رواية "الا ليت القدر" للكاتبه بقايا شتات..
موضي: وليه ما قلتي انها عندك من امس..
دانا: ماما...ومتى اقولك.؟؟ اصلا انتي متى رجعتي لبيت.؟
موضي: مهما كان على الاقل حطي عندي خبر..
دانا نغزت امها: خلاص مامي البنت جات..
اشواق: صباح الخير خالتي..
موضي تجامل: صباح النور...هلا والله..حياك والبيت بيتك قلبي..
اشواق.: الله يحييك ويخليك..
دانا وقفت: اوكي مامي..احنا طالعين...باي .."وطلعوا برى"
وفي الغرفه الخارجيه..
ابتهال وهي تلبس: راح اروح معاهم اوك..
مدى وهي ما نست سالفتها امس: انتبهي لنفسك..
ابتهال لفت عليها: لا تخافين علي....يله باي..
وطلعت وحصلت اشواق ودانا ينتظرون..
: صباحو...
الثنتين: صبااااحو..
ابتهال: اجل وين لانا؟؟
دانا بطفش: ما ادري عنها..قلت لها تتجهز بسرعه بس كالعاده تحب تتأخر..
ابتهال طالعت دانا وودها تعرف هي عرفت ان سلطان عرف بسالفة لانا ولا؟؟
ودانا نفس الشي ..ودها تسأل..بس ما بعد سمحت لها الفرصه..
وشافوا لانا متجهه لهم..
: صباح الخير..
الكل رد عليها: صباح النور..
لانا طالعت ابتهال وهي خجلانه منها..ولفت على دانا: دنو ما ودي اطلع..خلوني بالبيت..
دانا: لا مستحيل نخليك وخصوصا بعد ما انتظرناك كل هالوقت..
اشواق: تعالي معانا..نغير جو عن المدرسه والكآبه..
لانا متردده: لا...ما ودي..
وسمعت صوت سلطان: احم..
طبعا محد تغطا عنه..لانا ودانا من اول ما يتغطون..وحتى اشواق اصلا ما تعودت تتغطا..
سلطان طالعهم بطرف عين ولا وحده حركة ساكن..
ابتهال تحس ان ودها تضحك على اخوها اللي لحد الان ينتظر احد يتغطى عنه..
: سلطون ..خذ راحتك..مافي احد غريب..خخخخخ
اشواق: هذا سلطان اخوك!!..هلا هلا ..والله ابتهال عورت راسي فيك..
سلطان طير عيونه ..اول شي شكلها وطريقة كلامها وقصة شعرها ما تعطي انها بنت..
: هلا فيك...اقول كأني اشوفكم ناوين تطلعون..ولا شفت لبس المدرسه.؟؟
ابتهال قربت منه: يا اخوي اليوم بمناسبه سعيده..قررنا نغيب ونطلع نفطر وننبسط شويه...
سلطان طالع اخته..وهو مستغرب عاداتها كثير..صارت تطلع وتدخل ولا تحسب حساب..
: ومن راح يروح معاكم؟؟
دانا بعفويه: وليه يروح معانا احد؟؟ احنا نكفي..
سلطان طالع لانا وهو رافع حاجب: لا..ما يصلح البنات يطلعون لحالهم لان بعدين ممكن يصير اشياء محد حسب لها حساب..
لانا نزلت راسها وحست ان العبره خنقتها..
دانا فهمت قصده وحاولت تصرفها: اجل ما دام السالفه كذا من وجهة نظرك تعال معانا..
سلطان لف عنهم: اصلا هذا اللي بسويه.."وطلع موبايله وهو يمشي وكلم ضاري يبلغه انه راح يتأخر شوي"
>>>>>>>>>>>>>>>>>>>>>>>>>
نزلت تحت وشافت امها وابوها جالسين..وطالعوها وهم مستغربين ان العبايه عليها..
: على وين؟؟
اريام: عندي مشوار ضروري..
موضي: لا تنسين انتي بالعده..
