[ρùℓşέ]

( الحلقة 19)

طلبت منهم يسيبوني معاها لوحدنا , وخليت اضاءة الغرفة بسيطة واخذت كرسي وجلس قدامها وبديت اسألها عن سبب وجود هذا المارد فيها ؟
قالتلي لانة يحبني لكن انا اكرهة ,
سألتها كيف يحبك ويخوفك ؟
قالت ما ادري يمكن عشان اسمع كلامة وما اتجوز؟
قلتلها كيف تسمعي كلامة هوة كلمك قبل كذا ؟
قالت لا ما كلمني بس وقف على الباب يناظرني ,
سألتها طيب كيف عرفتي انة يحبك وما يبغاك تتجوزي ؟
قالت كل الشيوخ الي تكلموا معاة قالوا كذا ,
(اجوبتها دخلتني في حيرة اكبر من الاول , قلت اجرب معاها الي كنت ناوي علية , وبعدين يسير خير) .
قلتها الحين انا حجيب هذا المارد اللي يخوفك واتفاهم معاة قدامك ولو طلع كلامك صح انا مستعد اريحك منة للابد ؟ عندها قامت تصارخ وقامت من السريرتجري وحاولت تخرج من الباب مسكتها في اخر لحظة , جا ابوها وابو-س قلتلهم يدخلو بس ما احد يتدخل , مددتها على السرير وما انكر انها كانت تقاوم بشراسة وكنت انا في عز شبابي وعافيتي ولكني احس ان مقاومتها ما تتناسب مع فتاة
في سنها ..........يتبع

بعد محاولات وشيل وحط لقيت نفسي انا وهية طايحين على الارض من شدة المطاحنة , وكنت انا خلف ظهرها لاكني مسيطر عليها الا ان راسها كانت تلف يمين ويسار بشكل مخيف لدرجة اني خفت رقبتها تنكسر , حاولت اثبت راسها لحد ما استطعت اني اقترب من اذنها وقلتلها (شوفي,سواء هذي حركات منك او من الجني ماراح اسيبك ابدا ), توقعت انها تنهار , لكن للاسف زاد الموضوع سوء , وكان ابوها كل ما حاول يدخل يقولة ابو-س اهجد خل الرجال يتفاهم مع هذا المارد , حسيت ان الوضع بدا يخرج عن السيطرة ولازم اتصرف واستخدم قاعدة تعلمتها لاني لو فشلت معاها الحين لا يمكن انجح مرة ثانية , فقررت اسوي هذا الشي الي ما ينفع اسوية قدام ابوها بالذات, فطلبت منهم الخروج ولمن خرجوا , فكيتها ولفيتها نا حيتي بسرعة وسار وجهي في وجهها ورفعت يدي وبكل قوتي ضربتها كف , بعد ماضربتها رمت نفسها على السرير وكانت على وجهها وجلست تبكي , قلت خليني اكون حازم معاها .

