[ابعاد فكر]

ما وحشتك يا وطن؟ قلْ لي وحشتك

قل علي السبعان هالجافي وحشنـي

قلْ لي اني يوم انا طفـل افترشتـك

ليـن غطّانـي جميلـك وافترشنـي

واغفر ان جاوبت انا بصدري نقشتك

وَرّني بك صخر في صدره نقشنـي

قلْ لي انّي عشْت بك واقول عشتـك

قل لي ارجع عيش بي واقول عشني!

قلْ دوشتك والله انـي مـا دوشتـك

غير من قلب ٍ يلبـي لـك دوشنـي

قلْ ربشتك والله اني لـو ربشتـك..

هرْج ، مااحد ٍ فيك بهْروجه ربشني

واشهد اني عشت ذيب وْلا نهشتـك

وان ذيب ٍ داخل ضلوعـك نهشنـي

يا وطن دمّي شماغك.. وين بشتـك

غنّ في عيدك ترى صوتك نعَشنـي

وكان صدرك ضاق بالشعر وبلشتـك

والله ان الشوق في الغربـه بلشنـي

ليتني ما حِشْت شيّ وبـس حشتـك

والا حِشْت اللي أحوش وقلت حِشْني

البلا انّي أشعر انّـي مـا وحشتـك

وانت والله كل شي ٍ بـك وحشنـي!