رواية "الا ليت القدر" للكاتبه بقايا شتات..
في الغرفه الخارجيه..
اريام: لا تقبلين اذا كنتي ماتبين...مستحيل يجبرك..وانا أوقف معاك..
مدى كانت ساكته طول الوقت وتهز جسمها ..الدنيا تسكرت بوجهها ومصيرها تكون تحت سلطة ضاري..اللي لا رحمها ولا رحم دموعها ولا حاول يشفق عليها لو شوي بس..
اريام: حبيبتي مدى..بليز ردي علي..والله اخوي ما راح يسوي شي..
مدى: اخوك هذا ذبحني..دفني بالحياة..
اريام: مدى اخوي مو سئ..بس والله ما ادري ايش فيه..صاير هايج واناني وغريب..والله غريب حتى علي..
مدى طالعتها: كنت مستعده اعيش طول العمر في فقر ولا يجي اليوم اللي يذلني بالشكل هذا..عمري ما تخيلت اني بشوف الظلم بعيوني..ابوك وامك ظلموا اهلي اول..والحين جاء دوري..
اريام حزنت بجد بنات عمها ما سلموا منهم ابد: هدي نفسك يا مدى..وقلت لك...اذا ما تبينه ارفضيه وابوي معاك..
مدى: انتي ما تعرفين اخوك..اخوك هذا مستعد يدمر الدنيا كلها عشان يكسر لي راسي..
اريام: مدى ...بصراحه ..ضاري اليوم قالي انه ...
وفجأه دخلت ابتهال وهي تبكي...وعلى طول حضنت مدى..
: مدى تكفين لا تبكين..
مدى حضنتها: لا تخافين يا قلبي...ما تعرفين اختك قويه..
ابتهال: انا عرفت السالفه من ضاري..هو طيب وحبوب بس اذا ما تبينه عادي...ما راح يقول شي..
مدى عرفت انه اعطى مدى بس اهم شي بالسالفه وما اعطاها الحقيقه اللي راح تصدمها فيه..
مدى بعدت ابتهال عن حضنها ومسكت وجهها ومسحت دموعها: سلطان بيرجع بعد كم يوم..
ابتهال اتسعت ابتسامتها: جد...مين قال لك..؟؟
مدى طالعت اريام: اخوها...
اريام عورها قلبها..حتى اسمه ما قدرت تقوله..وطلعت من عندهم وهي تفكر في حالهم..ليش الزمن ضدهم...وحتى اخوها ضدهم..ليش ما هم قادرين يلاقون الفرح ويفرحون..
&&&&&&&&&&&&&&&&&&
في غرفة لانا...
: انتي متأكده..!!
دانا: ايوه متأكده..
لانا : لالا ..مستحيل ..كيف هو عرف عنها ..
دانا استغربت: عن ايش ؟؟!!
لانا: ولا شي..بس ضاري لي شيبي مدى..!
دانا: اكيد يحبها والله وناسه...
لانا عصبت: أي وناسه انتي الثانيه..قديمه حركات بنت الفقر سوت اللي براسها لحد ما طيحت اخوي..
دانا: ما اتوقع..لانه اليوم كان معصب وأخذ مدى يكلمها ورجعها تبكي منهاره..
لانا: تبكي ومنهاره...ليش؟؟
دانا رفعت اكتافها: علمي علمك..حتى ابتهال ما تعرف...
لانا افكارها توديها وتجيبها وما رست على بر...
: والله في هالقصر تصير اشياء ما ندري عنها..
دانا: أي شي خافي اليوم..بكره راح يصير مفضوح..
لانا بحسره: والله يا ريماس بتموتين..
دانا: الا تعالي تتوقعين بتوافق؟؟
دانا بقهر: ليه تقدر ترفض..بس قهر كان اخذ مأثر على الاقل !!
&&&&&&&&&&&&&&&&&&&&
النوم مستحيل يلامس جفونها..ومن وين يجيها النوم وقدامها حياة جديده كلها غموض واولها ألم..
ايش الحياة مع ضاري !!..كيف ممكن تكون..هي ما بعد شافته وهو ولد عمها يوم كويس معاها...كيف لا صارت زوجته بتعيش طول عمرها في اهانات وذل..!! في امل انه يتغير؟؟..معقوله تحبه في يوم ما !!..هل راح تتقبله ...بتقدر تعيش معاه ؟!
كلها اسأله اتعبت عقل مدى وبدون فايده,,لانها بدون اجوبه..حددت مصيرها...والرفض صار مستحيل بالنسبه لها...كيف تحرم اخوها الحريه..وتمسح فرحة ابتهال اليوم بالخبر..وتظمن مستقبل اخوانها ..وجود سلطان ضروري لها..
على الاقل راح يعطيها الامان.راح يعطيها احساس بأن وراها سند اذا تعبت تتكي عليه..سلطان طلعته الحين اهم شي صار بالنسبه لها ..وحياتها فدا لاخوانها من بعد وفاة امها..