قربت منها وقلتلها كل اللي تسوية ما حيجيب نتيجة معاية , اذا كان عندك مشكلة انا ممكن اتساعد معاك خاصة ان ابوك باين علية انسان طيب ومتفهم ومتحظر , اما اذا كنتي مصرة ان فيك مارد , لية يظهر للشيوخ الي ممكن يحرقوة بالقراءة ومايظهر لية انا , شوي سمعتها تضحك بصوت خشن ولفت علية وخمشتني في رقبتي وسارت تقول كلام غير مفهوم , دفيتها على السرير وفكيت الربطة حق الستارة وربطت يدها الثنتين في السرير , وطلبت من ابوها مبخرة وبخور وجلست اتكلم معاها , هي تقول كلام غير مفهوم , وانا زيها اقول كلام غير مفهوم خرابيط من راسي , وكانت تطالعني وتضخك .
جات المبخرة قلتلها الحين اجيبلك مارد اكبر من اللي فيك يخش يتفاهم مع صاحبة , كان عندي خوف انها ما تشوف الي حسوية ولكني قلت احاول , امتلت الغرفة بالبخور وقمت اتكلم واردد اسماء جن ومن هذا القبيل .
قامت البنت تصارخ وتقول خلاص بخرج بخرج ,(عرفت انها تأثرت وسارت تشوف اكثر من شخص في الغرفة ) سويت نفسي ماني سامعها لما زاد صراخها عرفت انها خايفة , خفت عليها لكني كنت مصر اني ما انهي الموضوع بهذا الشكل , قلتلها ما ابغاك تخرج انا جايب واحد يدخلك الحين ويخلصني منك , لية تخرج وبعدين ترجع هذا كلام ما ينفع معي , لازم تموت رجعت تصارخ يابابا يابابا ياعمو تقصد ابو-س , فكيت الباب تأكدت ان ابوها برا رحت فكيت يدها وسبتها تخرج , فعلا خرجت وحضنت ابوها وجلست تبكي , سألها ابوها كيفك ما كانت ترد بس تبكي , سألني قلت لسى فيها المارد بس انا حبيت اريحها شوي والحين ارجعها الغرفة لحد ما انهي الموضوع , هي سمعتني وزاد صراخها , قال ابوها اتوقع انها سارت كويسة , قلة ابو-س هو ادرا خلة يتفاهم مع هذا الخسيس الي متعبها ومتعبنا , كنا نتفاهم شوي الا البنت ماسكة يدي وساحبتي على جنب وقالتلي انت وعدتني انك تساعدني صح , قلتلها وانا عند وعدي قالت نتكلم في مكان ثاني غير الغرفة , طلبت منهم يسيبونا لوحدنا وجلسنا مكانهم , وبدت الحكاية البنت عندها ثنتين اخوات الكبيرة متزوجة وعايشة في فرنسا والثانية متزوجة وعايشة في المنطقة الشرقية وامها سيدة مجتمع وماهي فاضية لاحد , والبنت تعاني الوحدة والفراغ , وفي هذي الظروف تعرفت البنت على انسان ملى فراغها وعوضها عن الام والاب والاصدقاء وسار هو كل حياتها خاصة انة ارق واطيب انسان في الدنيا ورومنسي وحساس وابن ناس حسب كلامها وخلال السنتين الي عرفتة فيها حصل مرة انها كانت سهرانة معاة وكانوا فالينها , وفي لحظة ضعف سلمتة نفسها .

بدون شعور مني ضربتها كف , والان عدى على القصة اكثر من 15سنة اؤكد للجميع اني ضربتها لاني اعتبرتها زي اختي جلست تبكي وقالتلي انت وعدتني انك تساعدني , طيبت بخاطرها وقلت في نفسي (اذا احساسي صادق واني اعتبرها زي اختي ما حتخلى عنها راح اساعدها عشان تتجاوز المشكلة) سألتها لية ما تقدملك ؟ قالتلي تكلمت معاة في هذا الموضوع اكثر من مرة لكنة قلي انة متأكد ان اهلي ما حيوافقوا وكمان عندة ظروف لما يخلص منها حيتقدملي , قلتلها انتي متأكدة ان الي مانعة ظروف ولا تحبي اتصرف واعرف الحقيقة بطريقتي قالتلي متأكدة , قلتلها عموما انا حسمحلك تكلمة للمرة الاخيرة وتقوليلة ان وضعك ما يتحمل اي تأجيل في موضوع زواجكم , ولازم تاخذي منة موعد يقابل ابوك وانا ساعتها حساعدك , وحذرتها لو حصل بينكم اي مكالمة ولا مقابلة بعدها بدون علمي الجن حيبلغني وساعتها ماني مسئول عن اللي ممكن يحصل , اكدت لي انها حتنفذ كلامي بالحرف , وحلفتني ما اقول لبابا ولا عمو اي شي عن موضوعها . وعدتها وياليتني ما وعدتها لاني ورطت ,وكذبت اول كذبة (طبعا مو اول كذبة في حياتي لكن اول كذبة على ابوها ).

