ياكثر شوقي لك ... ليا صرت موجـود=وتخيّله وشلـون ... لا صـرت غايـب
ياراعي الفزعـات ... يامنبـع الجـود=ياواحـدٍ رايـه ... سديـدٍ وصـايـب
أنت الأبو ... والطيب لك طفـل مولـود=عنـدك تربـّى ... وقسّمتـه الهبايـب
مع الوفى وافي ... ولا خنـت بعهـود=ولمكارم الأخـلاق ... نِعـم النسايـب
وصفك كما روضٍ ... زهى باروع ورود=به تجتمع في كـل يـوم الحبايـب
أنا أندري إني ... بخوّتك حيل محسـود=ياااكثرهـم ... مـن مبعديـن وقرايـب
لك داخلي قدرٍ ... حشى مالـه حـدود=عـلا وتعـلاّ ... وأعتـلا للسحـايـب
تسرح وتمرح به ... بـلا حـد وقيـود=وحيد مالـك بـه ... شريـكٍ ونايـب
غيرك يجي ويروح ... ماهـو بمعـدود=به وبدونه ... عنـدي الكيـف طايـب
إلا أنت ... يامن غبت بالحـال مفقـود=يفقدك طفل ... ومن به الـرأس شايـب
العرض العادي
