" سامحني لأني أحبك "
البارت الرابع عشر
ألحان: ليش ما تخبرين جاسم، يمكن يساعدني؟؟
شوق: جاسم!!!
ألحان: أي حد يا شوق، المهم أني أطلع من هالمصيبة
شوق في خاطرها: مهما يكون كره جاسم لي، أنا متأكدة أنه بيساعدني، جاسم وأنا أعرفه عدل ريال شهم ومستحيل يرد حد يطلب منه مساعدة، وهاي فرصة أني أدور بموبايله وأعرف هالحقيرة اللي يرمسها...
شوق بحماس: أنا الحين بتصل بجاسم، وبطلب منه يساعدنا...
عند جاسم
جاسم كالعادة يسولف مع فجر بالفون " حشى ما يملون من السوالف"، بس هالمرة طرش لها صورته، صحيح أن صورة جاسم عادية، لكن بعيون فجر كان " جنتل مان "، حتى لو ما بينت هالشيء جدام جاسم...
جاسم: لالا صج أبا أسمع رايج، عيبتج الصورة أو لا؟؟
فجر: امممم عادية
جاسم: فجر عن السخافات عاد، يا عيبتج يا لا...
فجر تضحك: صدقني جاسم أنا ماعرف بهالسوالف، يعني أجوف الصورة عادية
جاسم يبا يغايظها: والله غيرج من البنات كانوا يموتون على صوري، وشوي وانتبه أن شوق يالسة تتصل عليه، لكنه سوالها طاف، وظل يكمل سوالفه مع فجر...
فجر: انزين خلاص صورتك حلوة
جاسم يتصنع الزعل: الظاهر أنا واحد خسف
فجر تضحك وبصوت واطي: انت بنظري أحلى واحد بهالكون
جاسم يصرخ: فديتج والله
أما شوق فكانت تتصل وتتصل، وجاسم مول مب مسويلها أي سالفة
شوق بعصبية: أففف، ما يرد يا ألحان، لا والظاهر عنده خط، أكيد يالس يكلم الحيوانة...
ألحان: انزين طرشيله مسج
شوق: هذا اللي بسويه
بين سوالف جاسم وفجر، انتبه للمسج
جاسم: حبيبتي، لحظة شوي، الظاهر مسج واصلني
فجر: ردينا على هالكلام
جاسم يضحك: انتي حبيبتي غصبا عنج
جاسم يالس يقرأ المسج
" حبي، ربيعتي صايرة لها مشكلة عودة مع ربيعها، و نحن محتاجين تساعدنا"
جاسم في خاطره: أكيد ربيعتج هاي خايسة شراتج، أو يمكن شوق تجذب علي
فجر: جاسم وينك؟؟
جاسم: معاج يا أحلى فجر، بس هذا ربيعي مطرش لي مسج مال الخدمة، الظاهر ما عنده رصيد ويباني ضروري، بتصل عليه الحين وبعدين برمسج
فجر: أوكي
جاسم: تامرين على شيء
فجر: هيه
جاسم: عيوني لج
فجر بخجل: تحمل على عمرك
جاسم يضحك: فديت اللي يخافون علي ، وانتي بعد يالغالية تحملي على عمرج
فجر: إن شاء الله
يوم بند جاسم من فجر، تم يفكر بمسج شوق ويقراه كذا مرة
جاسم: أتصل بشوق وإلا لا، يمكن صج ربيعتها طايحة بمشكلة ومحتاجة مساعدة، بس إن شاء الله ما تكون شرات المشاكل الوصخة اللي نسمع عنها...
واتصل جاسم بشوق
شوق بوناسة: هلا حبي، هلا حياتي
ألحان يالسة حذالها ومتضايجة حدها من شوق، لأنها تحس أنها أبد مب مهتمة بمشكلتها مع سليمان، كل اللي يهمها جاسم وبس، مع أن شوق هي سبب المشكلة اللي صارت...
جاسم بجدية: شوالسالفة شوق؟؟
شوق: انت ليش معصب جي؟؟
جاسم بنبرة حادة: لو ما قلتي شوالسالفة ببند الحين..
