ياللي عرضتي عنوة ٍ بدروبي
العيب عيبك والذنوب ذنوبي
اما تبلين الخفوق الممحل
ولا عن العشق الموهق توبي
ياللي جمعتي فيك مالا يجمع
لاتشبحين بوجهي المشحوبي
تشتتي مثل شتات امتنا
عقب صلاح وعمه الايوبي
وتجمعي مثل تجمع ربعي
على الشرف والرفق والماجوبي
خلي عنبك يصير طولي وانتي
اليا احتظنته لو سمحتي ذوبي
ذوبي مثل احساسك التلقائي
لاقمت اغازل مسمعك باسلوبي
تنخبوي مثل قصايد غازي
وتشعبي مثل خليل النوبي
ياليت في جوفي قلوبٍ واجد
عشان احبك في جميع قلوبي
نعم احبك حب ماهو عادي
حبٍ من اقصى خافقي مجذوبي
حبٍ كثر ماذقت واتحملته
من سرمدٍ في ليلي الأثيوبي
وكثر ما حنا فالعرب املنا
ولا استفدنا غير بار و لوبي
واكثر من اعداء النجاح الفردي
ياللي على صدور الصحف قالوا بي
أرجوك ياعين العديم الصافي
لدّي ., ليا مني دعيتك صوبي
لا جيت أبنسى مامضى وأطنش .
تطري علي ذكراك يامحبوبي
نظارتك وأشياءك المركونه
وسوارتك وألماسك المكلوبي
وكتابك اللي فهرسته عروقي
وعروقك اللي فهرست مكتوبي
الصدر بيتك والضلوع ضلوعك
نامي على جنب السعد بجنوبي
ولأيقضك قلبي وحن وصوت
مغلوب وهذي حيلة المغلوبي