قصــيدة أعجبتني وحبيت انقلها لكم ...
صراحة ما ادري من كاتبها ولا ابي اهضمه حقه لكن كل اللي اقــدر اقوله ...
صح لسانه
فز قلبي من ضلوعـه و امتحنّـي=و ارسل الونات ونه عقب ونـه
جاوب الونات دمعي و افضحّني=شف عيونـي بالمدامـع جاوبنّـه
ضاق صدري من همومٍ غربلنّـي=قلت افجّر ذا الهمـوم المستكنّـه
طال ليلي من عيـونٍ سهّرنّـي=مخطي اللي قال قرب الخل جنّـه
اتوجّـد و العـذارا عذّبـنّـي=يا رداهن كيف ما فيهـن محنّـه
العـذارا لـو يجنّـك يحلفنّـي=لا تصدق كـل حلـفٍ يحلفنّـه
و العـذارا مجرمـاتٍ يسرقنّـي=كل قلبٍ لو تركهن مـا اتركنّـه
كاذبـاتٍ خادعـاتٍ يخدعنّـي=و الليونـة سـم دابٍ ينفثـنّـه
لو يقولن ثـم يقولـن يكذبنّـي=والممثل من قصصهن جاب فنّـه
اسمعوني و انشروا ذا القول عنّـي=قولوا فيصل ما غوا في كشف ظنّه
في دلعهـن و النعومـه يطربنّـي=و النوايا قتـل خبـلٍ يطربنّـه
يالعجايب من ضعوفـن يغلبنّـي=يا غبونـي لـو قليبـي يشعفنّـه
ما خبرنا شاعـرٍ فيهـن يغنّـي=كود يذكر من شقاهن وش عطنّه
و العواطف والمشاعر يشتكنّـي=و القصيدة من غثاهن مستجنّـه
كم قتيلٍ فـي هواهـن يقتلنّـي=قيس ليلى ذاك شيـخٍ صوبنّـه
و كم حكيمٍ راح عقله ثم جنّـي=و كم زعيمٍ في هواهـن يغلبنّـه
و كم صويبٍ من جداهن لو يونّي=ما شحنهن طول ليله لـو يونّـه
و كم امامٍ له مقـام ثـم سنّـي=حايليـنٍ دون دينـه و أخلفنّـه
وكم فقيرٍ فوق فقـره يقهرنّـي=و كم غنيٍ عقب خيره يفقرنّـه
وكم صبيٍ فالحٍ فـي كـل فنّـي=جنبوا به في الغوايـه و احرفنّـه
و ان تمالوا في عشيـقٍ يعشقنّـي=عزتي لو طاح سوقه مـا شرنّـه
و الشطانه لو تزيد بكـل جنّـي=اشهد انّه يـا الرفاقـه درسنّـه
ذا بليسٍ لو بغـا يـوم يشنّـي=غارةٍ شفـت العـذارا مرسلنّـه
والعـذارا ساحـراةٍ يسحرنّـي=كل كاهن في الكهانـه علمنّـه
قلتها فـاول بيوتـي ثـم اثنّـي=العذارا كـل طيـبٍ يجحدنّـه
يا علي شوق العذارا ما شحنّـي=قر قلبي في ضلوعـي و احتونّـه
العرض الشجري