شوق: أنا ماعرف أرمس بالفون، ممكن أجوفك وأرمسك بالموضوع
جاسم بحزم: لا
شوق بطنازة: ليش خايف مني؟؟
جاسم: سمعي شوق، عندج رمسة ارمسي بالفون، ما عندج ببند الحين
شوق: حبي
جاسم يقاطعها: ارمسي باحترام
شوق بعصبية: انزين، الموضوع وايد كبير، يخص سمعة ربيعتي، وماعرف أرمس فيه بالفون
جاسم مثل ما توقع بالضبط
شوق: ما قلتلي وين تبا تجوفني؟؟
جاسم بنبرة حادة: بمكان خيانتج...
شوق باستغراب: نعم!!!
جاسم: أظن أنج سمعتي، بمكان خيانتج
شوق بضيج: انت ليش تبا تعذبني؟؟
جاسم: انتي اللي بديتي بالعذاب يا شوق، انتي اللي هدمتي كل المشاعر الصادقة اللي كنت أحملها صوبج
شوق: بس أنا خلاص تغيرت
جاسم يقاطعها: لو كنتي فاضية باجر العصر، بجوفج بمكان خيانتج وبنفس الطاولة اللي كنتي يالسة فيها مع حبيب القلب، وعلى فكرة ربيعي سعيد بيكون معاي
شوق بعصبية: وليش ربيعك يكون معانا.؟؟
جاسم: لي أسبابي، وأهمها مابا الناس يتحرون أن هالصايعة حبيبتي
شوق: حرام عليك جاسم
جاسم: اللي عندي قلته، وباجر بجوفج، غير هالكلام ما عندي
بندت شوق من جاسم وهي كارهة عمرها و كارهة الذل اللي تجوفه من جاسم...
شوق: أكيد هذا كله بسبب الحيوانة اللي يرمسها، والله لو عرفتها بكرهها بحياتها، بس كيف أوصل لها، كيف بس؟؟!!!
في اليوم الثاني
التقت خيانة شوق مع جرح جاسم، اللي لين الحين ينزف ألم وحزن ......
الجرح يبرأ والدمع يرحل وكل أنيــــن وله دواء
إلا الخيانة أثرها قاسي و صــــداها بس يهز الكـــون
تهدم أعشاش المحبة وتذوقها علاقم أمر من البلاء
تفرق الأرواح اللي تشع براءة وتصيبها بعاهات الجنون
تطعن القلوب وتتمايل بجنازتهم وتقوم بواجب العزاء
تنغمس بأعماق ذاتك لأجل تصير للحزن مسجــون
شوق تمد إيها عشان تسلم على جاسم، جاسم ما كان ناوي يمد إيده، لكنه استحى من الناس اللي تطالعه ومد إيده وسلم عليها " تستحي من الناس وما تستحي من الله "
شوق بعين تغوص وسط الدمع: شحالك الغالي
جاسم بجدية: شوق يا ليت تبدين بالموضوع
شوق بعصبية: انت بلاك صاير جي، مب متحمل تسمع صوتي، ويايب معاك ربيعك، ليش خايف أني آكلك، وفوق هذا حضرتك يالس تطالع الأرض، ليش ويهي خسف وإلا يلوع بالجبد، وبطنازة قالت: أووو سوري نسيت أنك حصلت ويه أحلى من ويهي، عاد خلني أجوف صورتها عشان أحكم منو أحلى...
جاسم بنبرة حادة: تسأليني ليش تغيرت، وانتي اللي جرحتي مشاعري وشوهتي الحب بعيني، وبصوت عالي قال: بهالمكان كان يالس علي، وكنتي تضحكين معاه، ما فكرتي فيني يومها، ما فكرتي لو جفت هالموقف شو ممكن يصير فيني، ما فكرتي بإحساسي مولية، ما فكرتي بالحب العميق اللي كنت أشيله بقلبي لج، تدرين يومها ليش غيرت رايي وبدل ماسير القرية العالمية، ييت العين مول،تعرفين ليش يا شوق، لأن في ساعة داشة خاطري وكنت أبا أشتريها لج هدية بمناسبة عيد ميلادج، كنت ناوي أعرفج على إختي حصة، كنت وكنت وكنت، لكن للأسف المشهد اللي جفته بهالمكان وعاني من الغلط اللي كنت بسويه، وأكبر غلطة بحياتي كنت بسويها، لو عرفتج على إختي حصة، صج كيف يلتقي البياض مع السواد، كيف يلتقي النور مع الظلام، كيف يلتقي النظيف مع الوصخ؟؟
شوق: جاسم بس خلاص كافي
سعيد: جاسم، خلاص هدي شوي وخلنا نفهم من شوق شو سالفة ربيعتها...
