صبآح ../ مسآء [ الــورد ] للكل ..
طبعآ الحلا هذا جدآ جدآ سهل وطعمه مره حلو وفوق هذا كله شكله مره انيق ..!
طبعآ انا سويت الحلا لكن الصور الموجوده في الموضوع منقوله ..
وهذي صوره ثانيه له
[ المقآدير ]
رقاق سويتز او لوزين
قرفة مطحونة
سكر ناعم
قشطة أي نوع تحبين
علبة نستلة + 6حبات جبن كيري
شيرة
زيت للقلي
[ الطريقه ]
أول شي نجيب الرقاق ونأخذ منه كمية ونقسم الرقاق من النص بالعرض طبعا ونغطيه مانخليه مكشوف عشان ماينشف ويتكسر
بعدين نأخذ شريحة من الرقاق وندهنها شوية قشطة مو نكثر مجرد دهن بس
ثاني شي ونرشها سكر مطحون وشوي قرفة ونلفها زي الشكل اللي في الصورة ونقفلها من الجوانب والأطراف زي مانقفل السمبوسه
بعدين نبدأ نرصها في صينية التشيز كيك بالطول
إلى أن تتعبى الصينية بهالشكل [ طبعا ترصينها قبل ماتقلينها عشان تعرفين الكميه بالضبط ]
بعد مانخلص نبدأ نقليها في زيت حامي ونقلبها بسرعة عشان ماتنحرق
ونرشها شوية شيرة مانكثر
نخلط النستلة والكيري في الخلاط ونصب نص الكمية في قاع الصينية لازم نفس الصينية اللي رصينا فيها الرقاق في البداية
وندخلها شوي الفرن لحد ماتجمد الخلطة
وهذي صورتها بعد ماطلعتها من الفرن
بعدين نبدأ نرص الرقاق في الصينية فوق الخلطة بهذي الطريقة لحد ماتتعبأ الصينية
ونجي لأهم خطوة فكي الصينية بشويش من الجوانب وارفعيها بس مو للآخر لحد طرف الرقاق
وياليت هنا أحد يساعدك ويمسكها لك وإنتي تربطي [ الشريطة ] حوالين الحلا
وهذا الشكل [ النهآئي للحلا ] ..!
/
طبعا زي ماقلت لكم الصور منقوله لكن من تجربتي اذا كنتي [ مستعجله ] ممكن تستغني عن الخطوه اللي فيها تحطي النستله والجبنه وتدخليها الفرن انا سويتها من غير هالخطوه واعطت نفس النتايج .. الخطوه هذي تحلي الشكل أكثر .. بس ماتفرق في الطعم كثير ..!
ثاني شي ممكن تزينيها بآي شي عندك ممكن برش شوكلاته فلوتات او فليك ../ ممكن مكسرآت .. وعآد انتي وابدآعك في تزيينه ..!