يا خاطفي وين ألقى عزتي في زمان المذلة !
:::
:::
:::
هنآدي بعدت البطآنيه عنهآ أخذت جوالهآ ورآحت لغرفة شوق تنام فيهآ لآنهآ عارفه سحر ماراح تخليهم ينآموآ ...قفلت الباب على نفسها وأنسدحت على السرير
هنادي: الله يسامحك ياسحر طيرتي النوم عني ..لفت على يمينهآ بكسل طرت ببالهآ فكره ..انغمست بتفكيرهآ أكثر والمستوحذ على تفكيرهآ بآسل لآغير
(الظآهر أني بديت أخرف ...بس اللي برآسي لآزم أسويه يعني أسويه) مدت يدهآ على جوالهآ وأتصلت عليه ...بعد دقايق طويله مارد عليهآ أستغربت
هنادي:ماهي من عوايده مايرد وانا ويش علي منه لا ياهنادي بديتي تستخفين وتخرفين بقوه
قبل تحط الجوال رجع دق عليها
هنادي: نـعـم
باسل تعود على صدهآ ونبرتها المتأففه:الله ينعم عليك ..ويش فيك متصله ؟
هنادي: السموحه بالغلط اتصلت
باسل مامشت عليه:اخلصي علي ويش كنتِ تبين
هنادي: ولاشي بس طفشآنه قلت اتصل اتهاوش معك
باسل بسخريه:بس من صوتك حاس انك مروقه وماتبين شي يعكر مزاجك
هنادي بنبره طويله: لايكون اتصالي ازعجك
باسل :نهآئيا كنت اصلي عشان كذا مارديت
هنادي تصفر: حركآآآت أنت تصلي
باسل بنبره حاده:ليه شايفتني يهودي ما أصلي
هنادي خافت من نبره: سوري ماقصدي
باسل بنفس الحده: ترى في حدود ياهنآدي أنتبهي لا تتعدينهآ وتندمين
هنادي: والله ياحبيبي ماعندي خلفيه عن هذي الحدود اعطيني نبذه عنهآ
باسل :مايصير بالجوال لازم فيس تو فيس
هنادي ببرود:طيب بس ذكرني وقتها
باسل انسدح على سريره وتمدد:على فكره ترى بحضر ملكة أختك
هنادي ارتجفت وشهقت:أيــش؟!
باسل يضحك:اللي سمعتي..والا ماتبيني أحضر
هنادي انقهرت: من جد بتجي؟
باسل: اذا بتستقبليني راح أجي
هنادي نفخت عليه: بُعدك انطق بديرتك ابرك لك
باسل:افا لهدرجه جيتي غير مرحب فيها
هنادي عصبت ..تعدلت وجلست وهي تضغط على الخدآديه اللي مآسكتهآ بيدها:ايه غير مرحب فيك
باسل بعنآد:أجل بجي عنآد لك كآن عندي أجتمآع مقدر اكنسله بس نكد لك بكنسله
هنادي أنقهرت منه:انت تبي أبوي ينجلط لمآ يشوفك اذا بايع عمرك تعال برجولك عنده
باسل سكت مافهم كلآمهآ بعد سكوت بسيط: ليه ماتبينه يشوفني
هنادي:أنا قلت لأبوي كل شي سويته فيني
باسل انصدم :أيـــــــــــــــــــش
هنادي تنهدت:ماتفهم قلت لأبوي انك تزوجتني مدري لعبت علي يعني ياشاطر وقعت في شباك العنكبوت
باسل بعصبيه: أي عنكبوت انت الثاني
هنادي ميلت فمهآ بقهر: ماهو لازم تفهم ...انت من عقلك بخبي شي كبير مثل هذا عن ابوي حشى منت بعقلك
باسل بلع ريقه:هنادي أنتي صاحيه لكل كلمه قلتيهآ
هنادي عصبت: شايفني مجنونه مدري ويش اقول ؟
باسل : خلاص خلاص اوووف منك يالله باي "قفل الخط بوجههآ"
(ويش هذي الورطه اللي تورطهآ ياباسل ..أحسن حل انك تعتذر من فهد وتدبر لك اي شغله عشان لآ يحس بشي ...مصيبه أذا حس بشي بيني أنا وهنآدي والله غير يقتلني )
رمت جوالهآ جنبها وزفرت أنفاسهآ الحارقه بكل تثاقل ..غمضت عيونهآ تحاول تهرب من وآقع مؤلم
:::
:::
:::
المغرب
صحت بسرعه وصلت وأكلت شي يسد جوعهآ طلعت للصلآه
شهد: ويــن؟
رغد: بروح السوق خلاص مابقى شي على الخميس وأنا لسى مآشريت لي ولك
شهد: ذكرتيني اعطيك صرآفتي اسحبي منهآ اللي تبين
رغد ابتسمت:خلآص معي اذا نقص شي بسحب من حسآبي
شهد شهقت:أيـــه تعالي قالت لي سمر انك لما رجعتي كنتِ تبكين
رغد تعكر مزآجهآ وهي تتذكر اللي صار اليوم:شهد وربي ماني رآيقه أتكلم بأي شي بروح الحين بكره مآراح اروح للمستشفى بجلس معك وأحكي لك اللي صار
