نزولها عن مستواها يعني الصعب المحال
ما ود من تسكن عيون الناس وعيوني تطيح
عزيزةٍ والعز يلبس صاحبه ثوب الجمال
الـلـه يسامح كل من لايعجبه والـلـه يبيح
النفس لو ما عزها الرجال هانوه الرجال
إلا الوضيع اللي على نفسه من الرفعه شحيح
وهذ الزمن وبكل اسف تقدر على صعب المنال
اهم شي انك تجيد اسلوب الاطرا والمديح
إمدح أو إكذب مثلها بالظبط وجهين الريال
وان بان لك هذا جميل وبان لك هذا قبيح
وابطى جواب اهل الصحافه ما سمعته والسؤال
الحنظله في رايهم والشوك ريحانٍ وشيح
فوضى مجرّد شكل لامعنى ركاكه وابتذال
والنقد عادي ما يهزك ياجبل عاصف وريح
الشعر يا اهل الشعر ماهو كل ما يمكن يقال
ولايهم انك تقوله بالنبط وإلا الفصيح
وياللي من اجل النشر تكتب ياقصيده يامقال
مره بالاسم المستعار ومره الاسم الصريح
الباب لك مفتوح وادخل من جنوب او من شمال
لكن تأكد في النهايه مايصح إلا الصحيح