جاسم: لو ما تكلمتي الحين يا شوق أنا بسير
شوق: لا خلاص برمس، وبعد ما مسحت دمعتها قالت: ربيعتي تعرفت على واحد، وسارت معاه الشقة وحاليا يهددها لو ما سارت له الشقة مرة ثانية بينشر لها أشرطة فيديو وبيوزعها على ربعه، لأن كل شيء صار بينهم كان مسجل بأشرطة فيديو...
جاسم: ألحان صح؟؟ " جاسم كان يدري أن أقرب وحدة لشوق هي ألحان"
شوق هزت راسها بمعني هيه
سعيد: صج أنه مب ريال
جاسم وهو يرمس سعيد: اللوم مب بس عالريال يا سعيد، اللوم بعد يطيح على البنت اللي تفرط بسمعتها وسمعة أهلها وتركض وراء ذيب يحاول يستغل جسدها، كل بنت تطلع مع ريال بروحهم بمكان منعزل، الشيطان يسهل لهم المعصية، حتى الخيانة دوم يقولون الرياييل كلهم خونة، لكنهم يتناسون أن كل خيانة يرتكبها الريال يكون الطرف الآخر من الخيانة حرمة، وصد صوب شوق: والخيانة بهالزمن تزيد يوم عن يوم
شوق بعصبية: الحين ماله داعي هالرمسة، بتساعدنا أو لا؟؟
جاسم: أكيد رمسة الحق تزعل، المهم ما علينا، عطيني عنوان سليمان أو رقمه
شوق خافت تعطيه رقم سليمان، عشان ما يعرف أن كل شيء صار لألحان بسببها هي، خاصة أن سليمان اتصل على خليفة
شوق: أنا ماعرف رقمه ولا عنوانه
جاسم: انزين اتصلي على ربيعتج واسأليها...
شوق استغلت الفرصة: انزين ممكن أتصل من موبايلك، لأن موبايلي مفلس، مافيه رصيد
جاسم لأنه يفهم حركات شوق: تبين رصيد بطرش لج، بس من غير ما تجيسين موبايلي
شوق في خاطرها: أففف طول عمره ذكي
شوق بضيج: خلاص تذكرت العنوان، مابا منك رصيد
سعيد: شو العنوان؟؟
شوق: صوب ال................
جاسم: ما شاء الله حافظة العنوان كامل
شوق: أكيد لأني أنا اللي وصلتها
جاسم: شووو!!!
شوق بارتباك: اممم يومها قالتلي أنها بتسير حق ربيعتها، وأنا وصلتها...
جاسم: بالذمة أي بنت تسكن بهالبناية، هالبناية إما شباب عزوبيين أو أجانب
شوق: امممم وأنا شدراني، ما كنت أدري أن تحت السواهي دواهي
جاسم صد صوب سعيد: يلا سعيد سرنا
شوق: أنا بعد بسيرمعاكم
جاسم: هي مب مسرحية عشان تيين ويانا و بعدين سيارتي وايد نظيفة، وقبل ما يسير طلع لها مية درهم وفرها بويهها وبطنازة قال: هاي المية عشان تحطين رصيد بموبايلج وسيدة سار عنها حتى من غير ما يجوف ملامحها كيف صارت
شوق في خاطرها: والله يا جاسم لو كنت برجع لك قبل عشان أحبك، الحين برجع لك بس عشان أسترد كرامتي منك يا الحقير، يارب ما يحصل سليمان عشان الموضوع يطول أكثر عن جي...
في السيارة
عند جاسم وسعيد
سعيد: مب جنك كنت قاسي شوي على شوق...
جاسم: والله لو حطيت شوق تحت ريولي ودست عليها، ما بشفي غليلي منها
سعيد: بل بل بل لهالدرجة تكرها؟؟!!!
