انتي ؟
قلت له انا الصحفيه مهره من صحيفة الود
هو : آهااا ماشاء الله هذي صحيفه مشهوره مره
انا : افاااا عليك مايحتاج بس انت دخلني لا احوس وجهك
هو : تفضلي ادخلي
اول ما فتح لي البوابه شفت زولن يا ويل قلبي بس .. شفت ياسر يتمرن ويسوي حركات داخل الملعب
جيته ركض طايره واناديه يااااااااااسر
هو التفت مستغرب وش ذا !! صوت بنت وفي المعسكر !
ياسر : هلا نعم
انا : ياربيه مانيب مصدقه !
ياسر: وشو اللي مو مصدقته ؟ ومن انتي ؟
انا : مو مصدقه اني اسولف معك انا ( ..... ) <<< اسمي قلته لياسر اما انتم بكتب لكم ( مهره )
<< لا تشرهون عليها مفهيه
انا مهره من الرياض
ياسر : حياتس الله بس وش تبين فيذا ؟
انا : ابي اشوفكم واشجعكم
ياسر: جايتن من الرياض علشان تسذا ؟
انا : ايه .. وهو انتم شويه
ياسر : يبتسم
انا : اقول تراي جايبتن لك من الرياض مرقوق وكليجا وورق عنب واشياء ثانيه
ابيك تتغذى زين وتورينا الاهداف الزينه
اذا خلصت تمرين تعال عند المدرجات علشان ناكل سوا
ياسر: ههههههههههههههههههههههههههههههههههههههه
انا : وش فيك تضحك ؟
ياسر : لا ولا شي طيب بجي لا تخافين
انا : يالله رح تمرن وعجل علي
عقب التمرين جا ياسر والشلهوب والحارثي
واناعاد كنت متكيه عند الشنطه فاتحتن هالحوافظ اللي يبي ياكل يجي حياه الله
قال ياسر: هذي مهره اللي قلت لكم عنها تراهم ماصدقوا يا مهره انتس من الرياض وجايتن فيذا
انا : افا ياذا العلم يعني انتم ما تدرون بمكانتكم في قلبي
وحنا نسولف جا ( حسين عبد الغني ) وقال عطيني ورق عنب ياخاله ورمى ريالين وراح
انا عصبت عليه : انا خاله تخلخلت عظام العدو
وقمت أبي اهبده على راسه من ورى الا ان الحارثي مسكني وقال يا بنت الحلال اتركيه حنا جايين نسولف معتس موب نتهاوش
انا عاد استحيت مررررره هذا وهو الحارثي الله يعين لو انه ياسر
التفت عليه وقلت له : ايه ترى امي تسلم عليك ياسعد وتقول كل من المرقوق علشان تصير مربرب ووش حليلك موب هايفن ونحيف
الحارثي قام يطالع ياسر والشلهوب وهو مستغرب وفيه الضحكه
اما الشلهوب كان ساكت ولا سولف
المهم انهم اكلوا وانبسطوا وراحوا عاد يتمرنون وانا ودعتهم وخليت الحوافظ عندهم ياكلون منها
وطلعت من المعسكر وجيت الرياض البارح
وبس
اتمنى ان كيبوردي رسم على شفايفكم البهجة والسرور
مــهــــــــــــــــــره
ذكرياااااتي في مـعـسـكــر الـمـنـتـخــب...!!
العرض العادي
