روائع الارشادات في أدب المنتديات!!.. إدخل يا أخي وإتعلم!!
تسمى الكتابة في المنتديات العامة بـ "أدب المنتديات" .. أدب المنتديات يعتبر آخر صرعه في مجال الأدب .. الحقيقة إنه نوع جديد في الأدب محدش تطرق له من قبل .. ما هو الانترنت حاجة جديدة!! .. إزاي بس تتوقع أن حد يتطرق لأدب المنتديات من قبل؟!! .. كبّر مخك معانا برضه يا عمي الحج بقه!!
ما علينا، عشان تكتب في المنتديات وتنزّل مواضيع تكسر الدنيا وتعمل هوجه وموجه في المنتدى .. لأ .. وإيه ؟ .. وتحصل على أعلى نسبة مشاهدة ومشاركة كمان .. يعني تقول كده أكتر من الف وخمسمية مشاهدة ومشاركة .. انته تحتاج إلى تعلم أصول المهنة وأسرار الكار!! .. وآدي يا سيدي نحنا نساعدك على كده .. انته بس إقرأ الارشادات اللي هنا .. وسدقني .. كله حيكون في سليم السليم !! .. خد عندك يا سيدي:
القاعدة الأولى .. القاعدة الإيه؟ .. قول معايه: القاعدة الأولى:
"عنوان الموضوع لازم يشد يعني لازم يشد .. انته فاهم؟!!" .. لأ .. سوري .. "انته فاهم" دي خارج نص القاعدة.
عنوان موضوعك إن ما كانش يشد من على بعد كيلو!! .. يبأه ما تتعبش نفسك وتكتب الموضوع من أصله!! .. آ والله .. عنوان الموضوع هوه الصناره يا اكسلانس!! .. لازم تخليه يشد شد!! .. هوه فرصتك الأولى والأخيرة للنجاح في المنتديات .. ان ضاعت .. فيبقى ضاعت عليك بالكامل وخت (يعني أخذت) صابونه يا فالح!! .. طبعاً فيه أدباء منتدواتيه حيقولولك ويزنّوا في ودانك بالتالي:
"عاوز تعمل شد .. لأ .. ما تعملش عملية تجميل ولا حاجة!! .. انما عليك بالاثارة!! .. الاثارة .. فاهم يا واد!!"
والله مش مشكلة .. إثارة .. إديلها شوية إثارة .. بس يعني (ودي بأه خدها نصيحة من أخ بيهمه أمرك أوي) ما تكونش إثارة فجة!! (رزلة أو خادشة للحياء ولا مؤاخزه يعني!!) .. لأن الاثارة اللي مش ولابد ممكن توديك في داهية انته في غنى عنها .. طيب تسدأ بالله؟!! .. قول لا إله إلا الله يا مؤمن .. دي حتى ممكن يكون لها مفعول جداً عكسي تخلي المشرف (ربنا يخلي كلامنا خفيف عليه!!) يشطب الموضوع .. وتخلي بعد كده اللي يسوى واللي ما يسواشي يتّريأ عليك!! .. صحيح يا أخي زي ما قالوا: المغفل ما يضرش إلا نفسه!!
حتسئل وتقول: طيب ممكن أمسله على عناوين تشد شد زي ما بتوصي حضرتك؟
وليه لأ .. خد عندك يا سيدي العناوين التالية:
"إذا كنت راجل إدخل!!"
"الراجل فيكو يدخل لي!!"
"لا يمكن لانسان محترم إنه يقرأ العنوان ده وما يخشش عشان يشوف هوه ايه الموضوع!!"
"إدخل .. فيه سحلب وطاولة عشانك"
"ممنوع الدخول!!"
"؟؟؟ لأ .. وكمان !!!"
"أرجوك .. ابوس ايدك ادخل .. ما تتجاهلنيش وتخليني أحس أني انسان رمة مهمش ومحدش بيعبره!! .. أنا حانتحر اذا ما دخلتش!! .. وحاقول عليك انك انته اللي كنت السبب .. إن ما وديتك في ابو نكلة!! .. ليه ما بتقراش موضوعي هاه ؟؟ .. ليه ليه ليه لييييييييييييييييييييييييييييييييييييييييييييييييي يييييييييييه يا مفتري ياللي ما بتخافش من ربنا ؟!!" (طبعاً انته ممكن تحط حروف "ياء" في كلمة "ليه" زي ما تقدر .. بصراحة أنا عندي شويتين باقيين عاوز استخدمهم في كلمات تانية)
يعني (شفتي بأه؟ .. آديني استخدمت حرف واحد منهم هنه!!) .. ما علينا .. يعني دي شوية أمسلة ممكن توريك بالزبط ايه المقصود بـ "الشد" في العناوين.
طيب يا سيدي .. آدينا انتهينا من القاعدة الأولى، تحب بأه تتعلم القاعدة التانية؟!! .. أيوه ؟!! دا انته شكلك كده متفائل و "مصدق عمرك" زي ما بيقولوا ؟!! .. بس بأه خليني أفاجأك وأقول لك:
بصراحة .. وبدون زعل وخيبة أمل .. مفيش قاعدة ثانية!!!
أيوه .. يا أخي أو يا أختي مفيش قاعدة ثانية!! .. حد شريكي في حاجة؟!!
الحقيقة يا اكسلانس إن أدب المنتديات فيه قاعدة واحدة وبس اللي هيه:
"عنوان الموضوع لازم يشد يعني لازم يشد"
حتقول:
يا ساتر!! .. ليه بس التشاؤم ده؟!!
حجاوبك وأقول لك:
مش مسدقني؟!! .. طيب روح لكل الناس الغلابه اللي يا عيني عمالين بينزلوا في مواضيع محترمة ومفيدة ليل ونهار .. واسألهم (بس من بعيد رجاءً لا يحدفوك بالطوب!!) :
"إزاي الحال والإقبال على مواضيعكم يا بهوات؟!!!"
وأنا بأكدلك من دلوقتي أنهم كلهم حيحدفوك بالطوب وبالشباشب ، وحيردوا عليك ويرقعوا بالصوت وهمه بيعملوا بإيديهم كده وكده:
"يا خراصي!!" أو "يا خراشي!!" (الكلمة المشهورة اللي بتقولها الولية لما بتولول على جوزها لمّا يموت حسب قول العلامة "بهجت الأباصيري"!! المزكور في مدرسة المشاغبين)
والإجابة دي طبعاً تغني عن أي اجابة أخرى وبتبين حجم المأساة في أدب المنتديات!! .. أُطعت المنتديات وسنينها يا شيخ !! .. فيه حد عنده لب؟!!
وسلامو عليكو