جاسم: سعيد، شوق جرحتني جرح عميق، وصعب علي أني أسامحها، أنا قلتلها بيوم من الأيام، أني مستعد أسامح على كل شيء إلا الخيانة، الخيانة وايد تجرح يا سعيد
سعيد: وفجر، شو نهاية علاقتك فيها؟؟
جاسم: خلينا نأجل هالموضوع بعدين، أهم شيء الحين نجوف شو سالفة سليمان هذا
عند عبير
في البيت عبير مع أمها
أم عبير: شسالفة يا بنيتي، قلبي متقطع عليج، كله متضايجة ومتكدرة
عبير: ما شيء ماما
أم عبير: يا بنيتي قلبي يتقطع عليج و أنا أجوفج جي، حد قالج شيء، حد ضايجج بشيء؟؟
عبير تحاول تخفي دمعتها: لا ماما ما في حد، بس تعرفين أحاتي آلام الكلية، الدكتور قالي أن بعد المدرسة ضروري أسير المستشفى، عسبة بيسوون لي فحوصات زيادة...
أم عبير وهي تصيح: فديتج يا بنيتي، تفداج كليتي والله
عبير: لا ماما، إن شاء الله وضعي يتحسن
أم عبير: يارب يشافيج يارب و ضمت عبير لحضنها و هي تصيح
عند سليمان
جاسم وسعيد عند باب شقة سليمان
جاسم: إن شاء الله بس يكون موجود
سعيد: خلينا ندق الجرس نجوف
جاسم: أوكي
شوي وطلع لهم سليمان وبعد السلام
سليمان: يا هلا حياكم
سعيد: الله يحييك
سليمان بعد ما يلس: منو الشباب..؟؟
جاسم: مب مهم نحن منو، المهم الموضوع اللي بنرمس فيه
سليمان باستغراب: شوالسالفة وانتوا منو؟؟ وأي موضوع هذا؟؟!!!
جاسم: أنا شاب حالي من حالك، أغازل وكنت أظهر مع بنات، بس بحياتي ما كنت نذل أو تصرفت تصرف ينقص شيء من رجولتي
سليمان بدأ يحس بالخوف، لأنه خاف يكون هالشخص له علاقة بألحان
سليمان: انت شو تقصد؟؟
جاسم: ألحان يا سليمان؟؟
سليمان بخوف: انت منو؟؟
جاسم: اطمن أنا لا أخوها ولا أصير لها
سليمان يضحك: عيل بصفتك منو ترمس عنها، أهااا أكيد حبيبها اليديد
جاسم: أنا بحياتي ما جفت ألحان ولا حتى كلمتها، لكن سمعت بمشكلتها وحبيت أساعدها، انت أكيد بتضحك من كلامي، وبتتحرى أني بسوي هالشيء، لأني أبا شيء معين من ألحان، لكن أنا ريال أخاف ربي، ومستحيل أغلط غلطتك، مهما كانت البنت خايسة، أنا إنسان مسلم أخاف من ربي وألحان إختي بالإسلام وهي وحدة من بنات البلاد، وشيء طبيعي أني أفكر أساعدها
سليمان بهدوء بارد وهو يولع سيجارته: قم اطلع برع
جاسم حده فوَل من أسلوب سليمان، وكان وده يضربه، لكنه فكر أن الضرب ما رح يفيده بأي شيء، وممكن الموضوع يكبر أكثر عن جي، فعشان جي قرر جاسم أنه يستخدم أسلوب السياسة والإقناع، خاصة أن جاسم يتميز بأسلوب وايد أوكي...
جاسم بجدية: اسمع أخوي سليمان، نحن الشباب بهالعمر نحب نلعب على البنات، ماقولك لا، وكل ذيب يالس يدور على ليلى، وما يكتفي بليلى وحدة، لكن الحياة ياخوي سلف ودين، وكما تدين تدان، صدقني أنا ما بستفيد أي شيء من الناس يوم بساعد ألحان، لكن أجري كله عند رب العالمين، ورح أرقد وأنا متأكد أن لا خواتي ولا حد من أهلي رح ينزل راسه بالأرض وبنبرة أهدأ: انت واحد عندك خوات وعمات وخالات، وفي المستقبل إن شاء الله بنات، تبا يصير فيهم نفس اللي صار بألحان، هي لحظة وحدة تستانس فيها، لكن عذابها طول العمر، وربك يمهل ولا يهمل...
سعيد: انت هالمرة غلطت مع ألحان، واللي فهمناه أن ألحان بنت مالها أي تجارب قبلك، لكن تخيل لو صادفتك وحدة كانت لها تجارب مع غيرك، وفيها أمراض الدنيا كلها، على سبيل المثال الإيدز، ممكن تفهمني وقتها هالوناسة اللي جفتها بدقايق، شو ممكن تفيدك مع المرض اللي بتكون حامله طول العمر...
