رواية "الا ليت القدر" للكاتبه بقايا شتات..
يوم جديد..
وفي بيت العمه..
سطام جالس وهو ماله خلق..
لطيفه: خلاص ما عاد لك نيه ترجع هناك؟
سطام: والله ما ادري يا عمه..على حسب..
لطيفه: على حسب ايش!! خلاص يا ولدي اقعد واستقر في ديرتك وش لك بالسفر..
سطام: ان شا الله بحاول..
وشاف رهام دخلت عليهم..وسلمت عليه بحياء...
: الحمد لله على سلامتك سطام..
سطام: هلا رهام..الله يسلمك..
وجلست جنب امها ..وهي تسرق النظرات له وتحاول تكون طبيعيه..هذا حب طفولتها كان يعجبها بكل شي ..حتى في عناده وطريقة كلامه ..وشقاوته..كلها كانت اشياء تجذبها فيه..بس ما عمره وضح لها بأنه تهمه بأي شكل من الاشكال..وهي عارفه انها اخر شخص ممكن يفكر فيه ...عشان كذا خلت مشاعرها بقلبها ..احسن من تفضحها للعلن وتكون بس محط رحمه لهم..
دخلت ريماس وواضح انها مجبوره..وسلمت عليه وجلست جنبهم..
سطام انتبه ان فيها شي متغير: ريمو..شكلك تعبانه..
ريماس تجامل: لا عادي..
سطام: ليه ما تجون معاي لبيتنا..هناك البنات وفله..
لطيفه بشده: لا ...خلهم في بيتهم..بكره عندهم دوامات..
سطام: واذا عندهم دوام..راح يرجعون بدري..يله امشوا معاي للبيت..اشكالكم تجيب المرض واضح ان الطفش واصل عندكم..
ريماس لفت على امها تشوف رايها..
لطيفه اضطرت انها تسكت..
ريماس ما صدقت على الله انها بتطلع وعلى طول راحت وضحت الفرحه عليها وراحت هي ورهام يبدلون ملابسهم..
سطام وقف: انا انتظرهم برى..مع السلامه يا عمه..
لطيفه: بحفظ الرحمن..
دقايق ونزلوا البنات وركبوا معاه بسيارته..
ريماس كانت جالسه جنبه قدام..
سطام بدون ما يطالعها وحاط ايده على ذقنه بتفكير: في شي بينك وبين عمتي؟
ريماس انصدمت وارتبكت: ها...لا مافيه شي.. ليه؟
سطام: واضح ان بينكم شي وكبير بعد..
ريماس سكتت..
سطام : رهام بسألك..كيف بنات عمي؟؟
رهام حست ان الدنيا مو سايعتها من الفرحه واخيرا وجه لها كلام..قربت بينهم في الوسط بين سطام وريماس
: من أي ناحيه تقصد ؟
سطام: من كل النواحي...
رهام: مدى تجنن وشخصيتها حلوه..ابتهال عسل وحبوبه..وسلطان شي ثاني..
سطام متردد شوي: ومدى كيف علاقتها بضاري ؟
ريماس لفت عليه بشك..ما تخفى عليها الحركات الشباب..
: تقصد قبل الزواج ولا بعده..!!
سطام حس ان ريماس ذكيه وممكن تفهمه..صرف الموضوع
: انا شفت ان علاقتهم شوي متوتره ورسميه..خمنت ان كان بينهم مشاكل..
رهام على نيتها: اول مدى وضاري مستحيل ما يتهاوشون...بس الحين طيور الحب يجننون..
سطام: احم..اهاااا..."ودخل تفكير عميق مع نفسه"
لحد ما وصلوا القصر..
واول ما دخلوا ..ريماس كانت فرحانه ومتحمسه
: هــــــــــــــأي..."واختفت ابتسامتها فجأه"
ضاري جالس جنب مدى ويضحكون مع بعض ..صح الكل كان يضحك بعد..بس ما انتبهت الا لضاري...الابتسامه هذي ما قد شافتها مرسومه عليه..الا لما يكون مع مدى..
لانا انتبهت لها: ريمو !!!! "وبسرعه راحت ضمتها" اشتقت لك والله..
ريماس تحاول تبعد عينها عنهم: وانا كمان..
سطام كان واقف جنبها وشاف نفس المنظر..ما يدري ليه حسه انه اختنق ومتضايق..وداخله يحترق.
: واضح ان جمعتكم حلوه..
جات رهام من وراه: مفاجأه صح..."وراحت تسلم على الكل "
وجلسوا مع بعض.
اريام: ايوه مدى ..كملي السالفه....
مدى من لما دخل سطام وهي تحس بربكه..نظراته لها توترها..صح تكون نظره وحده بس تكفي انها توترها طول الجلسه..
مدى: وين وصلنا؟
لانا: لما جلستي تبكين..
سطام على طول رفع عينه عليها..
مدى: ايوه صح...جلست يمكن شوي وبعدها جاء ضاري لعندي..
اريام: كيف حصلتها ؟
ضاري مسك ايدها: قلبي دليلي..
مدى لفت عليه وطالعته بنظرات شكر وكأن احساس ذاك الموقف رجع لها من جديد..
ريماس ماتت قهر وتبي تغير السالفه: سطام وين كنت ؟
سطام نفس الشي جمعه مع ريماس ..وحس بمشاعرها..
: انا كنت بسيدني ..صار مصادفه اني كنت مع المعاريس.. بس المشكله ما كنت عارف انهم معاريس ولا كان ما حاولت اكلم مدى واضايقها واخرب عليها الجو..
سطام كان متأكد مليون بالميه ان مدى ما قالت لضاري كل شي .. وتأكد اكثر لما شاف ان ضاري ترك ايد مدى..
كمل: مدى ..قلتي لهم عن الصدفه اللي جمعتنا بنفس اللعبه وكنتي جنبي ؟
ضاري طلع سيقارته..ووضحت رجفة ايده لانها طاحت منه وهو يحاول يولعها..حس نفسه مثل الغبي كان معاها طول الوقت ولا انتبه للي يصير من وراه ..
مدى بلعت ريقها..سطام ابدا مو ناوي خير لها ..الخوف ملى قلبها ..وحست دمها بااارد ويمشي بعروقها ...
وطالعت سطام بعيون عاتبه..
الكل سكت وتوتر الجو..
دخلت بسة دانا..
دانا بسرعه غيرت الموضوع وضحكت: آآآه يا بستي الحلوه..لالي وين كنتي " وراحت تاخذها" سطام شفت بستي..
سطام وقف لما حس ان طفى قهره شوي: هذي لحد الان على قيد الحياة!!
دانا ضمتها: بسم الله عليها ترى اموت بعدها..
سطام: هههه تحطين عقلك بعقل cat..يله يا جماعه بصراحه قعدتكم ما تنمل بس مضطر اطلع..see you..."وراح"
ولع النار في قلب ضاري وطلع بكل سهوله..بعد ما تأكد ان البركان راح يثور اليوم وما راح يهدا مثل المره اللي راحت..
&&&&&&&&&&&&&&&&&&&&