شهد تتخصر:والله تسحبين زي العآده تعلميني فيك
رغد قربت منها وباستهآ على خدها:أنا أقدر أسحب عليك في أشياء كثيره بقولهآ لك بس مو وقتهآ الحين
سحر وهنآدي طلعوآ من الغرفه لآبسين عبايتهم وجآهزين:يالله رغد
رغد فتحت عيونهآ: وين رايحين ..لآيكون معي ؟
سحر:لآ بنخلي جلالي يودينآ المشغل في كم شغله بسويهآ عندهم وهنادي بتروح معي تقول بتسوي بخار
رغد: زين يالله عشان انا يمكن اطول في السوق عاد انتظروني
نزلوآ مع بعض كل وحده فيهم متجه للمكآن اللي تبيه
عند فهد
كآن معصب من بآسل رد عليه بحده: شوف بآسل تجي يعني تجي لآتعتذر لي بأعذار سخيفه
باسل :فهد اقولك اجتمآع مهم
فهد:ألغيه أجله دبر عمرك ...شوف لو مآتجي مآيصير لك خير ..في شي ظروري
بآسل بدأ يتسلل الخوف لقلبه(الله يستر لايكون أبو هنآدي كلمه ..ويش الحل الحين):بحآول واعطيك خبر
فهد بنبرة حآده:قلت لك تجي وكلمتي مآ أثنيهآ فــهــمــت
قفل الخط بوجه بآسل ورمى جواله بقوه على الكنبه اللي قبآلهآ ...صحت من نومهآ على صوت صرآخ فهد بمكالمته لبآسل ...عدلت بجآمتهآ وطلعت له
وقفت عند الباب وهي تشوفه يروح ويرجع بعصبيه وحيره ...همست بهدوء: فهد
لف عليها بسرعه وشآفهآ وآقفه وملامحهآ نآعسه : ويش صحآك
شوق مشت خطوتين: سمعت صوتك وصحيت ...ايش فيك معصب؟
فهد جلس :مافي شي كنت أكلم باسل وعصبت منه
شوق قربت منه أكثر:خير لايكون صاير بالشغل شي
فهد: لآلآ تطمني
جت جلست جنبه وبعدت شعرها عن وجهها:انت مانمت؟
فهد ابتسم لها:لا مانمت انتي عساكِ أرتحتي بنومتك
شوق طلت في بطنها: الحمدلله " بدت تحس بالمغص يزيد عليها وغثيان غمضت عيونها حتى تتحمل الألـم حط يده على يدها بشويش
فهد خاف من ملامحها المتجعده :شوق ويش تحسين فيه
قآمت بسرعه زي المقروصه وركضت للحمآم تستفرغ...مشى بسرعه ورآهآ كآن يسمع صوتهآ تتأوه أنتظرهآ برى ..لكنهآ طولت قرب من الباب
فهد:شوووووق ...شووووق
شوق بتعب غسلت وجههآ وتحس كل جسمهآ يتضآمن مع ألمهآ حطت يدها على بطنهآ أخذت المنشفه اللي معلقه جنبهآ مسحت وجههآ ويدهآ فيه ..أخذت نفس وهي تسمع ندآءات فهد المتتآبعه ...فتحت الباب بشويش ومدت يدهآ له حتى يسندهآ
بتلقآئيه سريعه جدآ مسك يدهآ ولف يده الثانيه على ظهرها ..أركزت كل ثقلهآ عليه
فهد بنبره مرتعبه: ويش صار لك؟
شوق تتنفس بسرعه: مدري أحس بدوخه وغثيآن
فهد : ارتاحي على سريرك لآتتحركين كثير ...سآعدهآ تنسدح حط يده على صدرهآ وحس بحرارة جسمهآ ...مشى للتلفون وأتصل على الرسبيشن يطلب أكل لهآ حتى يأكلهآ بنفسه ويعطيهآ من الأدويه
شوق فتحت عيونهآ وشافته وآقف بعيد عنهآ ( معقوله فهد يخآف علي لهدرجه ...تغير جذريا مآعآد فهد اللي زمآن قلبه يحَّن علي أكثر من نفسي أيش اللي غيرك يافهد خلآك تعلقني فيك
أشوف بعيونك نظرة الخوف ...يآترى قدرت أكسبك قلبك يـــآ أغلى حبـيـب)
رجع لهآ وجلس على طرف السرير ...ضم كفوفهآ لكفه وابتسم:كأنك صرتي احسن؟
شوق ضغطت علي كفوفه:دآمك معي أكيد بكون أحسن
فهد تنهد:شفتي هذي البدآيه كيف بعدين بيزيد تعبك أكثر
شوق مررت يدها على خده بهدوء سَلِسَ: خآيف علي ؟
فهد ركز عيونه عليها وهو يتأمل كل جزء فيهآ:تهقين أني مآ أحس فيك
شوق ابتسمت:سؤآلي وآضح
فهد يعقد حوآجبه: وأنأ بعد وآضح
شوق لمعة عيونها ونطقت بحروف مرتجفه:قول أنك تحبني
فهد مسك كفهآ اللي على خده: والله أحــبـــك