يالله يارازق جميع العبادي= ياخالق الجنه وياخالق النار
ياسامع المظلوم ليله ينادي= ساتر على كل البشر وانت ستار
اهلكت فرعون وذات العمادي =بامرك يسير الكون في بر وبحار
سخرت ريحك والسحاب الغوادي =بالخير او بالشر في كل الأقطار
يارب سخرها بليل الهجادي =يارب سلطها على راس بشار
ظالم وظلمه عم في كل وادي =ماقدر المله ولاقدر الجار
القتل عنده يابشر شي عادي =ولا تهزه صيحة كبار وصغار
دمّر وشرّد وأفترى في البلادي =سوى الذي ماقط في وقتنا صار
أشجار بابا عمرو صارت رمادي =حتى الصخر يشكي الحسافه والأمرار
أفعال تبكي حيها والجمادي=تاريخ اسود ينكتب له وتذكار
يالله يامنزل تبارك وصادي =واحد احد عظيم علام الأسرار
سلّط جنود من جنودك شدادي =يالله لاتبقي لبشار ديّار
وصلوا على من جا بشير وهادي =صلوا على المختار مليار مليار