اريام الكلمه هذي دايما تحسسها ان سامي تحت القبر ومو مثل ما تتخيل كل يوم ان معاها لحظه بلحظه..
: اعرف...بس مشوار ضروري مره..
حمد: روحي..وانتبهي لنفسك..
اريام: لو تأخرت شوي لا تقلقون.."وطلعت"
موضي بحسره: لو انها ما خذته من اصل..
حمد طالعها بطفش: وانتي لحد الان تتمنين..خلاص انسي اللي صار صار..
موضي: لانك مو انت اللي يتعذب..
حمد بنفسه" والله عذابي كل يوم اعيشه ما دام انتي على ذمتي"
&&&&&&&&&&&&&&&&&
سلطان ترك البنات على راحتهم ويراقبهم من بعيد...شاف الثلاثه دانا واشواف وابتهال منجسمين مع بعض...اما لانا..كانت لوحدها ولا قدرت تدخل معاهم..
حس انه وده يعرف عنها اكثر...يحس انها سلكت الطريق هذا وهي مو مقتنعه فيه ..وان حياتها ملاها الفراغ وحاولت تعوضه بالغلط..
وتذكر نفسه وغلطته...فعلا هو غلط مثل ماهي غلطت..بس الفرق الوحيد بينهم هو اخذ عقابه وارتاح..بس هي متعلقه ولا قدرت تتجاوز ازمتها..
قرب لها شوي: يا....يا ؟؟ "ونسى اسمها وتفشل"
لانا لفت عليه : لانا...وهذيك دانا..
سلطان بدون ما يطالعها: يا لانا..ليش جالسه لحالك؟
لانا فكرت انه لحد الان يشك فيها: ما بعد قدرت ادخل معاهم..هم قريبين لبعض من زمان بس انا لا..
سلطان: حاولي تصححين غلطتك..
لانا لفت عليه: ايش؟؟
سلطان وهو يطالع بعيد ويحس بنظراتها له: ارجعي لربك وتوبي توبه صادقه..كذا راح يرتاح ضميرك..لازم تعاقبي نفسك بنفسك ولا ضميرك ما راح يقدر يرتاح..
لانا طالعته بتفكير..قد ايش تفكيره كبير..وفاهم وواعي..وغير كذا شخصيه مميزه وحاليا هو الوحيد اللي عارف انها غلطت ومع ذلك ما وقف ضدها ..
سلطان: انا ما اقول انك غلطتي غلطه صغيره..او ابرره لك..بس مافي احد معصوم من الغلط.."واعطاها نظره وحده وراح عنها"
لانا تطالعه وهو يبعد عنها..حست بغموض بشخصيته..واكيد في حياته سر كبير..وعلى قد ما مروا عليها شباب ..بس مثل سلطان ما بعد شافت..
ورجعوا لها البنات ودانا تحاول قد ما تقدر تغير جوها..
&&&&&&&&&&&&&&&&&&
بعد ما رجعهم للقصر اتجه للشركه..ودخل مكتبه..وجلس وهو يشوف الملفات المتراكمه على مكتبه..
: كله من هالبنات المهابيل...الحين كيف راح اخلصه..
"وشاف ملف اخضر انرمى قدامه"
:عندكم وظايف؟؟
سلطان رفع راسه وانصدم بس من الفرحه: ثااامر؟؟
ووقف بسرعه وحضنه وهو مبسوط فيه..
: واخيرا جيت..
ثامر: وانا اقدر ما اجي.. وبعد عني لا يقولون عني موظف شاذ ههههه
سلطان بعد عنه وضربه: يا اخي هذا تعبير عن الفرحه..
ثامر: المهم لا تضيع وقتي عندكم وظايف ولا؟؟؟
سلطان اخذ ملفه : تعال معاي ..."ودخل على ضاري"
: السلام عليكم..
ضاري شاف سلطان وواحد معاه في سنه..وواضح انه يعرفه لانه مبسوط فيه..
: وعليكم السلام..
سلطان: هذا ثامر صديقي..
