جابك الله من فراق ضيق صدور المباني
قبل الوحشه تزعزع بيتك الصلب وتبيده
بيتك اللي من رحلت وكل جدرانه تعاني
ماتحمل ينتظر شهرين وعيونك بعيده
الله العالم لو انك جيت متأخر ثواني
ماتشوف إلا بقايا من حصاه ومن حديده
من عرفتك وانت ضايع من مواني لي مواني
وتارك قلبي يولع من وقيده لي وقيده
ضاع عمري بس أحد بها لليالي واتحداني
وانت لاتشبع غياب ولا تخاف من انقيده
ودي أتحمد لك الله بالسلامه....ما مداني
كل ماتوصل برحله ترجع برحله جديده
دام تدري كل وجه غير وجه الله فاني
ياخي اكسب لك ثواب وخاف ربك في عبيده
كان فيني عيب قلي...فيني العيب الفلاني
كان هرجي مزعلك في شي قلي: لاتعيده
لعنبوك ان مت بيدك وش يكفيك من اخواني؟؟
لي حزنوا ربعي علي ومت..شللي تستفيده؟
ليه تصغر في عيوني وانت برقاب الغواني
عيب تستسهل طعوني وانت خابرني وليده
انت منت اللي عشقته!! انت اكيدانسان ثاني
كيف صرت بها البرود وها لأحاسيس البليده
وين حبك للزعل..وين العناد الأولاني؟
وين حنيةزمان وفرحة العمر الرغيده؟
وين ذاك اللي ليا أقبل مايبات الا بأماني
وين رايح اللي ليا قفا مايروح الا فقيده
واحد جابه الله بس يامر ويعصاني
الوحيد اللي أخافه غصب وامشي معه سيده
مابغيت اطيح بيده لين ما ربي بلاني
والا انا لو هي بكيفي..مابغيت اطيح بيده
ذاك بس اللي ليا شفته يلخبط كياني
ذاك من نظرة ينشف دم قلبي من وريده
قبل اشوفه أجمع له احلى القصايد والمعاني
وان لقيته ما عرفت اقول لي جمله مفيده
الف مره قبله اعد القصيده من لساني
ولعنبوه ان جيت عنده قمت اخربط بالقصيده
امدحه وانا ادري لو تباطاني نساني
انطحه وانا اعرفه مجنون وافكاره عنيده
من يسوي بس سواتك يالرهيف الأسمراني
منهو من الناس غيرك غلطته ترفع رصيده؟؟
من يقص جناح طيرك وانت اعز انسان جاني
كيف اخاف رماح غيرك وانت طعنتاك سديده
ان تبعتك أتبعتك من طيبي وواسع بطاني
والا انا جيت اكيدانسان تدري كيف اكيده
اقدر انزع ثوب طيبي والبس ثياب الأناني
واقدر اطلع من عذابي والعب بدورك واجيده
وان بغيت اكسب رهاني بأي وقت اكسب رهاني
واخدعك بإحساس كاذب واتحدى من يصيده
ابك انا لاشفت خلي حط غيري في مكاني
والله اني لاتركه واصد واعشق سيد سيده
خلني داخل حدودك اجبر بخاطر زماني
إكذب في باقي وعودك واصدق بلحظه سعيده
إنتشلني من برودك لو تولع بالمحاني
عطني إحساس بوجودك واخذ كل اللي تريده
تكفى واليا قلت تكفى بيع خلق الله عشاني
لاتضيع من يديني فرصه العمر الوحيده
جيت مابيك تحقرني جيت ابيك تعز شاني
جيت ابي فزعة ضلوعك من مشاعرك البليده
يعلم الله شفت منك ومن غيابك ماكفاني
كان ماتقدر تخفف هم قلبي لا تززززيده
شف غيابك وش يسوي بالصدور وبالمباني
وانت تدري كيف كانت صدمه غيابك شديده
واالله انك لو وصلت البيت متأخر ثواني
مالقيت إلا بقايا من حصاه و من حديده