قلتلها الحين تروحي تسلمي في يد ابوك وفي راسة وتستسمحي منة على عذابك لة في الفترة الي راحت , وتأكديلة انك كويسة , وبالنسبة للغرفة , مادام ابوك ربنا موسع علية انا حقترح علية يغيرلك الاثاث والالوان , عشان يبان الموضوع طبيعي , فعلا قابلنا ابوها وابو-س ولما قالتلة انها تحس انها كويسة مو زي كل مرة ونفسها تبدا حياتها من جديد , وتنسى ايام النكد والهم , شفت سعادة في عيون الجميع وختلط الفرح بالسعادة والابتسامة بالدموع , واشتركنا جميعا في ملحمة بكائية رهيبة (عرفت اني مشروع ساحر فاشل لان دمعتي قريبة يمكن عشان نشأت يتيم وتعودت على البكاء من زمان , يمكن ؟).

كلمت ابوها وقلتلة البنت الحمد لله كويسة لكن فية ظروف لازم تتغير عشان ما تتكرر المأساة وياليت ننسى موضوع الزواج في الوقت الحاضر لحد ما ترجع الامور لحالتها الطبيعية 100% خاصة ان البنت فاقدة التوازن نتيجة الاحداث الاخيرة (طبعا كان اي كلام عشان اكسب وقت افكر في الحل).

بعد كم يوم قابلني ابو-س واعطاني جهاز جوال وقلي هذا جاك هدية من فلانة (بنت عبدالهادي) وابشرك انها الحمد لله طيبة , وترى ابوها ما حيقصر معاك كانت ايامها خدمة الجوال ماهي متوفرة الا لفئة محدودة جدا , جلست في صراع نفسي اقول لابو-س ولا ما اقول البنت استأمنتني صحيح , لكن استأمنتني على شي غلط , خرجت من هذا الصراع بقرار غير قابل للتراجع وهو اني اقول ولكن بشكل لا يعرض البنت لمشكلة بقدر الامكان وفعلا تشجعت وقلت لابو-س بعد ما وعدني انة حيعالج الامر بحكمة طبعا اول ما حكيتلة الموضوع هاج وماج وقلي انا حسوي وافعل واجيبة زي الكلب (طبعا هو يقدر يسوي اكثر من كذا اذا حب) بعد محاولات اقنعتة انة يعطيني فرصة لان عندي ترتيب وان شاء الله يكشف الحقيقة اذا الولد كويس نساعدها تتزوجة واذا مو كويس نثبتلها وننهي الموضوع واذا انا فشلت يتصرف هوة بمعرفتة .