" آه يا يمه..اكيد قاعده تشوفي حال بنتك..لو كنتي عايشه راح تسكتين له؟..ولا بتوقفينه عند حده...ضربني يمه وانتي ما قد رفعتي صوتك علي..يا ليت ألحقك ولا اخذ ضاري...ياليت..."
>>>>>>>>>>>>>>>>>>>>>>>>>
وبغرفته..وبين النور اللي ما قدر يطفيه ..ومع ذلك ما شاف الا السواد في عيونه..
راح ياخذ مدى جسد بدون قلب ..وبعدين !!..مدى ما تقبلته في يوم !! مستحيل تستمر معاه...قدر يمنعها من الزواج ويمنعها من كل شي يبعدها عنه..بس ما يقدر يجبر قلبها يحبه..
" مدى...مابي منك الا قلبك..اتمنى اشوفه يوم ينبض بأسمي...اتمنى اشوف الحب بعيونك لي..ابي تحسسيني اني انسان ثاني..واني ممكن اتغير..ابيك تعلميني الحب..والحنان..ابيك تعشقيني وتخليني اعشقك اكثر واهيم فيك..ابيك وأبي وابيك........"
كثير اشيا تمناها ضاري بقلبه...ولو تحققت بيحس انه ملك الدنيا وما فيها..مدى بس اللي ملكت قلبه وهي اللي تقدر تخليه من ضاري عديم الاحساس...الى ضاري ثاني..يعشق بجنون طيف مدى ...
&&&&&&&&&&&&&&&&&&
صباح اليوم الثاني...
صحت من نومها واستعدت مثل كل يوم للمدرسه..وقبل لاتنزل شيكت على موبايلها..وحصلت مسج..
" ابي اشوفك اليوم ضروري"
طبعا من قرت ان المرسل اياد وانقلب مزاجها...
: ضروري !!...ايش يبي هذا ؟؟؟
ونزلت ..وحصلت الكل مجتمع ..وهادين..جلست معاهم وهي تطالع مدى وضاري كل شوي...
مدى كانت جالسه كمالة عدد بس..ولا ودها تطلع من هالقصر هذا ولا ترجع له ابد..
ضاري كان متوتر شوي ..بس ما وضح عليه ..وكأنه شخص واثق..
اريام كانت ساكته ..ولحد الان ما رضت عن اللي سواه اخوها مهما كان عذره..ماله حق..
حمد طالع وجه مدى ..كأنه وجه وحده راح تروح لموتها برجليها ..مو وحده بتتزوج...وما اسعده هالشي..
موضي ساكته...ولا تدري عن اللي يصير من وراها..
مدى وقفت: الحمد لله..
ضاري وقف معاها: وانا بعد.. الحمد لله..
مدى طالعته باستحقار...وفي بالها " ايش قصده لما وقفت وقف"
طلعت مدى على طول برى وبخطوات سريعه...ضاري لحقها وقدام الكل...
موضي : خير...ليش يلاحقها...؟؟
لانا : ما عرفتي يمه !!
اريام بشده: لانا ...!!
حمد: من سمح لك تتكلمين...
لانا زعلت : وانا ايش قلت؟؟
موضي عصبت: وش اللي قاعد يصير من وراي...ادري فيكم تحسوني غريبه بينكم..
حمد: ما بعد صار شي عشان نقولك..
موضي: وليه تنتظر لحد ما يصير شي..
حمد: لا تسدين نفسي على هالصباح..
موضي: والله انتو اللي سديتوا نفسي ..كأن بنات محمد صاروا اقرب لكم مني..!!
ابتهال وقفت: الحمد لله "وراحت"
حمد: ما تعرف تضبط لسانها...الحمد لله على النعمه بس "وراح"
موضي : قولو لي وش صار..!!
اريام: يمه ...ضاري خطب مدى...
موضي انصدمت: نعم !!! مدى ...؟؟...وليه مدى بنت الفقر وش يبي فيها..
اريام: يمه هذي بنت عمي وما ارضى عليها..
موضي: ترضين ولا ما ترضين..ما يهمني...ليش ما اقنعتوا اخوكم ياخذ غيرها...فيه بنت اخوي مأثر كان اخذها..
اريام: يمه انتي اكثر وحده تعرفين ضاري...هو اللي اختارها ومستحيل يغير رايه..
موضي بقرف: بكيفه احسن...كفوه بنت الفقر...ولا قين على بعض...خلي ولدي يجي وياخذ بنت اخوي..
اريام انسدت نفسها: الحمد لله..
التوأم حسوا موقعهم غلط ...سحبوا نفسهم..
موضي : وانتي بعد...خذي هالبزران وروحي عن وجهي...
جانيت خافت وقالت للخدامه تاخذ الصغار..وطلعوا برى ..
&&&&&&&&&&&&&&&&