إصطف الجنود خلف قائدهم بشكل منظّم ..
أخذ القائد جولة سريعة بين الصفوف للتأكد من الوضع الإستعدادي ..
عندها تقدم القائد الجميع وأشار برأسه إلى مساعده وبإبتسامه تنم عن الرضى بطلب التحرك
المساعد وبصوت مزّق سكون الإنضباط : " إلى القلعـ ـ ـ ـ ـ ـ ـ ـ ـ ـ ـه "
تحرك الجميع وأمامهم قائدهم ومساعده في منظر يثير الحماس ...
وفي الطريق توجه القائد بسؤال إلى مساعده :
كم عدد الرجال الذين يحمون القلعه ؟
المساعد : هاه !! القلعه !! كم !!
القائد : عسى مهيب تبطي يالشيخ ؟ الحين انا ماقلت لك ترسل فرقة استطلاع ؟
المساعد وهو ينتفض : إلا .
القائد : طيب وش النتيجه اللي طلعت بها انت وراسك ؟
المساعد : في الحقيقه امم !! راحوا بعدين رجعوا .
القائد : في ذمتك ؟
المساعد : قسم بالله .
القائد وهو حمقان : كممممممممممممممممممم عددهم ؟
المساعد : بقول لك شي لكن تكفى لاتزعل على .
القائد : لاحوووول قل اخلصصصصصصص .
المساعد : بصراحه انا ارسلتهم مكان ثاني .
القائد وقد وضع يده على رأسه : ياالله خذ عمره ماابطى اعنبوك وين ارسلتهم له ؟
المساعد وهو ماسك وجهه خايف من الكفوف : ارسلتهم العثيم يجيبون رز ابوكاس مؤونه للحرب .
القائد : وش اسوي فيك الحين !! ادق ثمك قدام الجنود ؟
المساعد : ارجوك .. ارجوك . لاتزعل كل شي الا زعلك وماعليك معنا ناس تعجبك لو تقول قدامنا مليون كلوهم ..
وتبي اثبت لك اسمع :
المساعد وبصوت قوي : الجييييييييييييييييييش ؟
رد الجنود وبصوت واحد : ياااااكُـلك .
المساعد : أكل البرشومي ؟
الجنود : ياااااكُـلك .
القائد : حبه حبه .
الجنود : يااااكُـلك . يااااكُـلك . يااااكُـلك .
القائد وقد ارتسمت على محياه علامات الإنشراح : اقول يامساعد ؟
المساعد : سم طال عمرك .
القائد : ابطلبك طلب !!
المساعد : انت تامرني .
القائد : إيه صح انا القائد . ابيك إذا رجعنا منتصرين تقولونها قدام طويل العمر خلاص ؟
المساعد : ارررررررررررقد ولو تبي نجيب " عسل عسل ".
القائد : خلاص عاد انطم .
قبل حلول الظلام توقف الجميع في منطقه لايفصلها عن القلعه سوى وادي ابا الخشوم ..
المساعد وبصوت عالي : ريّحووووووووووووو .
الجنود : يااااااكُـلك . !!
بدأ الجنود بنصب الخيم وشبّو على القدور ودخل القائد لخيمته للإستراحه..
والمساعد يوجّه الطباخين وقد التقط قطعة لحم من أحد القدور ويقول :
لااوصيكم الله الله في الطبخ المضبوط ولاتنقعون الرز واجد تراه ابوكاس !!
القائد من داخل خيمته : ارررررررررربعه .
وبسرعة البرق دخل المساعد خيمة القائد لكن !!!!
تعكرف في طرف الزوليه وطاح قدام القائد الذي لم يتوان في توجيه ضربه على رأسه وهو يقول له :
تدري وش اللي مصبرني عليك ؟
المساعد : ؟؟
القائد : يجيك ورق مهوب طبيعي .
ابتسم المساعد وهو يقول لقائده : ابشر بعزك وبترقد فايز ..
اثناء هذا الحوار دخل الرقيب عبيّد ومعه الجندي عايض وعبيّد يخبص الورقه ويقول : تكفى ياعايض فيه ناس نبي ندق خشومهم الليله .
القائد ومساعده وبضحكات مجلجله : الميدان ياحميدان وجلنبو جلنبو اللي في راسكم هاتوه .
بدأت الصكّه وكل مااشترى القائد خسر !!
القائد : انا ابي افهم مقابل مركى ؟ ياخي عطنا سرى عطنا لو تبن في وجهك ؟
وضحكات عبيّد وعايض تملأ جنبات الخيمه .
انتهت الصكّه بفوز عبيّد وعايض على القائد ومساعده .
عندها تمّلك القائد الغضب وهمّ بالخروج من الخيمه وهو في طريقه للخروج عبط خشّه المساعد .
عطونا العشااااااااااااااااااااااااااااااا .
انتهى الجميع من العشاء وذهب الجميع للنوم عدى بعض الجنود للحراسه .
وفي وقت متأخر ارسل القائد في طلب مساعده على وجه السرعه !!
المرسول للمساعد : قم قم القائد يبيك بسرررعه !!
============= نهاية الجزء الأول =============