يابوشبيب الوضع وارجو المعذره كما تشوف
قامت تشاوتنا وياقوّة قدم حرّيفها
هذا لو اني ممن اعرفهم يمشّون الظروف
لكنّ محسوبك تمشّيه الظروف بكيفها
احيان من حموة عصاها ناكل اللقمه وقوف
واحيان لقمتنا وحنا جايعين نعيفها
واحلامنا يارحلةٍ من حد سوف لحد سوف
لكن لقينا متعة الاحلام في تسويفها
والناس ماهم صنف واحد كلهم 0 لكن صنوف
والفاهم الخبير مايحتار في تصنيفها
وانا من اللي لو رحل مجبور من دار الهنوف
اللي يلاحقني لو اني في منامي طيفها
ابكي على الوافين قبل ابكي محنّية الكفوف
وليفها لكن ترى الاجواد انا وليفها
ولا انت في حاجة دليلٍ يقنعك وإلا حلوف
انك على بالي ولو ما اتذكّرك ياحيفها
شيخٍ من اهل الشيمه السبعان مكرمة الضيوف
شهادةٍ من جارها وشهادةٍ من ضيفها
وإكسب رجال ومايهم إخسر ملايين وولوف
معلومه الى كل من لايعلمون آضيفها
آزوّد الحكيم من تجاربي والفيلسوف
والكذبه آنا افشل عباد الله في تأليفها