إضحك ترى الاعمار أيــــــام وتروح=إضـحـك وروحــك لاتبيّن كـدرها
إضـحـك وخــل البال رايق ومسموح=عســر الليـالي يقـتـفـيها يسـرها
إضحك وخــل أيـامـك اعيـاد وفروح=دنيـاك تـذهـب مـاتحصّـل ذمرها
إضحك وضحّك قلب يائس ومجروح= إجعله ينفض من عيونه سهرها
إضحك وصدرك للمواقيف مشـروح=الله مـقـدّر خـيـرها مـع ضـررها
إضـحـك وكـل الامر مكـتوب باللوح=من واحـد يعـرف خـوافي خبرها
إضـحـك وبــاب الله للخـلـق مفتوح=اخـلـص لـه النيّه بســر وجهرها
بــدّد غـيوم الحـزن مـافيه مصلوح=الابتســامـه خـيـر قــيــل بـأثـرها
الابتسـامـه ســلـوة القلب والـروح=مـثـل السـحابـه يـوم تنثر مطرها
شوف الحمام اللي يغني على الدوح=مـاحسـّبت ضــيـم الليال وقشـرها
شــوف الفقير وقلبه كلوم وجروح=وضــحكته فــي كـل وقـت شهرها
شوف المريض اللي على الجنب مطروح =مافــكر أيــامه وقــادم خـطـرها
والشــايب اللي مـابقا جد وطموح=دالــه وضـحـكـة مبسـمه ماذخرها
يضحك ولايطري على باله النوح=الـعمر يمضــي بين يــوم وشهرها
اضحك ترى الاعمار ايام وتروح=خــذها نصـيحـه واعتمـد واعتبرها