سليمان وهو بدأ يحس بالخوف: انتوا الحين شو اللي تبونه بالضبط؟؟
جاسم: نبا أشرطة الفيديو كلها، و تقطع علاقتك بألحان..
سليمان يضحك: تقولون أنكم ما تعرفونها، وانتوا تدرون بالسالفة كلها
سعيد: نحن صحيح ندري بالسالفة كلها، بس مب من ألحان
جاسم: ومب مهم من منو، المهم تعطينا أشرطة الفيديو، ووعد مني أحرقها جدام عينك، عشان ما يروح فكرك لبعيد
سليمان بنذالة: ولو ما عطيتكم..
جاسم: اسمع أخوي، ترى نحن للحين نتكلم معاك بالطيب، مع العلم أن ربيعي هذا أخوه يشتغل بالأمين السري، يعني كان بإمكاننا نسير عند أخوه مباشرة وينحل الموضوع حتى من غير ما تنفضح ألحان أو حد من أهلها، لأنك مثل ماتعرف شغل الأمين السري يكون بسرية تامة، بس نحن فضلنا أول شيء نرمس معاك انت، لعلى وعسى نطلع بحل يرضينا...
سليمان ساكت
سعيد: شو قلت؟؟
سليمان: ما توقعت بيوم هالموقف يصير لي، وبطنازة قال: والله صارت ألحان أهم من قضية فلسطين، يكون بعلمكم لو واحد منكم حبيب ألحان فأنا عندي صور لألحان هاي اللي تدافعون عنها وهي بملابس النوم، حتى من قبل ما يصير بينا أي شيء، يعني بالمختصر المفيد ألحان وحدة صايعة...
جاسم: صدقني أنا ماسوي هالشيء عشان ألحان، ولا لي أي غرض معاها، أنا أسوي هالشيء أولاعشان أكسب الأجر من عند ربي، و ثانيا عشان سمعة بلادنا، ولأن الوالد الله يطولي بعمره علمني مارد حد محتاي مني مساعدة، ولو قدرت أساعد حد فهذا يعني بالنسبة لي شيء كبير
سليمان بعد تفكير: أنا بعطيكم الأشرطة، مب لأني خايف منكم، بس لأن ألحان ما تستاهل أني أدخل مشاكل بسببها، بس حطوا ببالكم أن ألحان من النوع اللعوب والماصخ، ولو ما كانت جي قسما بربي ما تجرأت وطلبت منها ذاك الطلب، البنت العفيفية المحترمة تفرض احترامها ومكانتها على الجميع، والبنت الصايعة شرات اللعبة تنتقل من واحد لواحد، وأنا أصلا ما تعرفت على ألحان إلا من خلال ربيعي
سعيد: الله هو اللي يحاسبهم، مب نحن، وإن شاء الله، الله يهدي الجميع
و فعلا سار سليمان داخل وسلمهم كل الأشرطة، وحرقوها ...
عند شوق
شوق كانت يالسة على أعصابها وتحاتي بشكل فظيع، كانت تدعي أن الموضوع ما ينحل ويطول أكثر عن جي، عشان تكون فرصتها للكلام مع جاسم أكثر وأكثر، وشوي ورن تلفونها وكان جاسم هو المتصل
شوق: هلا وغلا بحبيبي
سعيد: أنا سعيد مب جاسم
شوق بخوف: عيل وين جاسم؟؟..
سعيد: لا تخافين هو يالس حذالي، ويقولج خبري ربيعتج أن الموضوع الحمدالله انحل وكل الأشرطة حرقناها...
شوق بعصبية: وليش هو ما يرمسني بروحه...؟؟
سعيد: والله جاسم له أسبابه الخاصة
جاسم فهم سؤال شوق
جاسم يساسر سعيد: قولها ما يبا يخون حبيبته...