ضاري طلع من مكتبه وتوجه لهم وسلم عليه: هلا بثامر...حياكم تفضلوا..
سلطان بعد ما جلس: ضاري هذا ملف ثامر..يعني حاول تشوف له أي وظيفه..اي وظيفه اذا تقدر..
ضاري وهو يتصفح ملفه: لا اكيد بحصل له شغله حلوه..
سلطان لف على ثامر والضحكه ماليه وجه: جد!!
وثامر نفس الشي فرحان..واخيرا راح يشتغل في وظيفه محترمه..
ضاري: وانا قد مزحت معاك...ثامر ترى من بكره تباشر العمل..بس نبي شغل صح..
ثامر بلهفه: اكيد اكيد..انا مستعد اشتغل ليل نهار بس ما دام فلوسي حلال..
الكلمه عورت قلب سلطان...ماضيه شكله مستحيل ينمسح من ذاكرته او قدر يتجاوزه كليا..
ضاري لاحظ الشي هذا: يله الحين سلطان روح خلص شغلك يا الكسول متراكم عليك..وانت يا ثامر من بكره ا نشا الله اشوفك هنا واشرح لك عن طبيعة شغلك..
وقفوا اثنينهم..
ثامر: مشكور ..بجد مشكور وربي يعطيك الف عافيه..
سلطان ضرب لضاري تحيه: تسلم يا ولد عمي..
ضاري بابتسامه خفيفه: سلطان هنا انا استاذك لا تنسى..
سلطان تفشل: ها..ايوه..اسف نسيت..عن اذنك..
واخذ ايد خويه وطلعوا....وفي مكتب سلطان..
: والله يا سلطان مكتبك كشخه..
سلطان وهو لاهي بشغله: عشان تعرف من انا..والحين من عيال الهاي كلاس خخخخ
ثامر: ما شا الله عليك..
سلطان رفع عينه عليه: على ايش ما شا الله..
ثامر: على كل شي..انت تستاهل كل خير يا سلطان..
سلطان سكت شوي وهو يطالع خويه بموده: اقول خلي عنك الكلام الفاضي..وخلني في شغلي..
ودخل عليهم واحد في المكتب..ووقف شوي وسألهم..
: انت السكرتير الجديد؟؟
سلطان طالعه مستغرب: ايوه...امر بغيت شي؟؟
طالعه شوي..بعدين رد: لا سلامتك ..بس انا ياسر السكرتير القديم.."ومد ايده"
سلطان صافحه ومازال مو فاهم شي : هلا والله..
ياسر طالع مكتبه بحسره وده يرجع له...بس ضاري اللي نقل وظيفته في مكتب ثاني ولا قدر يرتاح فيه ويتأقلم على الوضع الجديد...
: في مجال اقابل المدير..
سلطان: لحظه بس...."ورفع السماعه واتصل على ضاري وقال له عن ياسر وعلى طول ضاري أمره انه يدخله.."
وقف قدام مكتبه وهو ساكت...ضاري رجل بشخصيته القويه والصلبه الا انه صعب على من عرفه وقعد معاه يقدر يفترق عنه ..لانه جدا محترم وخلوق وقلبه طيب من داخل..
ضاري جد اشتاق لياسر كان موظف مخلص وحس انهم كبروا مع بعض في الشركه هذي..بس ما يقدر يرجعه ويشوفه من جديد وكل يوم ويشوف في عيونه مدى..
: ياسر عندك شي تبي تقوله؟؟؟
ياسر: انا بستقيل..
ضاري الخبر فاجأه: وليه؟؟
ياسر: ما قدرت اتأقلم مع الوضع الجديد..وماني متقبله..بدور لي وظيفه ثانيه..
ضاري على قد ما هو متحسف يخسر موظف مثل ياسر..بس هذي رغبته ولا يقدر يرفضها..
: اوكي ..اعطيك اللي تبيه..
وفعلا وقع على ورقة استقالة ياسر..
&&&&&&&&&&&&&&&&&&