سارت البنت على تواصل معي كان كل خوفي ان البنت تتواصل معاة او تقابلة وانا ما كنت حعرف طبعا وتكتشف ان ما عندي سالفة (لاني امارس السحر الغير حقيقي يعني ما عندي جن ولا معلومات ) لكن ربنا ستر , كلمتني وقالت لي انها كلمتة وقالها لا زم يقابلها عشان يشرحلها الوضع بالتفصيل , سألتها فين تتقابلوا بالعادة قالت عند ابوها شالية كل مقابلاتهم فية , خليتها تتفق معاة على موعد معين ورحت انا وهية على الشالية قبل ما يوصل وكان معانا الفحم والمبخرة والشمع وقلتلها تقولة اني ولد خالتها وجاي اساعدهم واني متفهم الوضع , وصل الحبيب لقاني جالسلة زي الشيطان الرجيم عرفتة علية قالتلة فلان ولد خالتي وحيساعدنا و.... قاطعتها وقلتلة انا لاني ولد خالتها ولا ولد عمها انا بختصار ساحر جاي اشوف حقيقتك طبعا ارتبك وضاعت علومة (فية في علم السحر الغير حقيقي نقطة مهمة اسمها نقطة بناء المؤثرات على ناتج الصدمة الاولى ). ماعطيتة فرصة يفكر سألتة ايش ظروفك الي مانعاك تتقدملها غير موافقة اهلها , قلي هذا موضوع بيني وبينها قلتلة انا ماني طاب عليك من السقف انا جاي بناءا على طلبها يعني اكلمك نيابة عنها , سألها انتي موافقة على هذا التصرف ماردت علية , قلتلة اسمع انا عارف حقيقتك كاملة وكان ممكن اقولها لكن حبيت انها تسمعها منك بنفسها , قلي قولها , قلتلة اهم شي ما تهرب , سارت هي تطالع فية تشوف ردت فعلة وانا قمت اجهز الفحم شوي سمعت صياحهم خرجت لقيتهم يتخاصموا لانة معترض على وجودي قلتلة يعني بديت تدور عذر للشردة وحنا لسى ما بدينا , استفزيتة ومن باب التحدي والعناد جلس عشان يثبت حسن نيتة طفينا الانوار وبدا البخور يتوزع في المكان وبديت امارس علية الضغط اول ما شاف قدامة بس (قطو) بدا يرتبك ونثر السفرة كاملة طلع متزوج ومطلق وعندة ولد , البنت هبت فية .

جلست اسمع هوشتهم طلع ان البنت مشتريالة سيارة وتعطية مرتب شهري وتدفعلة اجار الشقة يعني الشغلة كلها نصب لكن المرة هذي كانت الخسارة فلوس ومشاعر . (لو تطلع اسرار الناس والله يا حنكتشف كذب وخداع بين الناس بشكل ما يصدق خاصة في عالمنا العربي مع شديد الاسف).

طبعا البنت انتكست حالتها بشكل سيء لانها انصدمت في حبيب القلب عشان كذا لازم اخواتنا وبناتنا ينتبهوا ومايطلقوا العنان لمشاعرهم ,الحب شي جميل ولا بد منة عشان يسير للحياة طعم ولون ولكن ياسلام لو هذا الحب كان محاط بالعقل والحكمة , المهم ان البنوتة مع الوقت ربنا اخذ بيدها ومشي الحال وبعد اقل من سنة حضرت انا وابو-س زواجها وبعد الزواج ابوها سوا حفلة للخاصة جدا ولولا الخوف من اتهامي بالخروج عن الموضوع كان حكيتلكم عن هذي الحفلة لاني اكتشفت ان فية ناس عايشة وناس تتصور انها عايشة , ما علينا .