سعيد: يقولج ما يبا يخون حبيبته فجر
شوق: فجر؟؟
جاسم بعصبية: يالثور، ما قلتلك قولها عن اسم فجر
سعيد: السموحة منك بس والله بالغلط
جاسم: أقولك عطني الموبايل
جاسم: سمعي يا شوق، مثل ما قالج سعيد أنا مابا أخون حبيبتي، واللي بتصير زوجتي في المستقبل، عشان جي لو كان عندج بقايا كرامة يا ليت ما تتصلين علي مرة ثانية، والموضوع مب وايد صعب علي، يعني لو حضرتج اتصلتي مرة ثانية، ممكن وبكل بساطة أغير رقم موبايلي وأفتك من حشرتج
شوق بحزن: لا خلاص ما بتصل عليك مرة ثانية و بندت من عنده
شوق في خاطرها: كان عندي سليمان قبل، وعن طريجه حصلت على رقم جاسم، بس حاليا لو جاسم غير رقمه، صعب أطلعه مرة ثانية، ومب كل مرة ولد عمه بيكون غبي، المفروض أكون أكثر ذكاء عن جي، عشان أعرف كيف أرجع جاسم لي و أنتقم من هالحيوانة اللي اسمها فجر؟؟
عند جاسم
سعيد: انت متأكد من هالقرار؟؟
جاسم: هالقرار وايد مناسب لي ولفجر، لأني محتاي فترة مارمسها، منها أقدر أعرف مشاعري صوبها، ومنها عشان نحن الإثنين نركز بدراستنا
سعيد: بس يمكن فجر ما ترضى
جاسم: فجر وااااااااايد مهتمة بدراستها، وما أظن قرار مثل هذا بترفضه، وبعدين هي محتاجة تذاكر عدل وأنا نفس الشيء
سعيد: ولو رفضت
جاسم: لا تخاف أنا عندي أسلوب بالإقناع، خاصة لو فهمتها أن هالشيء لصالحي أنا بعد
عند فجر
فجر بغرفتها يالسة تذاكر حق الإمتحانات وشوي واتصل عليها جاسم
طبعا بعد السلام والسوالف
فجر: اممم أنا ما عندي مانع
جاسم: أفااا بهالسهولة، وأنا اللي تحريتج بتزعلين
فجر: انت ما قلت أنك ما بترمسني للأبد، انت قلت بس خلال فترة الإمتحانات، وأنا فعلا محتاجة أركز بالدراسة
جاسم: يعني يوم كنت أكلمج ما كنتي تركزين؟؟
فجر: الموضوع مب جي، بس كنت كل ما أرمسك أظل طول الوقت أفكر فيك، عشان جي أنا محتاجة ما أرمسك فترة عشاني وعشانك، صح هالشيء يعذبني بس مثل ما قلت عشان مستقبلنا يا جاسم، نحن ما تعبنا 12 سنة عشان نهدم كل هذا الحين، وأنا صج خاطري بنسبة 96%
جاسم: فديتج والله، انزين لو اشتقتي لي شو بتسوين؟؟
فجر تضحك: بطالع صورتك
جاسم بصوت زعلان: يا حظج، انزين لو أنا اشتقت لج شو أطالع؟؟
فجر تضحك: لا تطالع حد
جاسم بجدية: لا جد والله خاطري أجوفج
فجر: جاسم انت تخبلت؟؟
جاسم: لا جد فجورة، خاطري أنج تطرشين لي صورتج...
فجر: لا االموضوع وايد صعب علي
جاسم: أفاااااا، ما شيء ثقة
فجر: الموضوع مب جي، لكن
جاسم يقاطعها: أوعدج أني بمسح الصورة سيدة
فجر: جاسم أحس أن هالشيء وايد كبير
جاسم: أنا ما قلت لج طرشي صورتج وانتي لابسة لبس فاضح أو عاري، أصلا أنا بالأساس ما برضى عليج....
فجر بخوف: ماعرف أحس أن هالشيء يخوفني
جاسم: أنا ما عندي مانع حتى لو تطرشين صورتج اللي بالجواز، يعني بالذمة صورتج بالجواز، مب وايد ناس جافوها، تسترخصيها فيني أنا
فجر: هم جافوها عشان يخلصون الإجراءات، وبعدين صورتي بالجواز مولية مب حلوة
جاسم: والله ما يهمني ، أي صورة طرشيها لي
فجر: بس
جاسم يقاطعها: انتي تدرين أن نحن مارح نرمس مع بعض لمدة أسبوعين، تخيلي بعدين صار فيني شيء
فجر تصارخ: بسم الله عليك لا تقول جي
جاسم: تخيلي بعدين بتقولين أني ما سويت له آخر طلب قبل ما يموت
فجر تصيح: بس خلاص يا جاسم، لا تعور قلبي أكثر عن جي
جاسم: سلامة قلبج الغالية، أنا بخليج الحين، الله يحفظج
فجر: جاسم...
=====