كانت هذي اول تجربة لي مع العلاج لكن ما كانت كل الحالات كذا لانة مرعلية حالات بعد ما تعلمت السحر الحقيقي شككتني في نفسي (حنرجع لموضوع تعلم السحر الحقيقي لكني تحمست احكيلكم القصة لانها غريبة )القصة تتكلم عن بنت واخوها تناقلت الناس قصتهم تلك الايام في قرية بمنطقة تهامة تقول القصة ان البنت عمرها 7سنوات واخوها عمرة 5 سنوات ولدوا بكم (لاينطقون منذ الولادة) ماتت امهم وتزوج ابوهم حرمة ثانية وعاشوا مع بعض وبعد اقل من سنة سارت الناس تسمع صوت عواء ذيابة في القرية طوال الليل ومع الوقت انعرف ان الصوت يطلع من بيت البنت واخوها وقالوا بعض الناس الي شافوا الاطفال انهم تحولوا لذئاب وسار الشعر يغطي اجسامه واظافرهم طوال , وان الاب وزوجتة حابسين الاولاد في قفص حديد وجابولهم شيوخ لكن مافية فايدة , انا ما صدقت القصة رغم ان اكثر من واحد حكالي عنها ولما زاد انتشار القصة بين الناس جاني امر بالتوجه الى المنطقة لمعرفة حقيقة القصة , وصلت بعد عناء الى قرية بسيطة في تهامة ودلونا على البيت وكان عبارة عن بيت بسيط قابلت صاحب البيت وسألتة قلي ان القصة كذب وان عيالة تعبانين شوي لكن الناس ما تنقل الحقيقة لدرجة انهم اتهموا زوجتة انها عملت لهم سحر وانة طلق زوجتة بسبب كلام الناس ورغم كذا الاولاد باقي تعبانين , وقال انة فعلا كذا شيخ جو قروا على الاولاد وبعضهم اكدلة انهم مسحورين لكن السحر اللي فيهم قوي جدا , طلبت منة اني اشوفهم فعلا اخذني على غرفة ثانية كنت في قمة تمكني من السحر الحقيقي واعرف في هذي الامور اكثر مما اعرف اسمي لكني شفت منظر والله على قد ما شفت في حياتي ما مرعلية منظر خوفني زي منظر هذول الاطفال صحيح ان كلام الناس كان كذب عن موضوع الشعر والتحول , لكن فعلا المنظر كان مخيف , اولا اضاءة الغرفة بسيطة جدا والغرفة قذرة والاولاد كانوا مربوطين من ارجلهم بسلسلة موصولة بالجدار وكانت ملابسهم متسخة وشعورهم منكوشة واجسامهم هزيلة واظافرهم طويلة وجالسين زي ما يجلس الحيوان , والبنت كان ظهرها منحني , سلمت عليهم جلسوا يناظروني ولا رمشت عيونهم , خرجت من الغرفة اول ما تعديت الغرفة بخطوتين الا وانا اسمع صوت عواء يشبة عواء الذيب رجعت للغرفة وشفتهم فعلا يعوون بطريقة الذيب جاني خوف من المنظر , واستدعيت كل الجن اللي اتعامل معاهم سفلي وعلوي ولكن دون جدوى حضرت جلسات مع شيوخ جوا من كل المدن وانتهيت الى ان ما حدث للاطفال هو حالة مرضية نتيجة ظروف غامضة ولا بد من عرضهم على اطباء نفسيين .



ماعلينا نرجع لقصتنا , مر على رجوعي من الهند اقل من سنة واصبح الكثيرين يشيرون الي بالبنان , فتحت لي ابواب القصور اصبح اصدقائي من علية القوم , اقبلت علية الدنيا بنعيمها وحريرها ومفاتنها , تغيرت حياتي في هذي الفترة البسيطة بشكل جذري , واصبحت ملونير وانا في سن صغيرة فكرت اعيش حياتي واقطع علاقاتي بكثير من الناس الي عرفتهم في الفترة هذي وافلها , حاولت اتمرد على وضعي واترك هذي الشغلة لكن لقيت نفسي تشربكت وصعب انسحب , كما ان الناس الي وصلتني وعيشتني هذي العيشة تقدر تهد المعبد على راسي , ولقيت ان اغلب بحث هاؤلاء عن الذهب الاحمر(الزئبق),ورغم اني كنت اقول ان هذا الكلام غير حقيقي الا ان بعض التجارب الي مريت فيها خلال هذي السنتين شككتني في الامر لذا قررت العودة للبحث عن الحقيقة مرة اخرى .

عرضت الامر على المهتمين بهذا الموضوع فلقيت منهم التشجيع بل وضخت الاموال في حسابي لتشجيعي على الذهاب لان الكل يريد معرفة الحقيقة حول (خرافة الزئبق الاحمر الذي يطيل عمر الجان ويدفعون مقابلة مئآت الملايين) تركت خلفي الحرير ولديباج وقررت العودة لحياة العشش ودخول عالم الجن الخفي عشان اعرف حقيقة هذا الامر وكان الشيخ موسى هو الهدف الاول لهذة الرحلة ثم الى ازقة نيروبي في كينيا بلد السحر الجنس والمخدرات.... يتبع شكرا على المتابعة والتواصل .